བྲག་སྣ་བ།

བོད་གཞུང་དམངས་ཛ་དྲག་ལས་འགུལ་ཚོགས་ཆུང་གི་སྤྱི་ཁྱབ་བཀོད་སྒྲིག་འོག ཕྱི་ཟླ་ ༨ ཚེས་ ༣༠ ཉིན་ཕྱི་སྡོད་བོད་མི་ཚོས་ཟས་བཅུད་སྨྱུང་གནས་ཀྱི་ལས་འགུལ་ཞིག་སྤེལ་སོང་བར། རང་ཡང་བོད་མི་ཞིག་ཡིན་པའི་ངོས་ནས་མཉམ་ཞུགས་བྱས་ཤིང༌། ལས་འགུལ་མགོ་འཛུགས་སྐབས་ཀྱི་བཀའ་ཁྲིའི་གཏམ་བཤད་གནང་བ་ལ་ཡང་ནན་གྱིས་ཉན་པ་ཡིན།
ཡིན་ནའང༌། བཀའ་ཁྲིས་བོད་རིགས་ཡོངས་ཀྱིས་ཡིད་དང་ངག་གི་འཚེ་བ་གཏན་དུ་སྤོང་མ་ཐུབ་པའི་དབང་གིས་ང་ཚོའི་ད་བར་གྱི་འབད་བརྩོན་མཐའ་དག་ལ་དོན་དམ་གྱི་གྲུབ་འབྲས་ཐོབ་མེད་ཅིང༌། བོད་མི་ཚོའི་ཡིད་ཀྱི་འཚེ་བ་མངོན་གྱུར་བ་མགོ་མནོན་ཙམ་ཞིག་མ་བྱུང་གི་བར་བོད་དོན་བདེན་མཐའ་གསལ་བ་དེ་ཤིན་ཏུ་དཀའ་བ་སོགས་ཀྱི་བཀའ་སློབ་ཡ་མཚན་པ་ཞིག་གནང་སོང་བ་དེས། བདག་གི་དེ་སྔའི་གཟབ་ནན་དང༌། ལྷིང་འཇགས་ཀྱི་སེམས་ཁམས་དཀྲོག་སྟེ་ཐེ་ཚོམ་དང༌། མུན་ཐོམ་གྱི་ཀློང་ལ་ཡན་དུ་བཅུག་སོང༌།
བཀའ་ཁྲི་ལྟར་ན། བོད་དོན་འཐབ་རྩོད་འདི་ནང་སེམས་ཀྱི་ཉམས་ལེན་གྱི་འཐབ་རྩོད་ཅིག་སྟེ། རང་རྒྱུད་ཀྱི་ཉོན་མོངས་དུག་གསུམ་ལ་རྒོལ་ཅིང་དེ་ལས་རྒྱལ་རྒྱའི་དམིགས་འདུན་ཅན་གྱི་འཐབ་རྩོད་ཞིག་ལས། བོད་མི་རིགས་ཀྱི་ཕྱི་ཡི་འཚོ་གནས་དགོས་མཁོར་ཕྱོགས་པའི་འཐབ་རྩོད་ཅིག་མིན་པར་དགོངས་ཀྱི་ཡོད་པ་འདྲ།

དེ་ལས་མང་བ་། “ཟས་བཅད་སྨྱུང་གནས་དང་བཀའ་ཁྲིའི་གཏམ་བཤད།” »

རིག་འཛིན་བསོད་ནམས།

ང་ཚོས་ཆོས་དང་རིག་གཞུང་ཞེས་བརྗོད་སྐབས། ཤེས་བྱ་དང་རིག་པ། རིག་གནས་དང་རིག་བྱེད། རིག་གཞུང།དང་གཙུག་ལག ལེགས་བྱང།དང་ཤེས་རིག ཤེས་ཡོན་སོགས་ཐ་སྙད་མང་པོ་ཞིག་གི་བསྟན་དོན་དང་འབྲེལ་ནས་བརྗོད་ཀྱི་ཡོད་པ་གཅིག་མཚུངས་ཡིན་ནའང༌། རྣམ་གྲངས་དང་དབྱེ་བ་འབྱེད་སྟངས་ཀྱི་ངོས་ནས་བཤད་ན། དེ་ནི་གོང་བཀོད་ཐ་སྙད་ཁག་གི་གོ་དོན་དང་ངོས་འཛིན་བྱེད་སྟངས་ལ་གཞིགས་ནས་ཕྱེས་པ་ཞིག་མ་ཡིན་པར། མི་རིགས་རང་ཉིད་ཀྱི་སྒེར་ཆོས་ལྟ་བུར་གྱུར་དང་མ་གྱུར་གྱི་ངོས་ནས་ཆོས་དང་རིག་གཞུང་ཞེས་པའི་དབྱེ་བ་གཉིས་ཕྱེས་པ་ཡིན་ཞིང༌། དེ་ཡང་ཐུན་མོང་མ་ཡིན་པ་བོད་ཀྱི་ནང་པའི་རིག་གནས་དང༌། བཟོ་དང་གསོ་བ་རིག་པ་སོགས་ཐུན་མོང་བའི་རིག་གནས་སུ་ངོས་བཟུང་ནས་དབྱེ་ཡི་ཡོད། གོང་དུ་བཀོད་པའི་ཐ་སྙད་ཚང་མ་ཕྱོགས་དང་ངོས་གང་ནས་དཔྱད་ཀྱང་དོན་གཅིག་མིང་གི་རྣམ་གྲངས་ལྟ་བུར་ངེས་པ་སྟེ། ཡུལ་ཁོ་ནའི་སྒོ་ནས་བཏགས་པ་ཆོས་ལུགས་དང་སྲིད་ལུགས། གཞུང་ལུགས་ལྟ་བུ། ཡུལ་ཅན་གྱི་སྒོ་ནས་བཏགས་པ་རིག་པ་དང་ཤེས་རིག་ཅེས་པ་ལྟ་བུ། ཡུལ་དང་ཡུལ་ཅན་གཉིས་ངོས་ནས་བཏགས་པ་རིག་གནས་དང་ཤེས་བྱ་ཞེས་པ་ལྟ་བུ་ཡིན།

དེ་ལས་མང་བ་། “ཐ་སྙད་ཁག་ཅིག་གི་གོ་དོན་འཚོལ་ཞིབ།” »

