ཧོར་གཙང་འཇིགས་མེད།
ཉིན་ཁ་ཤས་ཀྱི་གོང་ལ་མི་གླེང་མཐུ་མེད་ཀྱི་དོན་གནད་གཉིས་ཞེས་པའི་བསམ་ཚུལ་རྩོམ་ཐུང་ཞིག་བྲིས་ཏེ་བོད་ཀྱི་དུས་བབ་ཚང་ལ་བཏང་བ་ཡིན་ཀྱང་། དེ་རིང་འདིར་ཁ་བརྡ་དྲ་ཐོག་ཏུ་བརྒྱུད་འགོད་བྱས་འདུག་པ་མ་ཟད། རྣམ་དཔྱོད་ལྡན་པ་མང་བོ་ཞིག་གིས་ལེགས་ཉེས་ཀྱི་གདེང་འཇོག་ཀྱང་གནང་འདུག་པ་ལ་དགའ་སྤྲོ་སྐྱེས། ཁྱད་པར་དུ་གཞུང་དྲང་རིག་པ་སྨྲ་བ་མདའ་ཚན་པ་ལྟ་བུ། ཕྱི་ནང་གི་གཞུང་ལུགས་ལ་ལྟ་རྒྱ་ཆེ་བ་རྔ་བ་རྒྱལ་ཁམས་པ་ལྟ་བུ། རྩོམ་པ་བོ་གྲགས་ཅན་ཀླུ་སྨྱོན་ཡེ་ཤེས་ལྟ་བུ། གཞོན་སྐྱེས་ཤེས་ལྡན་པ་རིག་འབྱུང་དོན་བཀྲ་སོགས་ཀྱིས་དོ་སྣང་ཞིབ་ཚགས་དང་དགོངས་ཚུལ་ལྷུག་པོ་གསུངས་པ་ལ་བརྩི་བཀུར་ཡོད། དེ་མིན་ཀུན་སློང་དང་སྐད་ཆ་དཀྱོགས་ནས་བཤད་མཁན་རིགས་ལ་གསལ་བཤད་བྱེད་གལ་མ་མཐོང་།
མདའ་ཚན་པའི་སྐད་ཆ་ཁག་ཅིག་གནད་འགག་གི་སྐད་ཆ་རེད། ངས་ཀྱང་སྔོན་ཆད་རྒྱ་གར་གྱི་ཤེས་ཡོན་ཅན་དང་། ཆབ་སྲིད་པ་རེ་ཟུང་དང་མཉམ་དུ་དེའི་སྐོར་ལ་གླེང་མོལ་བྱེད་མྱོང་ཡོད། ཁོང་ཚོ་མང་ཤོས་ཀྱིས་རྒྱ་གར་ནག་གི་གནད་དོན་ཐག་གཅོད་པ་ལ་བོད་དོན་གལ་ཆེན་ཡིན་པའི་བསམ་ཚུལ་འདུག ངས་དེ་མ་ཤེས་པ་མིན་ཀྱང་། རང་ཉིད་ཀྱང་བོད་མི་ཐེབས་ཆག་ཅིག་ཡིན་པའི་ཆ་ནས་སྤྱི་དོན་ཐོག་སེམས་ཁྲལ་མང་བོ་ཡོང་གིན་འདུག་ཅིང་། སེམས་ཁྲལ་ཁག་ཅིག་བཤད་ཁུལ་བྱས་པ་ཡིན།