ཆུ་ཐིགས་སྔོན་མོ།
སྙན་ངག་སྤྲིན་གྱི་ཕོ་ཉ་བཀླགས་རྗེས་ཀྱི་འཆར་སྣང་དྲན་ཐོར་བཀོད་པ།
གནོད་སྦྱིན་བཀའ་ཡི་འཐོར་རླུང་དྲག་པོས་ ལང་ ཚོའི་ འདབ་ མ་ ལྷོ་ རུ་ དེད།།
འདོད་ ལྷའི་ ཉག་ ཕྲན་ ལུས་ ལ་ ཕོག་ པས་ ཟུག་ རྔུའི་ གདུང་ བ་ སྙིང་ ལ་ འཕོས།།
རཱ་ མའི་ རི་ བོར་ རྒྱུ་ བའི་ སྤྲིན་ ཕུང་ དགའ་ མའི་ ལང་ ཚོར་ རབ་ འཁྲུལ་ ནས།།
བསིལ་ འཇམ་ ཆབ་ ཀྱི་ ཟེགས་ མ་ རེ་ ཡང་ བདེ་ བ་ སྟེར་ བའི་ བྱེད་ པོར་ བསྟེན།།
ལྷོ་ རོང་ དབེན་ བའི་ རི་ སུལ་ བསྙེགས་ ནས་ དྲི་ བཞོན་ བུ་ མོ་ གྲོགས་ སུ་ བསྟེན།།
གྱེས་ བྲལ་ གདུང་ བའི་ སྨྲེ་ སྔགས་ ཕྲེང་ ཚོགས་ སྤྲིན་ ཕུང་ སྐྱོད་ པའི་ ཀླུང་ དུ་ གཏོར།།
མཁའ་ ཡི་ རྡུལ་ ཚོགས་ འབར་ བའི་ ལང་ ཚོ་ མཐོ་ རིས་ ཐེམ་ སྐས་ ལ་ འཛེགས་ ཀྱང་ །།
ཆུ་ ཁུར་ བུ་ མོ་ དུབ་ པའི་ ཉམས་ ཀྱིས་ ཟུར་ མིག་ གློག་ ཐག་ ས་ ལ་ ལྷུང་ །།
ཞབས་རྗེས་ལགས།རུས་པ་ཅན་གྱི་སེམས་ཁོང་ནས་ནམ་ཡང་རྒྱལ་མི་སྲིད་པ་བྱི་ལའི་རྗུན་ཚིག་ཡིན་ལ་།ནམཡང་ཕམ་མི་སྲིད་པ་བདེན་པའི་རང་སྒྲ་ལགས།རུས་པ་ཅན་གྱི་མིག་དབང་གིས་དྲངས་འོངས་པ་གང་ཞིག་མི་སེར་དཀྱུས་མའི་མིག་ཆུ་རྡོག་གཅིག་ཡིན་ལ།བསུས་འོངས་པ་གང་ཞིག་གསུབ་དཀའ་བའི་རྨ་ཁ་དང་དྲན་ཤིང་ལགས།རུས་པ་ཅན་གྱི་སྨྲ་སྒོ་ནས་ང་རྒྱལ་གྱིས་སྨྲ་འདོད་པ་གང་ཞིག་རིགས་རྒྱུད་གཅིག་གི་བདེ་སྡུག་དང་ཁེ་དབང་ཡིན་ལ།སྤོབས་སེམས་ཀྱིས་བརྗོད་འདོད་པ་གང་ཞིག་གདུང་རྒྱུད་གཅིག་གི་རེ་དོགས་དང་སྙན་གྲགས་ལགས།རུས་པ་ཅན་གྱི་སྨྱུག་འོག་ནས་ཆུ་མིག་བཞིན་བརྡོལ་བྱུང་བ་རིགས་རུས་གཙང་མའི་འགོ་ཁུངས་དབོར་མི་ཉན་པའི་བདེན་ལུགས་དེ་ཡིན་ལ།འོད་ཐིག་བཞིན་ཕོག་ཡོང་བ་དེ་རིང་གི་གསར་འགྱུར་ནི་བདེན་པའི་བླ་སྲོག་བོར་བའི་རལ་གྲི་ངོ་གཉིས་ཤིག་ཡིན་ན་སང་ཉིན་གྱི་ལོ་རྒྱུས་ནི་ཕྱི་སྲོག་ནང་སྲོག་ཆད་པའི་བཤན་པའི་བེམ་རོ་ཞིག་ཏུ་མི་འགྱུར་གྲང་སྙམ་པའི་སེམས་ཁྲལ་དང་དེ་དག་ལས་ཐོབ་པའི་བསླབ་བྱ་དང་སྐུལ་ལྕག་ལགས།