རང་རེའི་ཆོས་འབྱུང་དང་ལོ་རྒྱུས་ཁག་ཅིག་ཏུ་ཡོངས་སུ་གྲགས་པའི་མི་ཡུལ་གྱི་དག་ཞིང་ཁག་ཅིག་ཡོད་པ་ནི་ཤམྦྷ་ལ་དང་ཟངས་མདོག་དཔལ་གྱི་རི་བོ། པོ་ཊ་ལ་གསུམ་རེད་ལ། རྐང་མགྱོགས་གྲུབ་པའི་མི་བུ་རེ་ཟུང་དེ་རུ་སོང་བའི་ལོ་རྒྱུས་ཀྱང་ཡོད་འདུག་པས། དེར་བགྲོད་པ་ལ་རྫུ་འཕྲུལ་གྱི་ནུས་པ་གཞན་དག་མི་དགོས་པར་རྐང་བ་མགྱོགས་པོ་ཞིག་ཡོད་ན་འགྲིགས་པ་འདྲ་ཞིག་འདུག དེས་ན་གནས་དེ་དག་རྒྱ་གར་དང་བོད་ནས་ཐག་ཅུང་རིང་ས་ཞིག་ཏུ་ཡོད་པ་ལས་དེར་ནམ་ཡང་བསླེབས་རྒྱུ་མེད་པ་ཞིག་ཡིན་ཚོད་མི་འདུག ཡིན་ན་ཡང་། དེང་སྐབས་ཚན་རིག་འཕྲུལ་ཆས་ཀྱིས་ས་སྟེང་ས་འོག་གི་གསང་བ་ལྐོག་གྱུར་གྱི་བྱ་དངོས་གང་མང་ཞིག་གི་གསང་བ་རྗེན་པར་སྟོན་བཞིན་པའི་དུས་སུ། ང་ཚོའི་གནའ་སྔ་མོའི་འགྲོ་བ་མི་རྐང་མགྱོགས་ཅན་ཚོ་སླེབས་ཐུབ་ས་དེར་དེང་སྐབས་ནམ་ཡང་སླེབས་རྒྱུ་དང་རྙེད་རྒྱུ་མེད་པ་ཞིག་ཆགས་སོང་བ་རེད་དམ། ལམྦྷ་ལ་རུ་སྟོན་པས་དུས་འཁོར་གསུངས་དུས་རྒྱལ་བོ་ཟླ་བཟང་གིས་ཚངས་པར་སྐྱབས་སུ་འགྲོ་བའི་མུ་སྟེགས་པའི་སློབ་དཔོན་ཁྲི་ཕྲག་ཁ་ཤས་ཤིག་ལ་སྟོན་པའི་བཀའ་ཆོས་ལ་ཉན་རྩིས་ཡིན་ན་གནས་འདིར་སྡོད། དེ་མིན་འདི་ནས་བུད་དེ་རྒྱ་གར་དུ་རྒྱུགས་གསུངས་འདུག་པས། ཤམྦྷ་ལ་ཡང་རྒྱ་གར་བྱང་རྒྱུད་ཅིག་ཏུ་ཡོད་པ་འདྲ་ཞིག་འདུག་ལ། དེ་རུ་འགྲོ་བ་མི་དག་གིས་རྒྱ་གར་དུ་རྒྱུ་འགྲུལ་བྱེད་བཞིན་པ་ཡང་གསལ་སྟོན་བྱས་འདུག ཡིན་ན་ཡང་འཇམ་དབྱངས་བཞད་པ་སྐུ་ཕྲེང་གསུམ་པ་འཇིགས་མེད་རྒྱ་མཚོའི་རྣམ་ཐར་དུ་ཁོང་གིས་ནམ་མཁའ་རུ་ཤམྦྷ་ལའི་ཞིང་ཁམས་གཟིགས་ཏེ་ཞབས་ཞུ་བ་ཞིག་ལ་བསྟན་ཚུལ་ཡང་འདུག