རིགས་འཛིན་བསོད་ནམས།

རིག་གནས་གསར་བརྗེའི་རླང་འཚུབ་དེས། རི་ལུང་ཐང་གསུམ་ནས་མའོ་ཙེ་ཏུང་གི་དཔར་མཐོང་བ་དང༌། ལ་དགུ་ལུང་དགུ་ནས་མའོ་ཙེ་ཏུང་གི་སྐད་ཆ་གོ་བ་ཞིག་བྱས། དེ་ནི་གཞན་གང་ཡང་མ་རེད། རིག་གནས་གསར་བརྗེའི་རླུང་འཚུབ་ཁྲོད་ནས་མི་དམངས་ཀྱིས་མའོ་ཙེ་ཏུང་དཔར་རིས་ཀྱི་ངོས་ནས་མཐོང་བ་དེ་རེད།
ལོ་དེར། པེ་ཅིན་གཞུང་གིས་མའོ་ཀྲུའུ་ཞི་ཤི་སོང་བ་དེ་མྱ་ངན་གྱི་དབྱངས་རྟར་དྲངས་ནས་རྒྱལ་ཡོངས་ལ་བསྒྲགས། སྐབས་དེ་འདྲ་ཞིག་ལ། པེ་ཅིན་དང་རྒྱང་ཐག་རིང་བའི་རི་གྲོང་མང་པོ་ནས། ད་ནི་གཞི་ནས་ངལ་གསོ་ཞིག་སླེབས་པའི་ཚོར་སྣང་དང་བཅས་ཏེ། རེ་བ་གཞན་ཞིག་གི་སྣེ་མོར་འཇུས། དེ་ནི། ཆེས་གཞི་རིམ་གྱི་འདོད་འདུན་ཙམ་སྟེ། ཟ་མ་རྒྱགས་ཚད་ཅིག་བཟའ་རྒྱུ་ཡོང་ངེས་སུ་སྙམ་པ་དེ་རེད། ཡིན་ནའང༌། བདེ་སྐྱིད་ཀྱི་འཚོ་བ་དེ་ཐག་ཇེ་རིང་དུ་སོང༌། ལྟོ་བ་འགྲངས་ཙམ་ལས་ལེགས་པ་ཞིག་དོན་ཐོག་ཏུ་སྨིན་མགོ་བརྩམས། རྒྱ་ནག་གཞུང་གིས་གནམ་ས་བླ་འོག་བརྗེ་བ་ལྟ་བུའི་འཕོ་འགྱུར་ཞེས་སྒྲོག་པའང་དོན་ལ་ནི། ལྟོ་གོས་ཀྱི་གནད་དོན་ཙམ་ལ་ཟེར་གྱི་ཡོད་ན་ལས་བོད་མི་ཚོའི་གནམ་ས་བླ་འོག་ནི་མ་བརྗེ་བར་འདུག དཔེར་ན། གནའ་བོའི་གྲོང་ཁྱེར་ལྷ་སའི་ཁ་དོག་ཡོངས་སུ་བརྗེས་ཡོད་པ་འདི་ནི། བོད་མི་ཚོས་རང་ཉིད་ཀྱི་ཁ་དོག་གཞན་གྱིས་བསྒྱུར་གྱིན་པར་ངོས་འཛིན་ཅིང་ཡོད་པ་དང༌། རང་ཉིད་འཆི་ལམ་དུ་བརྫངས་པའི་ལོ་ཟླ་ཞིག་ཏུ་ངོས་འཛིན་པ་ཡིན།

དེ་ལས་མང་བ་། “དྲན་ཐོ་དང་གནས་སྟངས།” »

བྲག་སྣ་བ།
དུས་རབས་བཅུ་གཉིས་པའི་དུས་མགོ་ནས་བཟུང་བོད་འདིར་ཡང་སྤྲུལ་ལམ་ལུགས་ཀྱི་གོམས་སྲོལ་གསར་པ་ཞིག་འགོ་ཚུགས་ཤིང༌། གོམས་སྲོལ་འདི་རིམ་པས་བོད་ཀྱི་ནང་བསྟན་རིག་གནས་ལ་འབྲེལ་འདྲིས་དམ་པའི་རིག་གནས་བྱེ་བྲག་པ་ཞིག་ཏུ་གྱུར་ཏེ། ད་བར་བོད་སྤྱི་ཚོགས་ཁྲོད་དུ་ཆོས་སྲིད་གཉིས་ཐད་ཀྱི་གོ་གནས་འགངས་ཆེན་ཤིག་ཟིན་ཡོད་པ་དང༌། བོད་མི་ཚོའི་ངོས་ནས་ཁོང་ཚོ་ནི་སངས་རྒྱས་བྱང་འཕགས་ཆེ་གེ་མོ་ཞིག་གི་སྤྲུལ་བ་ཤ་སྟག་སྟེ། འགྲོ་བ་སེམས་ཅན་སྤྱི་དང་ལྷག་དོན་བོད་མིའི་བདེ་སྡུག་ཁོ་ནའི་ཕྱིར་མི་ཡི་ཤ་ཚུགས་སུ་བྱོན་པ་ཁོ་ནར་སྙམ་གྱི་ཡོད་ཕྱིན། བླ་མ་ཚོ་ནི་བོད་སྤྱི་ཚོགས་འདིའི་དབང་སྒྱུར་སྟོབས་ཤུགས་ཀྱི་གོང་བུ་ཆེས་བླ་ན་མེད་པ་ཞིག་སྟེ། བོད་མི་རིགས་འདིའི་བླའམ་སྲོག་ལྟ་བུ་ཞིག་ལ་གྱུར་ཡོད་པ་ནི་འགྲེལ་བརྗོད་ཞུ་ཐུབ་པ་ཞིག་མིན།
རྒྱུ་མཚན་དེས་མི་རིགས་འདིས་གནའ་ནས་ད་བར་ཟས་ཀྱི་ཞིམ་ས་དང༌། གོས་ཀྱི་ཡག་སས་མཚོན་རང་ལ་དབང་བའི་མཆོག་དང་ཕུལ་གྱི་གྱ་ནོམ་དངོས་པོ་མཐའ་དག་བླ་མར་ཕུལ་ཡོད་པ་དང༌། བླ་མ་ཚོ་ནི་ཚེ་འདི་དང་ཕྱི་མའི་མགོན་སྐྱབས་དཔུང་གཉེན་དམ་པ་སྟེ། ཁོང་ཚོའི་སྤྱན་གྱིས་མི་མཐོང་བ་དང༌། ཐུགས་ཀྱིས་མི་མཁྱེན་ྭཔ། སྙིང་རྗེས་མི་སྐྱོབ་པའི་ཉམས་ཐག་སེམས་ཅན་ཞིག་འཇིག་རྟེན་འདིར་མེད་པར་སྙམ་སྟེ། སྐྱིད་སྡུག་གི་དུས་ནམ་ཡང་བླ་མར་རེ་ཞིང་གསོལ་བ་འདེབས་རྒྱུ་ནི་དབུགས་ཀྱི་འབྱིན་རྔུབ་དང་གཏན་ཏུ་ཁ་བྲལ་མྱོང་མེད་པ་ལྟ་བུ་ཞིག་ཡིན།
ཡིན་ནའང༌། ཡིད་སྐྱོ་བ་ཞིག་ལ། འདས་ཟིན་པའི་ལོ་རྒྱུས་ཀྱི་འགག་འཕྲང་རེ་ནས། མི་རིགས་འདི་ཆེས་སྡུག་བསྔལ་དང་ཛ་དྲག ཆེས་ཉམས་ཐག་དང་ཉེན་ཁར་ལྷུང་ཐེངས་རེར། རྒྱལ་བ་པཎ་ཆེན་ལྟ་བུ་རེ་འགའ་མ་གཏོགས་པའི་བོད་ཀྱི་བླ་མ་གཞན་དག་ཚོས་མི་རིགས་འདིས་ཁོ་ཚོར་བཅངས་པའི་ཡིད་ཆེས་བློས་གཏོད་ལ་དཔག་པའི་རིན་འབབ་ཅིག་རྩ་བ་ཉིད་ནས་སྤྲོད་ཐུབ་མེད་པར་མ་ཟད། ད་དུང་སྐབས་འགར་བོད་མི་རིགས་འདི་སྣང་བ་ལས་མུན་པར་འཕེན་པའི་མཐུན་འགྱུར་རོགས་རམ་ཡང་ཞུས་མྱོང་ཡོད།

