ལྷ་ཆབ་སྦྱིན་པ། (ཨོ་གླིང་།)
དགྱ་ནད་ཀྱིས་ཚེ་སྲོག་འཕྲོག་ནའང
ངའི་མི་རིགས་འཇིག་མི་སྲིད
གོ་ལ་ཧྲིལ་བོ་ཡོམ་ཡོམ་སྒུལ་ཏེ
ངའི་སྒོ་ཁར་སླེབས་ཡོད་ཀྱང
འཇིགས་སུ་རུང་བ་ཞིག་མ་ཡིན
དེ་བས་ཀྱང་ཞེད་སྣང་ཞིག་ཡོད་དེ
དགྱ་དངུལ་གྱི་ནད་ཡམས་ཕོག་པའི་མི་དག
གོ་ལ་ཧྲིལ་བོར་གྱར་བའི
བོད་པའི་སྤྱི་ཚོགས་གང་སར
དགྱ་ནད་བཞིན་ཁྱབ་ཚུལ་འདི
ཅི་འདྲའི་འཇིགས་སུ་རུང་བ་ལ་ཨང
དགྱ་ནད་ཀྱི་ཁ་ཐུག་ན
བོད་མི་དག་ཆིག་སྒྲིལ་ཡིན མཐུན་སྒྲིལ་ཡིན
གཞོམ་གཞིག་བྲལ་བའི་རྡོ་རིང་ཞིག་ཡིན
དགྱ་དངུལ་གྱི་ཁ་ཐུག་ན
བོད་པ་དག་ཁ་འཐོར་ཡིན དགྲ་ཟླ་ཡིན
ཆེས་མི་མངོན་པའི་གཡུལ་དམག་རེ་རེ་ཡིན
ཟུར་མཆན།
ན་ནིང་དོ་ཚིགས་བོད་པའི་སྤྱི་ཚོགས་ནང་དུ། རང་རིགས་ཕན་ཚུན་ལ་སྡང་བོ་བྱེད་མཁན་གྱི་གདོང་མཆོངས་དཔའ་བོ་མང་བོ་གང་སར་མངོན་ཞིང་། གང་སར་འཛུལ་ནས་སྤྱི་དོན་རྡོག་རྡོག་རེར་དགྱ་དངུལ་ཧ་ཅང་གོང་ཁེ་བོས་བཙོང་བཞིན་པ་མཐོང་བས། བློ་བདེ་བོ་རང་བྱུང་མ་སོང་། དེའི་ཕྱིར། ང་ཚོ་བསམ་ཡོད་ཚོས། དགྱ་ནད་ལ་གཟབ་གལ་ཆེ་ཡང་། དེ་བས་ཀྱང་རང་རེའི་སྤྱི་ཚོགས་གཏོར་བའི་དགྱ་དངུལ་གྱི་ནད་ཡམས་ལ་གཟབ་དགོས་པ་འདུག
ཨོ་གླིང་བ་མང་པོ་ཞིག་ནས་དགྱ་ནད་ཅེས་རྩོམ་མང་དག་ཞིག་སྤེལ་གནང་གི་འདུག ཡག་པོ་འདུག ང་རང་བོད་ཡིག་ཡག་པོ་མེད་ཀྱང་གནད་དོན་འགའ་ཤས་སུ་ལན་འདེབས་ཞུས་ནས་བོད་ཡིག་གང་ཤེས་དེ་བེད་སྤྱོད་ཞུ་སྐབས་ཤིག་ལེན། སྐབས་དོན་དུ་དགྱ་ནད་ལས་ཀྱང་འཇིགས་སུ་རུང་བ་ཞེས་པ་སོགས་ནས་དགྱ་ཟེར་པ་རྒྱ་དང་དེ་ཡང་རྒྱ་ནག་གམ་རྒྱ་དམར་ལ་ཟེར་བ་གོ་ཡི་འདུག སྤྱིར་ངོས་རང་དེབ་མང་པོ་ཀློག་མྱུང་ལ་དཔེ་ཆ་ཡང་མི་དམན་ཙམ་མཇལ་ཡིན་ཀྱང་དེང་དུས་བོད་ཡིག་མཁས་པའི་དེབ་ཕལ་ཆེར་ཀློག་མེད། ངས་མཇལ་བའི་ཕྱག་དཔེ་དང་དེབ་ནང་ China ཟེར་དུས་རྒྱ་འམ་རྒྱ་ནག་དང་ India ལ་རྒྱ་གར་ཅེས་ཆ་ཚང་འདྲི་ཡོང་། དེ་ན་ཁྱེད་རྣམ་པས་གང་གིས་ཕྱིར་དགྱ་ཞེས་རྒྱའི་ཚབ་བྲིས་སམ། རྒྱ་བྲིས་ན་སྐྱོན་ཇི་ཡོད་དམ། ངས་ཞུས་ན་དགྱ་ལས་རྒྱ་ཅེས་བྲིས་ན་བརྒྱ་ཆ་བརྒྱས་ཀློག་མ་ཉིད་དུ་གོ་དོན་རྟོགས་ཐུབ་ཀྱང་དགྱ་དངུལ་དང་དགྱ་ནད་ཅེས་བྲིས་ན་བརྒྱ་ཆ་ལྔ་བཅུ་ལས་མང་བའི་དོན་རྟོགས་རྒྱུ་དཀའ་བས་དགྱ་ལས་རྒྱ་ཅེས་བྲིས་ན་མི་ལེགས་སམ།།