དེ་བཞིན་གུ་རུ་རིན་པོ་ཆེ་བོད་ནས་ཐད་ཀར་ཟངས་གླིང་གི་ཡུལ་ཏེ་དེང་སྐབས་ཀྱི་ཤྲི་ལིངྐའི་ཡུལ་དུ་འགྲོ་བ་མིའི་ཤ་ཁྲག་ལ་རྔམས་པའི་སྲིན་མོ་དག་འདུལ་བའི་ཆེད་དུ་ཕེབས་པ་ཞིག་ཡིན་ཚུལ་ཡོངས་གྲགས་ཡིན་པས། ད་ལྟ་ད་དུང་སྲིན་མོ་དེ་དག་གི་བུ་རབས་ཚ་རྒྱུད་རེ་ཡོད་དམ་མེད།…

དེ་ལས་མང་བ་། “དག་ཞིང་དང་དོགས་སློང་།” »

ཆོས་མངོན་པ་ལས་གསུངས་པའི་ས་སྟེང་གི་རི་ཡི་རྒྱལ་བོ་རི་རབ་དང་ས་འོག་གི་དབང་ཆེན་གསེར་གྱི་ས་གཞི་གཉིས་ཚན་རིག་གི་གྲུབ་དོན་དང་རྙེད་དོན་དུ་གྱུར་ཡོད་མེད་ཐད་བསམ་གཞིག་མི་བྱེད་ཀ་མེད་རེད་ཡ། རྒྱུ་མཚན་ནི་རྒྱ་གར་ལྷོ་ཕྱོགས་ཀྱི་གྲྭ་ས་ཁག་ཏུ་འདིའི་དོན་ལ་ཡང་ལོ་གསུམ་བཞིའི་ཚ་བའི་ནང་གི་ཆོས་རྩོད་རྒྱག་གིན་ཡོད་པ་རེད། གོང་ས་མཆོག་གིས་ཀྱང་མངོན་པ་མཛོད་ཀྱི་ནང་ན་ནང་པའི་ལམ་དང་དེའི་འབྲས་བུའི་རྣམ་གཞག་མ་གཏོགས་གཞིའི་གནས་སྐབས་སུ་སློབ་དཔོན་དབྱིག་གཉེན་གྱིས་འདི་འདྲ་ཞིག་མ་གསུངས་ན་དེ་འདྲ་ཞིག་ཀྱང་མ་གསུངས་ན་དྲག་ག་བསམ་པ་མང་པོ་ཞིག་འདུག་ཅེས་གསུང་ཟབ་ལན་མང་ཕེབས་འདུག དེ་བཞིན་མངོན་པ་མཛོད་ཀྱི་འཛམ་གླིང་དེ་ས་གཞི་རིལ་བོ་འདི་རེད་དམ་ཡང་ན་ས་གཞི་འདིའི་ཆ་ཤས་ཤིག་རེད། དགེ་ཆོས་ཀྱིས་གླིང་བཞི་ཀ་རྒྱ་གར་ནས་རྙེད་པ་དེ་ལ་འགྲེལ་བཤད་ཅིག་ཡོད་དམ། དེ་རིང་ང་ཚོའི་འདི་ན་ཨ་རི་བ་བོད་པའི་ནང་ཆོས་ཀྱི་འབུམ་རམས་པའི་ལག་ཁྱེར་ཡོད་པ་ཞིག་གིས་བོད་བརྒྱུད་ནང་བསྟན་གྱི་སྟོང་ཁམས་དང་གོ་ལའི་རྣམ་གཞག་ཆལ་ལེ་ཆོལ་ལེ་ཞིག་བཤད་ཀྱིན་འདུག་པར་ངས་ཟུར་ཉན་ཞིག་བྱས་པ་ཡིན་ཏེ། མགོ་སེར་ནང་པའི་འབུམ་རམས་པ་འདི་ལས་ང་ཚོའི་མཛོད་འཛིན་གྲྭའི་སློབ་གཉེར་བ་ཡག་པོ་ཞིག་གི་ཤེས་ཚད་ངོ་མ་དོན་དང་ལྡན་པ་ཞིག་འདུག་ཨང་བསམས་བྱུང་། ངན་པ་མ་རིག་ན་བཟང་པོ་མི་དྲན་ཞེས་པ་དེ་མི་ང་འདྲ་ལ་བཤད་པ་འདྲ།