དེ་ལས་མང་བ་། “དུད་ནག་ལྟ་བུའི་བོད་ཀྱི་བླ་སྤྲུལ་འདི་ཚོ།” »

གཤམ་ལ་རྒྱ་ནག་ཕྱོགས་ནས་བོད་དང་བོད་ཀྱི་གནད་དོན་སྐོར་ལ་རྣམ་འགྱུར་ཅི་ཞིག་བཟུང་ཡོད་པའི་སྐོར་གྱི་ཡིག་ཆ་ཁག་ཅིག་ཟུར་འདོན་ཞུས་ཡོད། འདི་ལྟར་བོད་དོན་གླེང་སྟངས་ཐད། ཁྱེད་རང་ལ་བསམ་ཚུལ་ཅི་ཡོད་དམ། མང་པོའི་བསམ་ཚུལ་སྤེལ་སླད་འདིར་དོན་གནད་ཁག་ཟུར་འདོན་ལས། ཡིག་ཆ་ཆ་ཚང་ཟུར་འདོན་ཞུས་མེད།

༼༡༽ ཕྱི་ལོ་ ༢༠༠༨ ཟླ་ ༣ ཚེས་ ༢༡ ཉིན་གྱི་༼བོད་ལྗོངས་ཉིན་རེའི་ཚགས་པར༽་གྱི་དཔྱད་གཏམ་ནང༌།

¿ཐེངས་འདིར་ལྷ་སར་བྱུང་བའི་རྡུང་བཅོག་འཕྲོག་སྲེག་གི་ཚབས་ཆེའི་དོན་རྐྱེན་དང༌། སྐྱི་གཡའ་བའི་དྲག་སྤྱོད་དེ་དག་གིས་དོན་མེད་དུ་སྐྱེ་འགྲོ་རྣམས་ལ་སྡུག་བསྔལ་ཚབས་ཆེན་མྱོང་དུ་བཅུག་པ་ཡོད་པ་དེས། ཏཱ་ལའི་ནི་ཁོ་རང་གིས་སྒྲོག་པ་ནང་བཞིན་གྱི་ནང་པའི་དགེ་སློང་ཞིག་ཡིན་ཟེར་བ་དེ་ལྟ་བུ་ཞིག་གཏན་ནས་མིན་པ་ར་འཕྲོད་ཡོད། ཁོ་ནི་མིའི་གདོང་ལ་གཅན་གཟན་གྱི་སེམས་དང་ལྡན་ཞིང༌། ཆོས་གོས་གྱོན་པའི་འཕར་སྤྱང་ཞིག་རེད་ཅེས་བརྗོད་ན་ཐལ་ཆ་གང་ཡང་མེད། སྟོན་པ་བཅོམ་ལྡན་འདས་ཡིན་ནའང༌། ཏཱ་ལའི་ནང་བཞིན་ཁ་འཇམ་ཁོག་རྩུབ་ཀྱི་ནང་པའི་ཞབས་འདྲེན་པ་དང༌། མིའི་གདོང་ལ་གཅན་གཟན་གྱི་སེམས་དང་ལྡན་པའི་དྲག་སྤྱོད་པ་སྨྱོ་རྩུབ་ཅན་འདི་བཟོད་བསྲན་བྱེད་ཐུབ་ཀྱི་མ་རེད། ཏཱ་ལའི་ལྟ་བུ་མེས་རྒྱལ་དང་མི་དམངས་ལའང་རྒྱབ་གཏོད་བྱེད་ཕོད་མཁན་མིཞིག་ལ། ད་དུང་མིའི་ཐ་སྙད་སྦྱོར་རུང་ངམ། གྲྭ་པཞིག་ཡིན་པའི་ཆ་ནས། ཏཱ་ལའི་ཡིས་རྫུན་ཤོད་པ་མ་ཟད། ཐེངས་འདི་ཚབས་ཆེའི་རྡུང་གཅོག་འཕྲོག་སྲེག་གི་དོན་རྐྱེན་བཀོད་བྱུས་དང་སྟངས་འཛིན་བྱས་ཏེ། ཁོ་པའི་སྤྱོད་ངན་དེ་ཐོས་པ་ཙམ་གྱིས་ཧང་སངས་དགོས་པ་ཞིག་ཡིན་ལ། གདོན་འདྲེ་ལའང་དེ་ལས་ལྷག་ཅི་ཡོད། གལ་སྲིད་སྟོན་པས་ནང་པའི་རྗེས་འཇུག་འདི་ལྟ་བུ་ཞིག་ཡོད་པ་མཁྱེན་ན། ཁོང་ཡང་ངེས་པར་དུ་ཞལ་སྐྱེངས་པོ་ཡོང་གི་རེད། དེ་ནི་གཏན་འཁེལ་བ་ཞིག་རེད།¿ཅེས་བཀོད་འདུག

