བོད། ལྷ་ཀླུ་གཉན་གསུམ།
ཀ་དག་སྤྲོས་བྲལ་ཟེར་ནས་ཀློག་འདོན་ལ་བྲེལ་བའི།།
ཁ་བའི་རིགས་ཀྱི་དམར་བོའི་སྡེ་དག་ནས་བརྩམས་དེ།།
ག་ལེར་ན་ནིང་ནས་བཟུང་མི་རིགས་ཀྱི་དོན་དུ།།
ང་འོ་སྙམ་པའི་བློ་རྒྱ་བསྐྱེད་པ་དེ་བསྟོད་དོ།།
ཅ་རིལ་རྐང་གཅིག་ལྟ་བའི་ཕྱི་བསྡོད་ཀྱི་ང་ཚོ།།
ཆ་ལུགས་ཀུན་ལ་འདྲིས་ཤིང་རང་གཤིས་དེ་བོར་ནས།།
ཇ་ཁ་ཆང་ཁ་ཙམ་ལ་མགོ་བོ་འདི་རྨོངས་དེ།།
ཉ་རྙོག་གཏམ་ལ་འཚུད་པ་ཡིད་སེམས་དེ་སྐྱོ་བ།།
བོད། ལྷ་ཀླུ་གཉན་གསུམ།
བྲིས་པའི་ཡི་གེར་ཡིད་ཆེས་བཅོལ་ཉིན་ནས།།
གློག་གི་གྲོང་ཚོའི་སྐུ་མགྲོན་ཆགས་ཉིན་ནས།།
སྟོང་བསམ་མོད་པོའི་ལམ་འགྲོ་བུ་ཆུང་ང་།།
ཤོག་བུའི་ཁུགས་ཀྱི་མེ་ཕུང་དམར་པོ་རེད།།
བསྲེགས་པར་སླ་བའི་སྣང་ཚུལ་ཚུགས་མེད་ཅིག།
བརྟན་པོར་མི་བསྡོད་ཡིད་ཀྱི་ཐོན་རྫས་ཤིག།
ལྷུང་བའི་རྐང་སྣེ་ཐོག་པའི་སྔ་གཞུག་ན།།
ང་ཡི་རང་ཉིད་བོར་བའི་ཚན་པ་ཞིག།
བོད ལྷ་ཀླུ་གཉན་གསུམ། གངས་ཀྱི་ལྷ་སྐལ་མི་ཡི་གཟུགས་འཛིན་པ།། སྙིང་རྗེ་བདག་པོ་འཕགས་མཆོག་པད་དཀར་འཛིན།། སྐྱེ་འགྲོའི་དོན་དུ་རང་ཡུལ་རྒྱང་སྐྱུར་ནས།། མི་ལོ་ལྔ་བཅུར་ས་མཐར་ཁག་སོང་ངམ།། ས་ཡ་དྲུག་གི་འབྲེལ་ཐག་ཡིད་བཞིན་ནོར།། ཆོལ་གསུམ་སྤུན་ཟླའི་བྲང་གི་སྙིང་གཅིག་བུ།། ཚེ་ལོ་དོན་ལྔར་བོད་དོན་བྱས་བྱས་དེ།། ཤ་ཡི་གཟུགས་ལ་དཀའ་ལས་ཨེ་བྱུང་ངམ།། ཐུབ་པའི་རྗེས་མཇུག་དགེ་སློང་སྙོམ་ཆུང་ཉིད།། བསྟན་པའི་བདག་པོ་བསྟན་འཛིན་རྒྱ་མཚོ་མཆོག། རྒྱུས་མེད་རྒྱལ་ཁམས་གྲངས་མེད་འགྲིམ་འགྲིམ་ནས།། ཐུགས་བྲེལ་སྐུ་ངལ་མང་བོས་ཁག་སོང་ངམ།། བྱམས་པའི་སེམས་ལ་རིགས་ཀྱི་ཞེན་པ་ཅན།།…
