རྐ་སྲས་ཀྱིས་བསྒྱུར།
ཉིན་ཞིག་གཞོན་ནུ་ཞིག་གིས་རང་གི་ཨ་ཕ་ལ་རང་ཉིད་ཀྱི་མི་ཚེའི་རིན་ཐང་ཅི་འདྲ་ཞིག་ཡིན་ནམ་ཞེས་དྲི་བ་དྲིས་པ་རེད།
དྲི་བར་ལན་འདེབ་རྒྱུའི་ཚབ་ཏུ་ཁོས་རང་གི་བུ་ལ “རྡོ་འདི་ཁྱེར་ནས་ཁྲོམ་ལ་བཙོང་དུ་སོང་། གལ་ཏེ་རིན་གོང་འདྲི་མཁན་བྱུང་ན། མཛུབ་མོ་གཉིས་སྟོན་ལ་སྐད་ཆ་གཞན་ཅི་ཡང་མ་ཤོད”་ཅེས་བཤད།
བུ་ཆུང་ཁྲོམ་དུ་སོང་ནས་བུད་མེད་ཅིག་དང་ཕྲད། “འདི་ལ་ག་ཚོད་རེད། རྡོ་འདི་ངས་རང་གི་ལྡུམ་རྭའི་ནང་དུ་འཇོག་ན་འདོད”་ཅེས་དྲིས། ཁོས་ཅི་ཡང་མ་བཤད་པར་མཛུབ་མོ་གཉིས་བསྟན་པས། བུད་མེད་དེས་“ཨ་སྒོར་གཉིས། ངས་རྡོ་འདི་ཉོ་རྒྱུ་ཡིན”་ཞེས་བཤད།
དེ་ནས་བུ་ཆུང་རང་ཁྱིམ་དུ་སོང་ནས། “ཨ་ཕ་བུད་མེད་ཅིག་གིས་རྡོ་འདི་ལ་ཨ་སྒོར་གཉིས་སྟེར་གྱི་འདུག”་ཅེས་བཤད། དེ་ནས་ “ཨ་ཕས་བུ་ཆུང་། ད་རྡོ་འདི་ཁྱེར་ནས་ཁྱོད་འགྲེམ་སྟོན་ཁང་ཞིག་ཏུ་སོང་། རིན་གོང་འདྲི་མཁན་བྱུང་ཚེ་སྔར་བཞིན་ཅི་ཡང་མ་བཤད་པར་མཛུབ་མོ་གཉིས་སྟོན་ཅིག”ཅེས་མངགས་བྱ་བྱས།
དེ་ནས་བུ་དེ་འགྲོམ་སྟོན་ཁང་དུ་སོང་བ་ན། སྐྱེས་པ་ཞིག་གིས་རྡོ་དེའི་གོང་ཚད་དྲིས། ཁོས་ཨ་ཕས་བཤད་པ་བཞིན་བྱས་པས། སྐྱེས་པ་དེས་ “ཨ་སྒོར་གཉིས་སྟོང་ཡིན་ནམ། ངས་ཉོ་རྒྱུ་ཡིན་”ཟེར། བུ་ཆུང་ཧང་སང་སྟེ་རང་ཁྱིམ་དུ་རྒྱུགས་ཕྱིན་ནས། “ཨ་ཕ་མི་ཞིག་གིས་རྡོ་འདི་ལ་ཨ་སྒོར་གཉིས་སྟོང་སྟེར་གྱི་འདུག”་ཅེས་བཤད།
ཡང་ཨ་ཕས་ “བུ་ཆུང་ད་ཆེས་མཐའ་མཇུག ཁྱོད་ཀྱིས་རྡོ་འདི་ཁྱེར་ནས་འགྲོ་དགོས་ས་ནི། རིན་པོ་ཆེ་ཚོང་ཁང་ཡིན། ཚིག་གཅིག་ཀྱང་མ་བཤད་པར་རྡོ་འདི་ཚོང་བདག་ལ་སྟོན་ཅིག ཁོས་རིན་གོང་དྲིས་ན། སྔར་བཞིན་མཛུབ་མོ་གཉིས་སྟོན་”ཞེས་ལམ་སྟོན་བྱས།
དེ་ནས་བུ་ཆུང་རིན་པོ་ཆེ་ཚོང་ཁང་ཞིག་ཏུ་སོང་ནས། ཚོང་བདག་ལ་རྡོ་བ་དེ་བསྟན་པས། ཚོང་བདག་གིས་ “ཁྱོད་ལ་འདི་གང་ནས་རག་བྱུང་། འདི་ནི་འཛམ་གླིང་ན་ཆེས་དཀོན་པའི་རིན་པོ་ཆེ་ཞིག་རེད། བདག་གིས་རྡོ་འདི་ངེས་པར་དུ་ཉོ་རྒྱུ་ཡིན། ཁྱོད་ཀྱིས་འདི་ག་ཚོད་ལ་བཙོང་རྒྱུ་ཡིན”་ཞེས་དྲིས་པས། བུ་ཆུང་གིས་མཛུབ་མོ་གཉིས་བསྟན་པ་ན། ཚོང་བདག་གིས་ “ངས་འདི་ལ་ཨ་སྒོར་སྟོང་ཕྲག་གཉིས་བརྒྱ་སྟེར་”ཞེས་བཤད།
