མགོ་ལོག་འཇིགས་མེད་བློ་གྲོས་རིན་པོ་ཆེ།
ཤ་རུས་གདུང་རྒྱུད་གཅིག་པའི་བོད་རིགས་སྤུན་ཟླ་ཡོངས་ལ་ནང་གཏམ་ཞུ་རྒྱུར།
སྤྱིར་བཏང་ལོ་གསར་ནི་འཛམ་བུ་གླིང་གི་རྒྱལ་ཁབ་ཐམས་ཅད་ལ་དར་ཞིང༌། ལོ་རེའི་ནང་གི་དགའ་སྐྱིད་ཀྱི་དུས་སྟོན་ཆེ་ཤོས་ཡིན་པར་མ་ཟད། རང་རེ་གླུ་གར་དང་སྤྲོ་སྐྱིད་ལ་རོལ་རྒྱུར་དགའ་བའི་བོད་མི་རིགས་འདིས་དམིགས་བསལ་གྱིས་དགའ་ཞེན་བྱེད་ས་དང༌། ལོ་རེའི་ནང་གི་རེ་སྒུག་ཆེས་ཆེ་ཤོས་ཀྱི་དགའ་སྟོན་དུས་ཆེན་ཞིག་ཀྱང་ཡིན། འོན་ཀྱང་མི་གཅིག་གི་མི་ཚེའི་ནང་གནམ་ལོ་གསར་དུ་ཚེས་ཚད་ལ་ལོ་གསར་གཏོང་གི་ཡོད་དམ་ཟེར་ན་མེད་དེ། ཕ་མ་སྤུན་མཆེད་སོགས་རང་གི་ནང་མི་གྲོངས་པ་དང༌། ཉེ་འབྲེལ་དང་གྲོགས་པོ་ཁྱིམ་མཚེས་རྣམས་ཀྱི་ནང་མི་གྲོངས་ན་ཡང་ལོ་གསར་བྱེད་ཀྱི་མེད། སྤྱིར་བཤད་ན་༡༩༥༩ལོར་བོད་ས་རྒྱ་ལག་ཏུ་ཤོར་བ་དང༌། བོད་མིའི་འདི་ཕྱིའི་སྐྱབས་མགོན་ས་མཐར་ཕེབས་དགོས་བྱུང་བ་ནས་བཟུང༌། བོད་གཞིས་བྱེས་ལྷན་འཛོམས་ཀྱི་ཉི་མ་མ་ཤར་བར་དུ་བོད་མི་རྣམས་ཀྱིས་ལོ་གསར་གཏོང་གི་མེད་ན། འཛམ་གླིང་རྒྱལ་སྤྱིའི་སྤྱི་ཚོགས་ཀྱི་མིག་མདུན་དུ་བོད་མི་རིགས་ཀྱིས་མྱོང་དང་མྱང་བཞིན་པའི་སྡུག་བསྔལ་གྱི་རྣམ་པ་ཕྱི་ལོགས་སུ་སྟོན་པའི་ཐབས་ལམ་ཡག་ཤོས་ཤིག་ཡིན་ངེས་མོད། དེ་ལྟར་མ་བྱུང་བར་མ་ཟད་བྱེས་བཞུགས་བོད་མི་ཚོས་དགོན་པ་དང་དགོན་པའི་བར། སློབ་གྲྭ་དང་སློབ་གྲྭའི་བར། སྐྱིད་སྡུག་ཚོགས་པ་དང་སྐྱིད་སྡུག་ཚོགས་པའི་བར་འགྲན་བསྡུར་ལྟ་བུ་བྱས་ནས་ལོ་གསར་དང༌། ལོ་གསར་མ་ཡིན་པའི་སྤྲོ་སྐྱིད་སྣ་ཚོགས་གཏོང་གི་ཡོད་པ་འདི་རྒྱལ་སྤྱིའི་སྤྱི་ཚོགས་ཀྱི་མིག་ལ་དེ་ཙམ་འཕྲོད་ཀྱི་མེད། དེ་བས་ཀྱང་འདི་ལོར་ནི་བོད་པའི་དམིགས་བསལ་གྱི་ཁྲག་དང་མིག་ཆུའི་ལོ་ཟླ་ཞིག་ཡིན་པས་བོད་མི་རྣམས་ལ་རྒྱས་སྤྲོས་ཀྱི་ལོ་གསར་དང༌། གླུ་ལེན་བྲོ་འཁྲབ་བྱེད་རྒྱུའི་ཡི་ག་དང་འོས་བབས་ག་ལ་ཡོད།
ཕྱོགས་གཅིག་ནས་འདི་ལོར་བོད་ཀྱི་རྒྱལ་དོན་དུ་གྲོངས་པའི་རྒྱལ་གཅེས་དཔའ་བོ་རྣམས་སྐུ་གཤེགས་ནས་ལོ་ཁ་གང་མེད་ཅིང༌། ཁྱོ་ག་དང་ཕ་རྒན་གྱི་གཅེས་སྲོག་བོད་ཀྱི་རྒྱལ་དོན་དུ་ཤོར་བའི་ཡུགས་མོ་དང་དྭ་ཕྲུག་རྣམས་ཀྱི་མཆི་མ་ད་དུང་སྐམ་མེད་པས། ང་ཚོ་ལ་དགོད་སྒྲ་ལྷང་ལྷང་གིས་ལོ་གསར་བྱ་རྒྱུའི་ཡི་ག་དང་འོས་བབས་མེད། བོད་ཀྱི་རྒྱལ་དོན་དུ་གཅེས་སྲོག་ཤོར་མཁན་གྱི་ཤུལ་བཞུགས་ནང་མི་ཚོས་འདི་ལོར་ལོ་གསར་བྱེད་ཀྱི་ཡོད་དམ། གལ་ཏེ་མེད་ན་ང་ཚོས་ཀྱང་ཁོང་རྣམས་དང་གདུང་སེམས་མཉམ་བསྐྱེད་བྱེད་དགོས་པ་ལས་ལོ་གསར་གཏན་ནས་བྱེད་རྒྱུ་མེད།