དེ་ལས་མང་བ་། “བོད་རྒྱའི་བར་གྱི་བོད་དོན།” »

བཙུན་ཐར་ཚེ་རིང༌།
ྋགོང་ས་མཆོག་གིས་གཙོས་བོད་མི་སེར་སྐྱ་ཁྲི་ཕྲག་མང་པོ་གཞན་ཡུལ་ལ་སྐྱབས་བཅོལ་དུ་འབྱོར་ཞིང༌། གཞིས་བྱེས་གཉིས་སུ་གྱུར་ནས་དུས་རབས་ཕྱེད་ལྷག་ཕྱིན་པའི་དུས་སྐབས་ཏེ། ཕྱི་ལོ་ཉིས་སྟོང་བརྒྱད་ཀྱི་དེ་རིང༌། ཆོ་འཕྲུལ་སྨོན་ལམ་ཆེན་མོའི་མཆོད་མཇལ་འདུ་འཛོམས་ཀྱི་གོ་སྐབས་དང་བསྟུན་མདོ་སྨད་རེབ་གོང་བ་སྐྱ་སེར་མི་མང་གིས་བོད་མི་རིགས་ཀྱི་རང་དབང་བདེན་དོན་ཆེད་རྒྱ་ནག་གཞུང་ལ་ཞི་བའི་ངོ་རྒོལ་སྐད་འབོད་ཤུགས་ཆེ་བྱས་པ་ལ་རྐྱེན་བྱས། བོད་ཆོལ་ཁ་གསུམ་གྱི་ས་གནས་དྲུག་ཅུ་རེ་དགུ་ནས་རང་འགུལ་གྱིས་ཡར་ལངས་ཏེ་ཞི་བའི་ངོ་རྒོལ་གྱི་ལས་འགུལ་སྤེལ་ནས་ཟླ་གཉིས་ལྷག་འགྲོ་བཞིན་ཡོད་ལ། ཞི་བའི་ངོ་རྒོལ་སྐབས་ཆོས་བྱེད་སེར་མོ་བ་གཙོས་སློབ་གྲྭ་དང༌། ཞིང་འབྲོག་མང་ཚོགས། ས་གནས་ལས་བྱེད་སོགས་ལས་རིགས་མི་འདྲ་བའི་བོད་རིགས་སྤུན་ཟླ་ཕོ་མོ་རྒན་གཞོན་གང་མང་མཉམ་ཞུགས་བྱས་ཡོད་པ་ན་མང་ཆེ་ཤོས་གཞོན་སྐྱེས་མི་རབས་རེད།

དེ་ལས་མང་བ་། “བོད་དོན་འཐབ་རྩོད་དང་སེམས་ཀྱི་དྲན་ཕྱོགས།” »

སྐུ་ཞབས་ལུང་རིགས་རྒྱལ་གྱི་གཅིག་གྱུར་ཆེན་པོ་གཉིས་ཞེས་པའི་ཆེད་རྩོམ་བཀླགས་པའི་རྗེས་འབྲེལ་དུ།

