རླུང་དམར།
ཁ་བའི་ལས་དོན་སྙིང་ལ་གཅེས་སུ་འཛིན།།
དམ་ལོག་དོལ་འདྲེ་སྔར་ནས་རྒོལ་པ་པོ།།
རྨོངས་སེལ་དཔྱོད་ཤེས་ཆེ་བའི་གནམ་སའི་ལྕེ།།
ནམ་མཁའི་ཐོག་མདའ་འདྲ་བའི་སྐྱེས་ཕོ་ཁྱེད།།
མ་རིག་མུན་ལ་མཆོངས་བའི་བོད་མྱི་ཚོར།།
ལེགས་སྟོན་ལམ་བཟང་རྟག་ཏུ་སྨྲ་བར་བྲེལ།།
ཆོས་སྲིད་འོད་འབར་གངས་ཀྱི་ནང་རྫོང་ཆེ།།
དཔའ་གཏམ་མི་ལྐུགས་གཏན་གྱི་བླ་སུག་ཡིན།།
གོང་མའི་གོང་གི་བླ་མའི་བཀའ་གསུང་རྣམས།།
ཁ་བཤད་ལག་སྟོང་མིན་པར་བློ་རྩེ་དཀར།།
ཐ་ཤལ་ངོ་ལོག་ཆེ་བའི་བླུན་ཚོགས་ལ།།
མིག་དཔེ་གསེར་འོད་བརྡར་བའི་གཟེངས་སུ་ཐོན།།
བཙན་བྱོལ་ཐུ་བྷོད་ཉག་ཕྲའི་དུས་ཡུན་འདིར།།
རང་འགན་རི་ལས་ལྕི་བ་ཐུགས་སུ་གཉེར།།
མི་ཕམ་རྣོ་དབལ་བློ་གྲོས་མཁའ་ལྟར་ཡངས།།
བདེན་སྐྱོང་རྫུན་བཀོག་ཁྱེད་ཀྱིས་ལེགས་པར་འབྱེད།།
གང་ལ་གང་མཁོ་རིགས་ཀྱི་ཕོ་ཉ་དེ།།
ཁྱེད་སྤྲུལ་གནམ་སའི་ལྕེ་ཐོགས་རྒྱལ་སྲས་མཆོག།
ཀུན་ཕན་བདེ་རྩའི་དཔལ་ཡོན་རྣམ་པར་བསུ།།
ཁ་ངོ་དངུལ་ལོས་མ་བསླུས་སྐྱེས་ཕོ་ཉིད།།
གདོང་མཆོངས་དཔའ་ཕོ་ཁྱེད་ནི་རྡོ་རིང་ཞིག།
གང་ནས་བལྟས་ན་གཟི་འོད་དགུང་ལ་མཉམ།།
ཁ་ལྕེ་གློད་པ་གསེར་སྲང་སྟོང་ལས་ལྷག།
དུས་ཐོག་ཀུན་ལ་ཕ་མའི་བུ་རྒོད་རེད།།
གཏམ་འཆད་བུམ་མཛོད་རིག་པའི་སེང་གེ་ཁྱེད།།
བློ་བསྐྱེད་ལྕགས་དབྱུག་མི་བཤིག་རབ་ཏུ་མཛེས།།
སྨྱོན་པའི་བློ་དྲི་ནག་པོ་འདུལ་པ་པོ།།
ཕྱི་ནང་མེ་ལོང་འདྲ་བའི་གཙུག་གི་རྒྱན།།
ང་མཁས་ཁྱོད་མཁས་ཟེར་བའི་ང་རྒྱལ་མེད།།
མི་གཞིའི་བདེན་རྫུན་གླེང་མཁན་དབུ་མ་པ།།
རང་གི་རིགས་ལ་སྲི་ཞུ་བསྒྲུབ་པ་རེར།།
འོད་ཀྱི་སྒོ་མོ་ཕྱེས་པའི་མ་འོངས་པ།།
རྟུལ་ཕོད་ཆེ་བའི་མི་གཤིས་རླབས་ཆེན་ཞིག།
རང་རེའི་རིགས་ལ་ཤ་ཚ་གཏམ་གྱིས་ཕྱུག།
ནམ་ཡང་འགྱེལ་མེད་སྒེར་ཚུགས་སྒམ་པོ་དེས།།
གནམ་ས་འགུལ་འདྲའི་བྱས་རྗེས་མང་པོ་བཞག།
ཐུབ་བསྟན་ལང་ཚོའི་རྒྱ་མཚོ་མཐོང་གྲོལ་ཆེ།།
ཐོགས་མེད་ལེགས་བཤད་རྣ་བའི་བུ་རམ་འཐུལ།།
༸རྒྱལ་བའི་བཀའ་གསུང་ཐམས་ཅད་བསྒྲུབ་ལ་རེམ།།
རྒྱང་འབོད་གཉིད་ལས་དཀྲོག་བྱེད་དུས་ཀྱི་ཅོང་།།