གལ་སྲིད་ལྷོ་ཕྱོགས་ཀྱི་གྲྭ་སར་སྡོད་མྱོང་མཁན་དང་དེར་ལྟ་སྐོར་བྱེད་མྱོང་མཁན་ཞིག་ཡིན་ན། ཁང་ཚན་རེ་རེའི་སྒོ་འགྲམ་དུ་རྒན་གཞོན་བར་མའི་གྲྭ་པ་དག་གིས་འཚང་ཁ་ཤིག་ཤིག་གིས་བོད་ཀྱི་དུས་བབ་དང་ཤེས་བྱ་སོགས་ཚགས་དེབ་དག་ལ་ལྟ་བཞིན་ཡོད་པ་དེ་ནི་གཡོལ་ཐབས་མེད་པའི་དོན་དངོས་ཤིག་རེད་ལ། དེས་ཅི་ཞིག་མཚོན་བཞིན་པ་དང་གང་ཞིག་སྟོན་བཞིན་ཡོད་པ་རེད་ཅེ་ན། དུས་རབས་ཉེར་གཅིག་པའི་གྲྭ་པའི་སྤྱི་ཚོགས་འདི་ནི་ལོ་ངོ་ཉིས་སྟོང་སྔོན་གྱི་རྒྱ་གར་དང་བརྒྱ་ཕྲག་འགའི་སྔོན་གྱི་བོད་པའི་སྤྱི་ཚོགས་ཧ་ཅང་གུ་དོག་པོ་དེའི་འཆིང་རྒྱ་ལས་རིང་དུ་བྲལ་ཟིན་ནས། ད་ལྟའི་འཛམ་གླིང་གསར་པ་འདིའི་མི་གྲལ་དུ་ཚུད་པ་དང་འཚུད་རྒྱུ་དེ་ནི་སུས་ཀྱང་གཡོལ་ཐབས་མེད་པའི་ལོ་རྒྱུས་ཀྱི་འཕེལ་རིམ་ཞིག་ཡིན་པ་དེ་ཡིན་ཞིང་། དེ་བཞིན་གྲྭ་ཤག་མང་པོ་ཞིག་གི་སྒེའུ་ཁུང་ལས་སྒྲ་སྡུད་འཁོར་ལོའི་གློག་གི་རྦ་རླབས་ཀྱིས་ལེ་དབར་ཁྲི་ཕྲག་གི་ཕ་རོལ་ནས་བསྒྲགས་པའི་ཨ་རིའི་རླུང་འཕྲིན་དང་ཨེ་ཤི་ཡའི་རང་དབང་རླུང་འཕྲིན་གཉིས་ཀྱི་གསར་འགྱུར་སྣ་ཚོགས་གླིང་ལྔ་མཚོ་བཞིའི་མཁའ་དབྱིངས་བརྒྱུད་དེ་ཡུལ་གྱར་བ་འདི་ཚོའི་ཉིན་རེའི་འཚོ་བའི་གྲུབ་ཆ་གལ་ཆེན་ཞིག་ཏུ་བསྒྱུར་དང་སྒྱུར་བཞིན་པའི་རྣམ་པ་དེ་མཐོང་ཐུབ། དེ་བཞིན་སངས་རྒྱས་ཀྱི་ཆོག་མཆན་ཡིག་ཆ་སྟོན་རྒྱུ་མེད་པའི་དགོན་པ་རེ་རེའི་འཚོ་རྟེན་དུ་གྱུར་པའི་ཚོང་ཁང་དང་མགྲོན་ཁང་། ཟ་ཁང་དང་དྲ་ཁང་སོགས་དེང་རབས་འཛམ་གླིང་གི་སྤྱི་འབངས་སུས་ཀྱང་ལོངས་སུ་སྤྱོད་ཐུབ་པ་མང་པོ་ཞིག་དུས་རབས་གསར་པའི་གྲྭ་པ་དག་གིས་ཀྱང་ལོངས་སུ་སྤྱོད་བཞིན་པ་དེ་མིག་ལམ་དུ་ཤར་ཡོང་གི་རེད། འདི་ལྟ་བུའི་འཚོ་གནས་ཀྱི་ཆེད་དུ་ནང་འདྲེན་བྱས་པའི་བྱ་དངོས་གསར་པ་རེ་རེ་བཞིན་རྒྱ་མཚོའི་རྦ་རླབས་བཞིན་གཅིག་རྗེས་གཅིག་གིས་དེད་ནས་ཡོང་བའི་དེ་རིང་། ད་དུང་ཁྱིམ་པ་སུན་འབྱིན་ལ་ཁ་གཡར་ནས་གློག་ཀླད་དང་ཁ་པར་གཏན་འགོག་བྱེད་བཞིན་པ་དེ་ནི། ཁྱིམ་པ་སུན་འབྱིན་གྱི་བྱ་སྤྱོད་ངོ་མ་དེ་ངོས་མ་ཟིན་པའི་སྣང་ཚུལ་ཞིག་ཏུ་ཟད་དེ། རྒྱ་གར་ལྷོ་ཕྱོགས་ལྟ་བུར་མཚོན་ན་རྒྱ་གར་རྒྱལ་ཡོངས་ནས་གནས་སྡོད་ཡུལ་མིའི་དཔལ་འབྱོར་ཧ་ཅང་སྐྱོ་བའི་ཡུལ་གྲུ་ཞིག་ཡིན་པས། ཡུལ་འདི་ནས་དགོན་པ་གྲྭ་ཚང་ཁག་ཅིག་གི་ཕྱག་མཛོད་ཚོས་ཕན་ཚུན་འགྲན་བསྡུར་གྱིས་གཙུག་ལག་ཁང་རྒྱལ་པོའི་ཕོ་བྲང་ལྟ་བུ་རེ་བཞེངས་དང་བཞེང་བཞིན་པ་འདི་ནི་ས་གནས་ཡུལ་མིའི་སྣང་ངོར་ཁྱིམ་པ་སུན་འབྱིན་གྱི་ལས་ངོ་མ་ཞིག་དང་། གོང་ས་མཆོག་གིས་དགོན་པའི་འདུ་ཁང་འགྲན་བསྡུར་ལས་གྲྭ་རྐྱང་ཚོའི་འཚོ་བ་དང་འཕྲོད་བསྟེན་གྱི་གནས་སྟངས་ཡར་རྒྱས་སུ་བཏང་ན་ལེགས་པར་གཟིགས་པའི་བཀའ་སློབ་དག་ཆུ་ནང་ལ་དབྱུགས་པའི་རྟགས་མཚན་ཞིག་མ་རེད་དམ། གལ་སྲིད་གློག་ཀླད་དང་ཁ་པར་བཟུང་མི་ཆོག་ན་དབྱིན་ཡིག་ཀྱང་བསླབ་ན་ག་ལ་འགྲིག་སྟེ་དེ་དག་ནི་ཕྱི་རྒྱལ་གྱི་རིག་གཞུང་གི་རྒྱུད་སྐུད་གཅིག་གི་སྟེང་དུ་གནས་པས་སོ།།…

དེ་ལས་མང་བ་། “དུས་རབས་ཉེར་གཅིག་པའི་གྲྭ་ས།” »