ཨ་འབྲུག་དཀོན་མཆོག

༸གོང་ས་མཆོག་གིས་བོད་ཀྱི་གནད་དོན་འདི་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་ཆེན་པོ་ཞིག་གི་འོག་ནས་བྱུང་བ་དང་འདི་ཉིད་ཐག་གཅོད་ཀྱང་རྒྱལ་སྤྱིའི་ཆབ་སྲིད་འགྱུར་འགྲོས་ཀྱི་རྒྱབ་ལྗོངས་དང་མཐུན་པར་བྱེད་དགོས་པ་དེ་དུས་རབས་སྔོན་མའི་དུས་དཀྱིལ་ནས་དཔྱོད་དཔག་གིས་ལམ་སྟོན་དང་འཆར་སྣང་གི་དགོངས་ཚུལ་བཏོན་ཡོད་ལ། རྒྱང་བཀྱེད་ནས་བལྟས་ན་དབུ་མའི་ལམ་གྱི་སྲིད་བྱུས་ལ་དེ་ལྟ་བུའི་དུས་རབས་ཀྱི་རྒྱབ་ལྗོངས་ཡོད་པ་རེད། འོན་ཀྱང་༸གོང་ས་མཆོག་གིས་དགོངས་པ་བཞེས་ཕྱོགས་དང་དབུ་མའི་ལམ་གྱི་སྲིད་བྱུས་རང་སྟེང་ནས་བཤད་ན་དེའི་ཆེ་བ་རྒྱས་བཤད་བྱེད་རྒྱུ་ལས་ཀྱང༌། དེ་ཉིད་འགལ་ཟླ་འདུམ་འགྲིག་གི་ལམ་ནས་སེལ་ཐུབ་པའི་ལག་ལེན་གྱི་རང་བཞིན་ལྡན་པའི་ཐོག་མའི་ཡིད་ཆེས་དེ་མངོན་གྱུར་ཡོང་ཐབས་ལ་འབད་པ་བྱས་ཡོད་པ་རེད། དབུ་མའི་ལམ་གྱི་སྲིད་བྱུས་དེ་རྒྱལ་སྤྱིའི་འགལ་རྩོད་སེལ་ཕྱོགས་ཀྱི་༸གོང་ས་མཆོག་གི་སྤྱིར་བཏང་གི་དགོངས་པ་ལས་བྱུང་ཡང་ཆེད་དམིགས་ཀྱི་ཆ་ནས་དེ་ཉིད་བོད་ཀྱི་གནད་དོན་ཐག་གཅོད་བྱེད་པའི་ཐབས་ལམ་ཞིག་ཡིན་ལ། སྲིད་བྱུས་འདི་༸གོང་ས་མཆོག་གི་དགོངས་གཞི་ཙམ་ལས་བོད་གཞུང་གི་ཁྲིམས་ཐོག་ནས་གཏན་འབེབས་བྱས་པའི་སྲིད་བྱུས་ཤིག་ཏུ་མ་གྱུར་བའི་ཡར་སྔོན་དེར་༸གོང་ས་མཆོག་གིས་བོད་ཀྱི་རྩ་དོན་ནི་བོད་མི་ས་ཡ་དྲུག་གི་བདེ་སྐྱིད་ཀྱི་ཆེད་ཡིན་ཞེས་བོད་ཀྱི་རྩ་དོན་དེ་བོད་མིའི་བདེ་སྐྱིད་ཀྱི་ཆེད་ཅེས་པར་ངོས་འཛིན་གནང་མྱོང་ཡོད། ཉེ་བའི་ཆར་༸གོང་ས་མཆོག་གིས་བོད་མིའི་སྡུག་བསྔལ་སེལ་ཆེད་ཅེས་པའི་ཚིག་འདི་བེད་སྤྱོད་གནང་གི་འདུག་ཅིང༌། དམིགས་བསལ་སྐུ་ཚབས་རྒྱ་རི་བློ་གྲོས་རྒྱལ་མཚན་ལ་༸གོང་ས་མཆོག་གིས་བཀའ་མངགས་ནན་པོ་བྱས་པའི་སྙིང་དོན་ཡང་བོད་མིའི་སྡུག་བསྔལ་སེལ་བའི་ཆེད་དུ་ཐབས་ཤེས་ག་རེ་ཡིན་ནའང་བྱེད་དགོས་ཞེས་པ་དེ་རེད། ༸གོང་ས་མཆོག་གིས་བོད་མིའི་བདེ་སྐྱིད་ཀྱི་ཆེད་ཅེས་པ་ནས་འགོ་བརྩམས་ཏེ་བོད་ཀྱི་གནད་དོན་ཐག་གཅོད་བྱེད་པའི་ཐབས་ལམ་དང་ཇུས་གཞི་གསལ་འདོན་གནང་བའི་གནས་ཚུལ་དེ་དཔེ་མཚོན་དུ་བཞག་ནས་ད་ལྟ་བོད་མིའི་སྡུག་བསྔལ་སེལ་ཆེད་དུ་ཐབས་ཤེས་ག་རེ་ཡིན་ནའང་བྱེད་དགོས་ཞེས་པ་དེ་ཁོང་གི་དགོངས་པ་དང་ཐབས་ཇུས་ལ་རྩ་བའི་ཆ་ནས་འགྱུར་ལྡོག་ཅིག་འགྲོ་བཞིན་པ་དང༌། བདེ་སྐྱིད་བསྒྲུབ་ཆེད་དང་སྡུག་བསྔལ་སེལ་ཆེད་དུ་ཞེས་པ་གཉིས་ལ་ཁྱད་པར་ཆེན་པོ་ཞིག་ཡོད་པ་ཡང་ངས་ངོས་འཛིན་བྱེད་ཀྱི་མེད། ཡིན་ནའང་བོད་མི་རིགས་འདི་གསོན་གནས་ཡོང་བ་ལ་ཕན་པའི་ཆེས་མཐའ་མཇུག་གི་གོ་སྐབས་ཀྱི་ཆེད་དུ་ཁོང་གིས་ག་རེ་ཡིན་ནའང་གནང་གི་རེད། ཁོང་ནི་ཐབས་ཤེས་དང་གདམ་ག་གཅིག་གིས་ནུས་པ་མ་ཐོན་པ་མངོན་གསལ་དུ་གྱུར་རུང་རང་ཉིད་ཀྱི་ལ་རྒྱ་སྲུང་སྐྱོབས་ཀྱི་ཆེད་དུ་གདམ་ག་གསར་བ་དང་ལེན་བྱེད་མི་ནུས་མཁན་དེ་འདྲ་གཏན་ནས་མ་རེད། དེང་སང་གི་བོད་ཀྱི་གནས་བབ་ལ་བསམ་ན་ང་ཚོས་ལ་རྒྱ་ལས་ཀྱང་དོན་དངོས་ལ་མཐོང་ཆེན་བྱེད་དགོས་པ་ཧ་ཅང་གལ་ཆེན་པོ་རེད། དོན་དམ་པའི་ང་ཚོ་ལ་ལ་རྒྱ་ཞིག་ཡོད་ན་ང་ཚོའི་གཞན་དང་གཞན་ལ་ངོ་རྒོལ་བྱེད་རྒྱུ་ལས་ཀྱང་རང་དང་རང་རིགས་དར་སྤེལ་གཏོང་བའི་གོ་སྐབས་དང་ཐབས་ལམ་ལ་བསམ་བློ་གཏོང་རན་རེད།

དེ་ལས་མང་བ་། “རྨས་སྐྱོན་ཐེབས་པའི་མི་རིགས་ཤིག་གི་ཚེ་སྲོག་སྐྱོབས་པའི་མཐའ་མའི་དམག་འཐབ།” »

ཨ་འབྲུག་དཀོན་མཆོག

རྡ་རམ་ས་ལ་འདི་ས་འགུལ་ཆེན་པོ་ཞིག་གི་རྗེས་ཀྱི་ས་ཁུལ་དང་འདྲ་བོ་འདུག གང་ཡིན་ཟེར་ན་འདི་ནས་དངོས་པོ་སྣ་མང་མཉམ་བསྲེས་དང་སྙིགས་རོའི་རྣམ་པའི་འོག་ནས་ཕྱི་རུ་མངོན་ཡོང་གི་འདུག དེ་སྔོན་རྒྱ་གར་འགྲུམ་འགྲིལ་ལས་རིགས་པ་ཞིག་གི་རྡ་རམ་ས་ལ་ནི་འཛམ་གླིང་རིག་གནས་ཀྱི་བསྣོལ་མཚམས་ཤིག་རེད་ཅེས་ཚད་མཐོ་བོའི་གདེང་འཇོག་བྱས་འདུག་མོད།དེ་ལ་ཡང་ངོས་གཞན་ཞིག་གི་གནས་ལུགས་ཡོད་རྒྱུ་རེད།འོན་ཀྱང་ཚད་རིམ་གཞན་ཞིག་གིས་བཤད་ན་རྡ་རམ་ས་ལའི་ཁྱད་ཆོས་གཙོ་བོ་ཞིག་ནི་རིག་གནས་བསམ་བློའི་སྟེང་གི་སྣ་མང་འབྲེལ་གཏུགས་དེ་མ་ཡིན་པར།བསམ་གཞིགས་ཀྱི་སྣ་འདྲེན་མེད་པའི་གང་བྱུང་གི་བྱ་སྤྱོད་དེ་ཡིན་པ་དང༌།ལྷག་པར་དུ་བོད་པ་མང་པོ་ཞིག་ནི་དེ་ལྟར་རེད།ངའི་མཐོང་སྣང་ལ་གནས་འདི་ནས་མི་མང་པོ་ཞིག་གི་ཉི་མ་འཁྱོལ་གྱི་མེད་པ་འདྲ།ཉིན་ལྟར་ང་ཡར་འགྲོ་མར་འགྲོ་བྱེད་སའི་ལམ་བར་དུ་ཕར་མ་བལྟས་ཀྱང་མཐོང་ཡོང་བའི་དཔུང་ཁག་ཆེན་པོ་གཉིས་ཡོད་པ་ནི་ཀེ་རུམ་རྩེ་མཁན་གྱི་དཔུང་ཁག་དང༌།ཏཱ་སེ་རྩེ་མཁན་གྱི་དཔུང་ཁག་གཉིས་ཡིན།ཆེད་དུ་མ་ཉན་རུང་ཐོས་ཡོང་བ་ནི་ཧབ་ཆ་དང་འགྲོགས་པའི་མནའ་ཚིག་ཆེན་པོ་དག་ཡིན།ཁོང་ཚོའི་རྩེད་གདན་གྱི་ཟུར་སོ་སོ་ན་ཧིིན་སྒོར་བརྒྱ་ཤོག་དང་ལྔ་བཅུ་ཤོག་འགའ་རེ་བརྩེགས་ཡོད་ཅིང༌།ཉེ་འཁྲིས་ཀྱི་ཕོ་གསར་སྐྲ་རིང་ཞིག་གིས་་“མ་ཎི་དུང་དེ་རིང་ཡིན་ན་པཱ་མགོ་པཱ་རྐྱང་ལ་བུད་མ་བུ་ཐལ་ན་”ཞེས་ངོམས་སོའི་རྣམ་པས་བཤད་ཀྱི་འདུག ང་ཁང་པ་ཞིག་འཚོལ་ཆེད་ཟློས་གར་ཉེ་འཁྲིས་ཀྱི་གཞུང་ལམ་དུ་འགྲོ་སྐབས་ཆུ་ཤོག་ཀྱིས་ཆར་ཁེབས་བརྒྱབ་ཏེ་རྒན་པོ་ཁ་ཤས་ཀྱིས་ཤཱོ་རྩེད་རྒྱག་བཞིན་འདུག་ལ།ད་དུང་ལག་ཏུ་འཕྲེང་བ་འདྲེན་བཞིན་པའི་རྒད་པོ་མང་པོ་ཞིག་གིས་རུབ་རུབ་བྱས་ཏེ་མཐའ་ནས་བལྟས་འདུག གཙུག་ལག་ཁང་གི་ཉེ་འཁྲིས་ཀྱི་ཇ་ཁང་དག་ལ་ཕྱི་རྒྱལ་པ་ཚོས་ཇ་འཐུང་ཞོར་དུའང་གསར་ཤོག་དང་དཔེ་ཀློག་བྱེད་ཀྱི་འདུག་མོད།བོད་མི་ཚོས་ཇ་དང་ཧབ་ཆ་མཉམ་འགྲོགས་ཀྱི་སྤྲོ་སྐྱིད་ལ་རོལ་གྱི་འདུག་གཙུག་ལག་ཁང་གི་མདུན་ཐང་ན་ལཱ་སྒྲོན་གྱི་འོད་སྣང་དང་མཉམ་དུ་ཧ་ཅང་སེམས་བསྐྱེད་ཆེན་པོའི་ནང་དོན་ཡོད་པའི་དབྱངས་རྟ་མང་པོ་གྱེར་བཞིན་འདུག་ལ།བོད་ཀྱི་གནས་སྟངས་དངོས་གནས་ཛ་དྲག་ལ་སླེབ་ཡོད་ཅེས་པའི་གཏམ་བཤད་ཀྱང་རྒྱུན་སྲོལ་ལྟར་བྱེད་ཀྱི་འདུག་འོན་ཀྱང་བལྟས་ཚོད་ལ་རྡ་སའི་གནས་སྟངས་ཀྱང་ཧ་ཛ་དྲག་ལ་བསླེབས་ཡོད་མེད་གང་ལྟར་ཡང་འཕེལ་རྒྱས་དང་ཉམས་དམས་གཉིས་ཀྱི་ཕྱོགས་གཏོགས་སུ་བསྡུར་གཤིབས་བྱེད་སྐབས་འདི་ཡང་ཛ་དྲག་གི་ཁོངས་སུ་འགྲོ་ངེས་པ་ཞིག་མ་རེད་དམ།བོད་མི་ཚོ་གནས་སྟངས་སྐྱོ་བོ་ཞིག་གི་སྐབས་སུའང་སྤྲོ་སྣང་མ་བརླག་པར་གནས་པ་དེ་བོད་མིའི་དཔལ་ཡོན་གྱི་ཁྱད་ཆོས་ཤིག་ཏུ་ངོས་འཛིན་གནང་མཁན་ཡོད་པ་དེ་ངས་ཤེས་ཀྱི་ཡོད་མོད།རྒྱུན་གཏན་སློབ་སྦྱོང་གི་གཤིས་ཀ་མེད་པ་དང༌།འཚོ་བའི་གནས་སྟངས་དང་ཧུར་བརྩོན་གྱི་གནས་སྟངས་གཉིས་ལ་ཧེ་བག་ཆེ་བ་དེ་མ་མཐའ་ཡང་དཔལ་ཡོན་ཞིག་ཡིན་རྒྱུ་མ་རེད།དགོད་བྲོ་བ་ཞིག་ལ་ཉིན་རྒྱུན་རྩེད་མོར་ཞུགས་པའི་གསར་བུ་འགའ་ཤས་ཀྱིས་ཐ་ན་རང་གི་གདོང་ཡང་བཀྲུས་མི་འདུག གནས་སྟངས་ཛ་དྲག་ཡིན་པའི་སྐབས་སུའང་ང་ཚོ་དངོས་གནས་སྣང་བ་སྐྱིད་པོ་ཡིན་པ་འདྲ།

དེ་ལས་མང་བ་། “གནས་སྟངས་ཛ་དྲག་དང་སྣང་བ་སྐྱིད་པོ།” »