རྟ་ནག་སྐལ་བཟང་ལུང་རིགས།
བསམ་བློའི་གསེར་ཐག་རིང་མོ་ལྕགས་དང་ཐོ་བས་བརྡུངས་ན།།
བདེན་པའི་མྱི་སྐད་གཤའ་མ་གྱོད་དང་ཁ་མཆུས་གཏུགས་ན།།
རང་དབང་སྐྱིད་པའི་སྒོ་མོ་མཚོན་དང་དམག་གིས་བསྐོར་ན།།
མ་བསྙེངས་གངས་རིའི་འབྲོང་རྒོད་བདེན་པ་རྭ་རྩེར་བསྐྱོན་ན།།
བཙན་པོའི་སྙིང་སྟོབས་སད་པའི་རྟེན་འབྲེལ་ཨེ་ཡིན་བསམས་ནས།།
སྙིང་ཆུང་རྟེའུ་འདྲ་བོ་དགའ་བའི་མཆོང་རྕེད་བྱེད་གི།
ས་ཆེན་སྤར་མོས་བཙིར་བའི་དཔའ་སྙིང་ལུ་གུ་ལྡིང་ལྡིང་།།
བདེན་པ་སྲོག་གིས་བསྐྱོར་བའི་སྙིང་སྟོབས་སེང་གེ་འགྱིང་འགྱིང་།།
ཁྲི་མུན་དམྱལ་ཁམས་གཏོར་བའི་སྟོབས་ཤུགས་སྟག་མོ་མཆོང་མཆོང་།།
ནག་ཕྱོགས་གཡུལ་ལས་རྒྱལ་བའི་སྙན་པ་རྫ་རྔ་རྡུང་རྡུང་།།
བལྟས་ན་མེད་མེད་འདྲ་བའི་བདེན་པའི་རྒྱབ་དཔུང་མཐོན་པོ།།
བརྟགས་ན་ཡོད་ཡོད་འདྲ་འདིས་སེམས་པ་དགུང་ལ་སྤུར་ཐལ།།
(ཞོགས་དུང་གློད་ཙམ་གྱི་གཏམ་བཟང་རྣ་བར་སོན་རྗེས་ཀྱི་ཚོར་བའི་འཕྱུར་སྟངས་ཤིག)
བོན་རྒྱ་བསྟན་འཛིན་རབ་རྒྱས།
ཕྱག་སྟོང་སྤྱན་སྟོང་གོ་དེ་རིང་མཉམ་དུ་བརྡབ་ཞོག།
ཕྱག་མཚན་མེ་ཏོག་དེ་དེ་རིང་མཉམ་དུ་ཁུར་ཞོག།
སྲིད་པ་སྐས་དྲུག་གི་སྲས་མཆོག་རུས་པ་ཅན་པོ།།
སྲིན་པོ་བཙན་རྫོང་ནས་ཐར་ཏེ་དེ་རིང་ཐོན་ཡོད།།
སྲིད་པའི་ལྷ་རྒན་དེ་རྨ་ཆེན་སྦོམ་ར་ཕེབས་ཤོགས། །
སྔོན་ཚེ་ཙོང་ཁ་བའི་རྗེས་སུ་དབུས་ལ་སོང་ཚོད། །
ཁ་སང་ཞོགས་དུང་གི་རྗེས་སུ་བཙོན་ལ་སོང་ངེས། །
སྤྲུལ་བའི་སྐྱེས་ལྷ་ཁྱོད་དམིགས་བསལ་དཔལ་དར་ཡོད་དོ།།
མངའ་རིས་སྐོར་གསུམ་ནས་སྐོར་བྲོ་ཤུགས་ཀྱིས་མཆོང་ཤིགས། །
དབུ་གཙང་རུ་བཞི་ནས་སུག་བཞི་བྲོ་ལ་རོལ་ཞོག །
