རྩོམ་པ་པོ– རྔ་བ་ཀུན་བཟང་།
དེ་རིང་ང་ཕུགས་འདུན་གྱི་གཤོག་པ་རིང་དུ་བརྐྱང་སའི་རི་མགོ་ཞིག་ན་ཡོད། རི་མགོ་གན་ནས་མར་བལྟས་ན། ཆུའི་ཕར་ཁ་ན་བྱ་རྒོད་གཤོག་པ་ཅན་རྫོགས་མེད་ཞིག་མཐོང་། དེའི་གཡས་ཕྱོགས་ན་སེམས་ཀྱི་སྲོག་ཤིང་ཁྱོད་ལྟ་བུར་བྱ་ཁྲུང་ཁྲུང་སྐེ་ནག་ཞིག་གཉིད་ལ་ཤོར། ཟར་མའི་མེ་ཏོག་འདྲ་བའི་མིག་གཉིས་ཀྱིས་སུ་ལ་ལྟ་བཞིན་ཡོད་དམ།
རེད་མོད། ནགས་ལུང་དེའི་ནང་ལ་སུ་ཡོད་མེད་དང་། ས་བདག་སུ་དང་སུ་ཞིག་ཡིན་མིན་ངས་གནམ་དཀར་ཚད་བསམ་བློ་གཏོང་ཡང་ཡིད་ལ་མི་འཁོར། མ་གཉིད་རྨི་ལམ་གྱི་སྐད་ཆ་ཞིག་བཤད་ན། ལུང་བ་འདི་སྒོམ་གྲུབ་པ་ཞིག་དང་ཡང་མིན་ན་བླ་མ་ཞིག་འཚམས་ཁང་ཡིན་ན་སྐྱིད་ག། འཛུམ་མདངས་སོ་དཀར་བསྟན་ནས་ཚེ་གཅིག་ཁྲུང་ཁྲུང་སྐེ་ནག་ཡོད་སའི་མཁར་སྐོར་ནས་གཉིད་ལ་ཤོར་ཡང་། རྒྱབ་ཀྱི་ཀླུ་བདུད་བཙན་པོ་དང་མདུན་གྱི་བྲག་དང་རླུང་པོ་བསྡེབས་ཡོང་བའི་འཇིགས་སྣང་མེད།