མང་ར་བ་གདུགས་དཀར་འབུམ།

རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་ཚོགས་ཆེན་ནི། རྒྱལ་སྤྱིའི་ལྡོག་མེད་སྟོབས་ཤུགས་ལ་བརྟེན་ནས། རྒྱ་ནག་དང་ཨེ་ཤ་ཡའི་ས་ཁུལ་ཁག་ལ་རང་དབང་དང་འགྲོ་བ་མིའི་ཐོབ་ཐང༌། མང་གཙོ་བཅས་ཀྱི་རིན་ཐང་ཁྱབ་བརྡལ་དུ་གཏོང་བའི་རྒྱལ་སྤྱིའི་གྲོས་མོལ་གནང་སའི་གླེང་སྟེགས་ཞིག་རེད། ༢༠༠༨ལོའི་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་ཚོགས་ཆེན་དེ། ཕྱི་ལུགས ༢༠༠༨ ལོའི་ཟླ་ ༨ པའི་ཚེས་ ༤ དང་ ༥ ཉིན་གཉིས་རིང་ཉི་ཧོང་གི་རྒྱལ་ས་Tokyo-ནང་སྐོང་ཚོགས་གནང་སོང་བ་དང༌། ཐེངས་འདིའི་ཚོགས་ཆེན་ལ་འཛམ་གླིང་རྒྱལ་ཁབ་ཁག་ ༢༠ ལྷག་གི་ཚོགས་བཅར་བ་མི་གྲངས་ ༣༠༠ ཉེ་བ་ཚོགས་ཞུགས་ཀྱིས། ཉིན་གཉིས་རིང་ཕྱོགས་ཡོངས་ནས་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་བརྒྱུད་རིམ་ཁྲོད་ ༢༠༠༨ ལོའི་པེ་ཅིང་ཨོ་ལིམ་པིག་རྩེད་འགྲན་མཇུག་གྲུབ་རྗེས་རྒྱ་ནག་དང་ཨེ་ཤ་ཡ་མང་གཙོ་ཅན་དུ་བསྒྱུར་རྒྱུའི་ཐད་ནུས་པ་ཅི་ལྟར་འདོན་རྒྱུའི་ཐད་ལ་བགྲོ་གླེང་ཟབ་མོ་གནང་སོང་བ་དང་ཆབས་ཅིག་ཚོགས་ཆེན་ཁག་ལ་བསྐྱར་ཞིབ་ཡང་གནང་སོང༌།

གཅིག ཐེངས་འདིའི་ཚོགས་ཆེན་ཀྱིས་འབྲེལ་ཡོད་ཚོགས་ཆེན་སྔ་མ་ཁག་ལ་གཟིགས་ཚུལ།
རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་གྲོས་མོལ་ཚོགས་ཆེན་ཐོག་མ་དེ། རྒྱ་ནག་མང་གཙོ་ཡར་ཐོན་ཚོགས་པ་དང༌། རྒྱལ་མཚམས་མེད་པའི་འགྲོ་བ་མིའི་ཐོབ་ཐང་ཚོགས་པ། ཐེ་ཝན་མང་གཙོ་ཐེབས་རྩ་ཚོགས་པ། ཡོ་རོབ་བྷར་ལེན་ཉམས་ཞིབ་ཚོགས་པ་བཅས་ཀྱིས་མཉམ་འབྲེལ་གཙོ་སྐྱོང་འོག ཕྱི་ལུགས་ ༢༠༠༦ ལོའི་ཟླ་ ༥ པའི་ནང་འཇར་མན་གྱི་རྒྱལ་ས་ Berlin དུ་བསྐོངས་ཚོགས་ཀྱིས། ཐེངས་དེའི་ཚོགས་ཆེན་བརྒྱུད་རྒྱ་ནག་གཅིག་བསྡུ་དབང་བསྒྱུར་སྲིད་དབང་གིས་ཨེ་ཤ་ཡ་དང་དེ་ལས་ཀྱང་གཞི་རྒྱ་ཆེ་བའི་རྒྱལ་སྤྱིའི་ཚོགས་སྡེ་ཁག་གི་ས་ཁུལ་འདྲ་མིན་དང་རྒྱལ་སྤྱིའི་བདེ་འཇགས་ལ་ཉེན་ཁ་ཐོན་བཞིན་པ་གསལ་རྟོགས་བྱུང་སྟེ། སྐབས་དེས་ཚོགས་ཆེན་གྱིས་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་ལས་འགུལ་དེ་རྒྱལ་སྤྱིའི་མང་གཙོ་ལས་འགུལ་དང་མཉམ་འབྲེལ་གྱིས། ནུབ་ཕྱོགས་མང་གཙོ་རྒྱལ་ཁབ་ཁག་དང་ཨེ་ཤ་ཡའི་ཁུལ་གྱི་གཅིག་བསྡུ་དབང་བསྒྱུར་སྲིད་དབང་ལམ་ལུགས་ཀྱི་རྒྱལ་ཁབ་ཁག་ནང་གི་མང་གཙོ་དོན་གཉེར་ཅན་ཚོའི་བར་མཉམ་འབྲེལ་གནང་རྒྱུའི་ཐད་ནུས་པ་གཙོར་འདོན་གནང་རྒྱུ་དམིགས་སུ་བཟུང་ཡོད་པ་མ་ཟད། གཞན་ཚོགས་ཆེན་དེ་བསྐངས་པ་བརྒྱུད་ད་དུང་ཉི་ཧོང་གི་ཨེ་ཤ་ཡ་དང་རྒྱ་ནག་མང་གཙོར་བསྒྱུར་རྒྱུའི་རྒྱབ་སྐྱོར་ཚོགས་པ་དང༌།

དེ་ལས་མང་བ་། “༄༅།། ༢༠༠༨ལོའི་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་ཚོགས་ཆེན་ལ་ཞུགས་པའི་མྱོང་ཚོར།” »