མདོ་ཁམས་སྒང་དྲུག་ནས་རྒྱུད་དྲུག་སྟོབས་ཀྱིས་བརྡུང་ཞོག །
དེ་རིང་ང་རྒྱལ་གྱི་དབུ་འཕང་དགུང་ལ་ཟུག་ཡོད། །
དེ་ལས་མང་བ་། “དཔའ་བོ་ཞོགས་དུང་ལ་ཕུལ་བའི་འབེལ་རྩོམ་བཀྲ་ཤིས་དགུ་འཕྱུར།” »
དགའ་དགའ།
རྡ་སའི་སྨུག་སྤྲིན་གྱི་གསེང་ན། །
མཆིན་པ་སེམས་པ་ལ་འབྱར་བའི། །
སྙན་ངག་ལྕགས་མདོག་དེའི་ཕག་ན། །
གཟི་བརྗིད་འོད་གོར་གྱིས་བསྒྲིབས་པའི། །
མཐོང་ན་མི་དགའ་ནི་མེད་པ། །
ཐོས་ན་འཛུམ་དགོད་ནི་རང་འཆོར། །
དེ་ལས་མང་བ་། “རྡ་རམ་ས་ལའི་སྨུག་སྤྲིན་གྱི་གསེང་ནས་ གྲོགས་པོ་བོན་རྒྱ་བ་འཚོལ་བ།” »
སེང་རྡོར།
མུན་ཁང་ཕུ་མེད་དེ་ལ་ད་གདོད་སེར་ཁ་ཕྱེ་སོང་། །
མི་བོའི་ལྕགས་སྒྲོག་ཁོལ་མ་སྐད་ཅིག་རང་སར་ཁྲུལ་བྱུང་། །
སྣ་མགོའི་ཤེལ་མིག་འོད་ཀྱིས་ཡང་བསྐྱར་གངས་ལ་གཟིགས་སོང་། །
ཤེལ་མིག་ཆག་ཀྲུམ་མེད་པར་ཡང་བསྐྱར་བོད་ལ་གཟིགས་སོང་། །
ཤེས་པ་གསལ་ཞིང་ཨེ་དྭངས་བོད་ཀྱི་གོམ་ཞེང་ཆེན་པོ། །
ལུས་པོ་ངལ་ཞིང་ཨེ་ཆད་བོད་ཀྱི་ཕྲག་ཞེང་ཆེན་པོ། །
གནམ་སའི་མཚམས་ནས་ལོག་པའི་བོད་ཀྱི་གྲིབ་མ་རིང་པོ། །
ཁ་ཏ་ཚིག་གསུམ་གློད་དང་བོད་ཀྱི་གསེར་ལྕེ་རིང་པོ། །
ནས་ཆང་ཕོར་གང་མཆོད་ཏེ་སྙིང་གི་ཚ་བ་ཕྱུངས་དང་། །
བྱ་རྨྱང་ལན་གསུམ་གྱིས་ཏེ་རུས་པའི་སྦྲིད་བག་སེལ་དང་། །
ཁྱེད་ལ་སེམས་ཀྱི་ཁོང་ནས་དར་དཀར་ཟམ་པ་རྐྱོང་ངོ་། །
ཁྱེད་ལ་སྙིང་གི་སྦུབས་སུ་ཟ་འོག་གདན་ཁྲི་རྒྱག་གོ །
བོད ལྷ་ཀླུ་གཉན་གསུམ།
རང་བཙན་བརྩད་དེ་རྩ་བར་མ་ཐུག་ཅིང་།།
དབུ་མར་ཕྱོགས་ནས་ལས་དོན་མ་སྒྲུབ་པར།།
རང་ཐག་རང་གཅོད་མ་བྱས་ལྷོད་ལྷོད་བསྡད།།