བུ་ཆུང་གིས་ཅི་ཞིག་ཤོད་དགོས་པ་ཡང་མ་ཤེས་པར་ཁྱིམ་དུ་ལོག་ནས། “ཨ་ཕ་ཚོང་བདག་ཞིག་གིས་འདི་ལ་ཨ་སྒོར་སྟོང་ཕྲག་གཉིས་བརྒྱ་སྟེར་གྱི་འདུག་”ཅེས་བཤད་པ་ན། ཨ་ཕས་ “བུ་ཆུང་། ད་ལྟ་ཁྱོད་ཀྱིས་རང་གི་མི་ཚེའི་རིན་ཐང་རྟོགས་བྱུང་ངམ། ཁྱོད་རང་གང་ནས་ཡོང་བ་དང་། གང་ནས་སྐྱེས་པ། ཁྱོད་ཀྱི་པགས་པའི་མདོག ཁྱོད་རང་ཁྱིམ་ཚང་ཅི་ཙམ་ཕྱུག་པོ་ཞིག་ཏུ་སྐྱེས་མིན་སོགས་ནི་གནད་དོན་ཞིག་མ་རེད། ཆེས་གལ་ཆེ་བའི་གནད་འགག་ནི། ཁྱོད་ཀྱིས་རང་ཉིད་གནས་ཚད་ཅི་འདྲ་ཞིག་གི་སར་འཇོག་པ་དང་། རང་ཉིད་གྲོགས་ཅི་འདྲ་ཞིག་དང་འགྲོག་མིན། རང་ཉིད་ལ་ཅི་ལྟར་བདག་གཅེས་བྱེད་མིན་བཅས་ལ་ཐུག་ཡོད།
ཁྱོད་ཀྱིས་མི་ཚེ་ཧྲིལ་པོར་རང་ཉིད་ཨ་སྒོར་གཉིས་རི་བའི་རྡོ་བ་ཞིག་ཡིན་སྙམ་ནས་མི་ཚེ་སྐྱེལ་སྲིད་ལ། ཁྱོད་ཀྱི་རིན་ཐང་ཨ་སྒོར་གཉིས་ཙམ་དུ་མཐོང་བའི་གྲོགས་པོ་དང་འགྲོག་ཀྱང་སྲིད།
འོན་ཀྱང་། མི་ཚང་མའི་བརྒྱུད་ན་རྡོ་རྗེ་ཕམ་རེ་ཡོད་པ་ཡིན་པས། ང་ཚོ་རང་ཉིད་ཀྱི་རིན་ཐང་ཤེས་མཁན་དང་། ང་ཚོའི་རྒྱུད་ཀྱི་རྡོ་རྗེ་ཕ་ལམ་མཐོང་བའི་མི་དང་འགྲོག་དགོས།
ང་ཚོས་རང་ཉིད་ཁྲོམ་དུ་འཇོག་པའི་གདམ་ག་བྱེད་ཆོག་ལ། རང་ཉིད་རིན་པོ་ཆེ་ཚོང་ཁང་དུ་ཁྱེར་བའི་གདམ་གའང་བྱས་ཆོག
དེར་མ་ཟད། ང་ཚོས་རང་ཉིད་གཞན་གྱི་རིན་ཐང་མཐོང་ཐུབ་མཁན་ཞིག་ཀྱང་བྱས་ཆོག་ལ། མི་གཞན་ལ་ཁོ་ཚོའི་རྒྱུད་ཀྱི་རྡོ་རྗེ་ཕམ་ལམ་མཐོང་དུ་བཅུག་ནའང་འཐུས།
གང་ལྟར། རང་ཉིད་ཀྱི་འཁོར་ཡུག་ཅི་འདྲ་ཞིག་འདེམ་པའི་གདམ་ག་བྱེད་མཁས་པ་བྱོས། གནད་དོན་འདིས་ཁྱོད་ཀྱི་མི་ཚེ་ཧྲིལ་པོར་ཁྱད་པར་ཆེན་པོ་བཟོ་བ་ཡིན་ཞེས་བཤད་པ་རེད།
13/5/2020
རྐ་སྲས་ཡིན་ནམ་ཁ་སྲས་ཡིན། འདི་མྱི་དམྱལ་བ་རེད་ཡ། འདིས་མཚམས་མཚམས་རྩོམ་ཡིག་ཡག་པ་རེ་བསྒྱུར་ནས་ངའི་ཀླད་པ་ལ་བྱི་དོར་རེ་བྱེད་ཀི། དམྱལ་བ་བོ། རྗེས་མ་མུ་མཐུད་དུ་ཡིན་ད། འདི་མོ་འདི་བསྒྱུར་དགོས་ནི་རེད་ཡ། རང་ཚོད་ཚོད་མེད་ར། སྙན་ངག་ཡིན་ན་གཅིག་ཡིན་ལབ་ནས་བཀླགས་ན་གོ་རྒྱུ་མེད་ནོ་དེ་མོ་དེ་བྲིས་ནས་ཅི་བྱའམ།