ཨ་འབྲུག་དཀོན་མཆོག

ང་གློ་བུར་གྱི་ཆད་ཞོད་ཆེན་པོ་དེ་ལ་ཡོལ་ཆེད་ཟ་ཁང་ཞིག་དུ་འཛུལ་དུས་ངའི་ངོ་ཤེས་རྙིང་བ་ཞིག་བསྡད་འདུག་ཅིང༌། ཁོང་ནི་བོད་མི་ལྷག་བསམ་ཅན་གྱི་དཔེ་བཟང་གི་མི་སྣ་ཞིག་ཡིན་ལ། ཁོ་རང་དེང་སྐབས་བོད་མི་མང་སྤྱི་འཐུས་ལས་ཐོགས་པ་ཞིག་ཡིན། དུས་ཡུན་ཆུ་ཚོད་ཕྱེད་ཀ་ཙམ་གྱི་རིང་ངེད་གཉིས་ཁ་བརྡ་བྱས་པའི་བརྒྱུད་རིམ་ནང་ཁོང་གིས་ཉེ་ཆར་བོད་དོན་རྒྱབ་སྐྱོར་གྱི་ཚོགས་འདུ་ཞིག་གི་སར་བཅར་བའི་སྐོར་བཤད་བྱུང༌། དེ་ལས་ཀྱང་ཁོང་གིས་བཤད་པ་ལྟར་ན་ཚོགས་ཐོག་དེར་གནད་འགག་གི་སྐད་ཆ་གཉིས་བཤད་འདུག དེ་ཡང་བོད་ཀྱི་སྤྱི་འཐུས་ཤིག་གིས་བཙན་བྱོལ་བོད་གཞུང་གི་མཛད་གཙོ་དག་ལ་འཆར་གཞི་མེད་པ་དང༌། ཁོང་ཚོའི་བོད་རང་བཙན་རྒྱ་ནག་ལ་ཕར་སྤྲད་པ་ལས་བོད་ལ་ཚུར་གང་ཡང་རེག་མེད་ཚུལ་བཤད་འདུག་པ་དང༌། འཇར་མན་པ་བོད་དོན་རྒྱབ་སྐྱོར་བ་ཞིག་གིས་ངས་བལྟས་ན་༸གོང་ས་སྐྱབས་མགོན་ཏཱ་ལའི་བླ་མའི་དབུ་ཁྲིད་དེ་བོད་མི་ཚོ་ལ་མཚོན་ན་ནུས་མེད་ཅིག་རེད། དེང་སང་སྤྱི་མཐུན་གྱི་སྐད་ཆ་ཞིག་ཏུ་སྤྱིར་བཏང་མང་གཙོ་གལ་ཆེ་རུང་དམག་འཐབ་ཀྱི་དུས་སུ་སྟོབས་ཤུགས་ཆིག་བསྒྲིལ་ཡིན་དགོས་ཞེས་བཤད་སྲོལ་ཡོད་ཀྱང༌། ཁྱེད་རང་ཚོ་དམག་འཐབ་ཀྱི་སྐབས་སུ་ཡང་ཆིག་བསྒྲིལ་རེད་མི་འདུག་ཅེས་བཤད་ཡོད་འདུག དེ་ནི་མཐོང་སྣང་མི་འདྲ་བ་གཉིས་ཀྱི་སྣེ་མོ་ནས་ཕྱོགས་བསྡོམས་བྱས་པའི་ང་ཚོའི་གནས་སྟངས་ཤིག་རེད།

དེ་ལས་མང་བ་། “དམག་འཐབ་ཀྱི་སྐབས་སུའང་ཆིག་བསྒྲིལ་མེད་པའི་བོད།” »

༄།ཉེ་ཆར་རྒྱ་གར་གྱི་དུས་བབ་ཅེས་པའི་གསར་ཤོག་ཏུ་བལ་ཡུལ་མའོ་དམར་ཤོག་ཚོགས་པས་༸གོང་ས་མཆོག་གིས་བལ་ཡུལ་གྱི་ཡུལ་མི་ན་གཞོན་མང་པོ་ཞིག་བཙན་བྱོལ་ནང་གི་དགོན་སྡེ་ཁག་གི་ནང་དུ་བཅུགས་ནས་བསམ་བློ་བཅོས་བསྒྱུར་གྱི་སློབ་གསོ་གཏོང་གི་ཡོད་ཚུལ་གྱི་སྐྱོན་འཛུགས་བྱས་ཡོད་ཚུལ་གྱི་གནས་ཚུལ་ཞིག་བཀོད་པ་དང༌།བཙན་བྱོལ་བོད་གཞུང་གི་མགྲིན་ཚབ་པསགནས་ཚུལ་དེ་ནི་གཞི་རྩ་གཏན་ནས་མེད་པའི་སྐྱོན་འཛུགས་ཤིག་རེད་ཅེས་ལན་འདེབས་བྱས།གནས་ཚུལ་དེ་ཐོས་མ་ཐག་ཕྲན་གྱི་བསམ་ངོར་རང་ཉིད་ཀྱི་མཐོང་ཐོས་ཀྱི་གནས་ཚུལ་མང་པོ་ཞིག་ཝ་ལེར་ཤར་བྱུང་།དོན་ངོ་མར་༸གོང་ས་སྐྱབས་མགོན་ཆེན་པོ་མཆོག་ནི་གྲྭ་བའི་གྲངས་འབོར་ལས་སྤུས་ཀ་གལ་ཆེན་དུ་གཟིགས་མཁན་ཞིག་ཡིན་ལ།མི་གཞན་གྱི་བསམ་བློ་བཅོས་བསྒྱུར་བྱེད་པའི་ལས་རིགས་ལ་གཏན་ནས་མི་དགྱེས་པ་ཞིག་ཡིན་པས་ཁོང་ལ་སྐྱོན་འཛུགས་འདི་འདྲ་བྱས་པ་ནི་དངོས་གནས་གཞི་རྩ་མེད་པ་ཞིག་ཡིན་པ་བཤད་མ་དགོས་པ་ཞིག་རེད་མོད།སྦྱིན་བདག་གི་མདུན་སར་གྲྭ་གྲངས་སྟོན་པའི་ཆེད་དང༌།རང་ཉིད་ཀྱི་དགོན་སྡེ་དང་ཁོར་ཚོགས་དེ་ཕྱི་ཚུལ་གྱི་རྫིག་ཉམས་དང་གྲངས་འབོར་ཙམ་གྱི་ངོམས་སྟོན་ལ་རེ་བའི་བོད་ཀྱི་དགོན་སྡེ་འགའ་ཞིག་དང་བླ་སྤྲུལ་རེ་ཟུང་གིས་རྒྱ་བལ་མཐའ་མཚམས་ཀྱི་ཕྲུ་གུ་ཆུང་ཆུང་མང་པོ་ཞིག་བསྡུ་ལེན་བྱེད་ཀྱི་ཡོད་པ་དེ་ཡང་དངོས་ཡོད་གནས་ཚུལ་ཞིག་རེད།

དེ་ལས་མང་བ་། “༸གོང་ས་མཆོག་ལ་སྐྱོན་འཛུགས་དང༌། བོད་མིའི་སྤྱི་ཚོགས་ཀྱི་དོན་དངོས།” »