བོད་པ་ང་ཚོའི་རིགས་འདི་སྙིང་རེ་རྗེ།།
གཅིག་གིས་བྱས་པར་གཅིག་གིས་འཕྱ་ཞིང་དམོད།།
གཞན་གྱིས་བྱས་ན་ཕྲག་དོག་མེ་ལྕེ་འབར།།
ཕར་ཚུར་གཉིས་ཀའི་བྱ་བ་མི་འཇོན་པའི།།
བོད་པ་ང་ཚོའི་རིགས་འདི་སྙིང་རེ་རྗེ།།
(1455-1529)
ཀླུ་སྨྱོན་ཧེ་རུ་ཀ
འབྲུག་ཡུལ་གྱི་ཡུ་མོ་ཚོའི་ཕྱི་ལུས་པོར་ཤ་ཤེད་དང་གཟི་འོད་རྒྱས་ཤིང་།
ནང་སེམས་ལ་ཆགས་པའི་རྦ་རླབས་འཕྱུར་བའི་དབྱར་གཞུང་ཞིག་ལ།
ཁ་བ་རི་བའི་རྔོན་པ་ཁེར་འཁྱར་ཞིག་སྟེ།
འབྲུག་སྨྱོན་ཀུན་དགའ་ལེགས་པ་ཁོང་གིས།
འཕངས་ན་ཕོག་པས་ཁྱབ་པ་དང་།
ཕོག་ན་འཆི་བས་ཁྱབ་པ།
ཤི་ན་མཐོ་རིས་སུ་འགྲོ་བས་ཁྱབ་པ་སྟེ།
ཁྱབ་པ་གསུམ་ལྡན་གྱི་ལིང་གའི་ལྕགས་མདའ་ཞིག་ཁུར་ནས་སྦས་ཡུལ་འདིར་བསླེབས་སོང་།
བོད ལྷ་ཀླུ་གཉན་གསུམ།
བལྟས་བལྟས་དུས ད་གཟོད་ཤུན་པགས་ཤིག་རེད
ཡིན་ཡང་ དེ་ལ་གཅེས་པའི་སྣང་བ་འདི
དེ་འདྲའི་ལྕི་མོ་ཞིག རྒས་ན་ཡང་
ཚོར་བ་ནི་འགྱུར་སླ་བའི་ངང་ཚུལ་མེད་པར
མདུན་ནས་རྒྱབ རྒྱབ་ནས་གཞུག
བར་དང་གཏིང་འོག་མེད་པར་ནུར་བཞིན་འདུག
བསྟན་འཛིན་ཤེས་རབ།
མྱུ་གུ་ཕོན་པོ་ཞིག་ལྗང་མདོག་འཁྱིལ་ལེར་སྐྱེས་སོང་།
གཤོག་པ་སྡེབ་བཞིན་པའི་བྱེའུ་ཆུང་དེས་མགྲིན་པ་སངས་བཞིན།
རི་བོའི་ཕ་རོལ་ཏུ་འགྲོ་འདོད་ཟེར།
རི་བོའི་ཕ་རོལ་ན་ཅི་ཞིག་ཡོད་དམ།
ནམ་ཡང་ཡིད་ཆེས་ཀྱིས་འདྲོངས་པའི་མི་ཨང་།
སྐྱོ་བ་དེ་སེམས་ཀྱི་ཕྱི་རོལ་ཏུ་འདེད་རོགས།
ཕུགས་བསམ་ལ་མཚོན་རྩིས་ཤན་ནམ།
ཁྱོད་ལ་མངོན་གྱིན་པའི་ཁང་མིག་གསོར་མོ་དང་།
མེ་དྲོད་ཀྱི་སོས་བཞིན་པའི་སེམས་ཁམས་དྭངས་མོ་དེ་དག
ནུབ་ཕྱོགས་ན་ལྡང་བའི་དྲི་ངད་དང་སྦྲེལ་ཐབས་མི་འདུག
