གཡུ་དྲུག་དཀར། རྡ་ས།
ང་ས་མཐའ་ནས་ལག་ཆགས་ཤིང་། ངས་ས་མཐའ་ནས་བསམ་ཤེས། མདོར་བསྡུས་ན། ང་ས་མཐའ་ནས་མི་རུ་གྱུར་ལ། ས་མཐའ་ནས་རང་ཉིད་མི་ཞིག་ཏུ་སད་རྟོགས་བྱུང་བ་ནས། ངས་རང་གི་ངོ་གདོང་སྐྱ་བོ་འདི་ལ་ལྟོས་ཀྱིན་ལྟོས་ཀྱིན། ངས་སྐྱོ་སྡུག་གིས་ཁེངས་བའི་རང་གི་སེམས་པ་འདི་ལ་ཉན་གྱིན་ཉན་གྱིན། ཡིད་ཚིམ་འགྲོ་བ་དང་། སེམས་བདེ་འགྲོ་བ་ཞིག་གཏན་ནས་མི་འདུག་མོད། ཕྱིར་འདང་རེ་བརྒྱབས་ན། ས་མཐའ་འདི་ནས། གཅེས་པའི་ཕ་ཡུལ་དང་ཕ་མ། ཆུང་དུས་ཀྱི་ཕ་ཡུལ་གྱི་འཚོ་བ་དང་བརྩེ་སེམས་སོགས་ནི། ད་ནི་རྨི་ལམ་ལྟ་བུ་ཞིག་གམ། ངས་རང་གི་སྐྱེ་བ་སྔོན་མ་དྲན་པ་ལྟ་བུ་ཞིག་ལས་ཅི།