བོད། ལྷ་ཀླུ་གཉན་གསུམ།
དྲན་པའི་གླུ་དབྱངས་རྒྱང་རིང་ནས་བླངས་ཀྱང་།།
གོ་བའི་མི་དེ་དཔག་ཚད་དུ་མ་ཡི་ཆོད་སྟབས།།
འཕྱོ་བའི་རླབས་ཀྱི་མཚོ་མོའི་བཞུར་སྒྲ་ལ་ཉན་ཞོར།།
ནང་གི་ཤེས་པ་དྭངས་པའི་མཚོ་མོ་ལ་སྤྲིངས་ཡིན།།
ལས་ཀྱི་དབང་ཐང་མི་གཅིག་གནམ་འོག་གི་འཚོ་བ།།
བསམ་པའི་འཁྱེར་སོ་མི་གཅིག་རིག་གཞུང་གི་གོམས་གཤིས།།
ཡིན་ཡང་ཁྱིམ་གཅིག་བསྡུས་པ་སྔོན་ལས་ཀྱི་འཕྲོ་མ།།
འདི་ཉིད་སྲུང་དེ་དུས་ཡུན་ཅི་ཙམ་ཞིག་འཁྱོལ་ཡོང་།།
ཀླུ་སྨྱོན།
མགོ་རྔ་མེད་ཅིང་སྔོན་བརྡ་ཡང་མེད་པའི་རྨི་ལམ་དེ་ཨང་།
མ་གཞི་ཡིན་ན་ངས་རྨི་ལམ་དེ་ལྟ་བུ་ཞིག་རྨིས་མེད་པར་བརྩིས་ཏེ།
འཁྲལ་འཁྲུལ་གྱི་རྨི་ལམ་དེའི་སྐོར་ལ་གང་ཡང་མ་བྲིས་ན་ཆོག་ལ།
རྨི་ལམ་དེར་ཁ་གཡར་ནས་རང་དང་ཀློག་མཁན་ཚོའི་ཆུ་ཚོད་འཕྲོ་བརླག་ཏུ་མ་བཏང་ན་ཆོག་མོད།
ངའི་སྙིང་དཀྱིལ་གྱི་རྩ་ཕྲན་ཞིག་ལ་མདུད་པ་བརྒྱབ་པ་ཇི་བཞིན།
ང་ལ་རྨི་ལམ་དེའི་སྐོར་ཁྱབ་བསྒྲགས་མ་བྱས་ན་མི་ཆོག་ཅིང་།
རྨི་ལམ་དེའི་སྐོར་ཟིན་བྲིས་སུ་མ་ཕབ་ན་མི་འགྲིག་པའི་ཚོར་བ་ཞིག་སྐྱེ་བཞིན་འདུག་པས།
ད་ནི་ངལ་བ་དང་དུ་བླངས་ནས་རྨི་ལམ་དེའི་སྐོར་འཆད་པར་བྱ།
གཅན་བཟོད་རྒྱམ།
༡
སོང་སོང་མཐར་ཉམ་ང་བའི་བྱེ་ཐང་ཆེན་པོ་ཞིག་ཏུ་སླེབས་སོང
སྐོམ་ཆུ་དང་ཁ་ཟས་ཅི་ཡང་མེད་སའི་བྱེ་ཐང་ཞིག་ཏུ་སླེབས་སོང
མ་གཞི
ངས་དཀའ་སྤྱད་ཀྱིས་གོམ་པའི་འདེགས་འཇོག་ཡོད་ཚད་བདེ་སྐྱིད་ཅིག་གི་ཆེད་དུ་བསྒྱུར་བ་ཡིན་མོད
ཉམ་ང་བའི་བྱེ་ཐང་ཆེན་པོ་འདི་ངའི་དོན་གྱིས་སྙེགས་བྱ་དེར་གྱུར་སོང
༢
བྱེ་ཐང་བགྲོད་པར་རྔ་མོང་ཧ་ཅང་བཟང་ཟེར
འོན་ཀྱང་ངས་སེམས་ཅན་ཞིག་གི་སྒལ་བར་ཞོན་པ་ལོ་གསུམ་གྱི་གོང་ནས་སྤངས་ཟིན་པས
ད་ནི་ང་རང་གི་རྐང་པ་གཉིས་ཀ་རྔ་མོང་བྱེད་དགོས་པ་མ་ཡིན་ནམ
རྔ་མོང་ཨ ངའི་རྐང་པ་གཉིས
ཐང་ཆེན་པོ་འདིའི་དཀྱིལ་ནས་ལུས་མི་ཉན་ཨང
ཤ་ཀླན་འཇམ་དབྱངས་གྲགས་པ།
སྙན་ངག་མ་བྲིས་པའི་ཉིན་འདི་དག
སྙན་ངག་མ་བྲིས་པའི་རྐྱེན་གྱིས།
སྙན་ངག་མ་བྲིས་པའི་ཉིན་འདི་དག་ལ།
ཤོག་བུར་རྩྭ་སྐྱེས་ཤིང་།
སྨྱུ་གུར་བཙའ་བརྒྱབ་འདུག
ནམ་རྒྱུན་ཟུངས་ཁྲག་ཁོལ་མ་ལྟར་བཞུར་བཞིན་པའི།
སྣག་ཚའི་རྒྱུན་དེ་ཡང་།
ཡོངས་སུ་འཇགས་ཤིང་།
སྙན་ངག་དང་ཤ་འདྲིས་པགས་འདྲིས་ཡིན་པའི་
ཐ་སྙད་དེ་ཚོའང་།
རྔོན་པ་གང་ཞིག་གིས་བདས་པའི་གནའ་ཁྱུ་ལྟར།
ཕྱོགས་སོ་སོར་འཐོར་འདུག
བོད ལྷ་ཀླུ་གཉན་གསུམ།
སྐྱིད་ལ་སྡུག་པའི་མི་ཡུལ་ཁམས་ཤིག་ན།།
སྐྱིད་སྣང་འདྲ་བོ་ཡོད་པའི་དུས་ཤིགས་ལ།།
སྙིང་གི་སྤུན་དང་སྐད་ཆ་བཤད་དུས་སུ།།
སེམས་ཀྱི་དུངས་པ་ལྷོད་ཀྱི་གྲོལ་བ་དགའ།།
སྐུད་པའི་སྣེ་མོ་གཞན་དུ་ཁོ་རང་ཡོད།།
སྣེ་གཅིག་ང་ཡིས་འཇུས་དེ་ཨ་རོགས་ཞེས།།
ཁྱེད་བདེ་ང་བདེ་འགོ་ཡི་བཟུང་མ་ཐག།
ཕན་ཚུན་བདེ་མོ་ཡིན་པའི་ལན་ཞིག་འབྱོར།།
བོད། ལྷ་ཀླུ་གཉན་གསུམ།
དེ་དུས ངས་འདི་ལྟར་ཁ་ཆེམས་ཤིག་འཇོག་འདོད
དང་བོ་རང་ཉིད་བོད་པ་ཡིན་པས་བོད་ལ་ཁ་ཆེམས་ཤིག་འཇོག
དེ་ཡང་ བསམ་བློ་ཞིབ་མོ་གཏོང་དགོས་ཀྱི་ཡོད
དངོས་ནས་ངས་ཁ་ཆེམས་ཤིག་བཞག་པ་དེར
བདག་པོ་སུ་ཞིག་ཡོང་སྲིད
ངས་ཁ་ཆེམས་ནི་རང་གིས་གང་ཞིག་སྒྲུབ་ཡོད་མེད་ཀྱི་བར་མཚམས་ཤིག་ན
བཤད་མ་ཕོད་པའི་གཏམ་རྒྱུད་མང་བོ་ཞིག་ཡོད
འབྲི་མ་ཚར་བའི་སྙན་ངག་མང་བོ་ཞིག་ཡོད
འགྲིམ་འདོད་པའི་ཡུལ་ལྗོངས་ཆེས་མང་བོ་ཞིག་ཡོད
སྒྲུབ་མ་ཚར་བའི་བྱ་བཞག་ཆེས་མང་བོ་ཞིག་ཡོད
ལྷག་པར་དུ རང་དབང་གི་ཆེད་དུ་བྱེད་མ་ཐུབ་པའི་ལས་ཀ་མང་བོ་ལུས་ཡོད
(རྒྱང་རིང་གི་གྲོགས་མོ་ཞིག་ལ་)
དོལ་སྨྱོན།
ཀ་ར་ལས་མངར་བའི་
ཁ་བ་ལས་འཇམ་པའི་
ག་བུར་ལས་བསུང་བའི་
ང་ཡི་སྙིང་ཉེ་མ་
ཁྱོད་ ཅ་ག་དག་པའི་རྒྱུ་དངོས་ཇི་བཞིན་
ཆ་རྒྱུས་མེད་པའི་འཁོར་ཡུག་ན་
ཇ་ཆང་ལ་ངོམས་མེད་དུ་རོལ་ཞོར་
ཉ་གང་ཟླ་བའི་དཔལ་ལྟར་སྨོན་
ཀླུ་སྨྱོན། ང་ཚོས་ཡུན་རིང་ཞིག་ལ་འདང་མ་བརྒྱབ་པའི་གནད་དོན་ཞིག་སྟེ། གལ་སྲིད་ཁྱེད་རང་ད་ལྟ་ཁ་སྣ་སྐམ་ཞིང་དབུགས་ཐུང་ལེན་བྱེད་བཞིན འཇིག་རྟེན་ཕྱི་མའི་ལྟད་མོར་ཆས་ལ་ཉེ་བ་དང་། ཁྱེད་ཀྱི་གྲོགས་པོ་དང་གཉེན་ཉེ་དག་གིས་ཁྱེད་ཀྱི་མལ་ཁྲིའི་མཐའ་བསྐོར་ནས། སེམས་སྐྱོ་བས་གཟིར་ཞིང་མིག་མཆི་མས་ཁེངས་བཞིན། ཁྱེད་ཀྱི་ཆེས་མཐའ་མཇུག་གི་སྐད་ཆ་ཚིག་གསུམ་སྟེ། ཁྱེད་ཀྱི་འཆི་ཁའི་ཁ་ཆེམས་དྲོན་མོ་དེར་ཉན་འདོད་ཡོད་ཚེ། ཁྱེད་ཀྱིས་ཁྱེད་ཀྱི་མི་ཚེའི་ལོ་རྒྱུས་ཀྱི་མཇུག་བྱང་སྟེ། བརྗོད་འདོད་པའི་ཁ་ཆེམས་ཚིག་གསུམ་དེ་ཅི་ཞིག་ཡིན་ནམ། རང་ཉིད་ཀྱི་ཆེད་དམ། གཉེན་ཉེའི་ཆེད་དམ། མི་རིགས་ཀྱི་ཆེད་དམ། རྒྱལ་ཁབ་ཀྱི་ཆེད་དུ། ཁྱེད་ཀྱི་ཁ་ཆེམས་ངོ་མ་དེ་ཅི་ཞིག་ཡིན་ནམ།
ལྡོམ་བུ
ཀ་མ་ལ་ལྟར་ངོ་གདོང་མཛེས་ཀྱང་།།
ཁ་བའི་འདབ་ལྟར་སེམས་པ་དཀར་ཡང་།།
ག་བུར་བཞིན་དུ་དྲི་བསུང་ཐུལ་ལ་ཡང་།།
ང་ནི་ཁྱེད་ལ་དགའ་ཐབས་མི་འདུག །
ཅ་ཅོའི་གཏམ་ཉོག་ང་ལ་མ་བཤད།།
ཆ་ལུགས་མཐུན་རབས་མི་ལ་མ་སྒྲོག །
ཇ་ཆུ་འཐུང་བའི་འབྲེལ་བ་ཙམ་ལས།།
ཉ་ཆུ་བཞིན་གྱི་ལས་དབང་མི་འདུག །