ད་ཐེངས་ང་ཚོའི་སྐུ་ཚབ་རྣམ་པས་བཀའ་བཀྱོན་གཟེད་ཤག འདོད་བྨོ་མ་ཁེངས་པར་ཕྱིར་ཕེབས་ཤག རྗེས་མ་དེ་ཟླ་བཅུ་བའི་ནང་ལ་ཕེབས་རྒྱུ་རེད་ཤག ཨོ་ལིམ་ཕིག་མ་འཚོགས་སྔོན་འདི་འདྲའི་རྣམ་འགྱུར་བསྟན་པ་ཡིན་ན་འཚོགས་ཚར་བའི་རྗེས་དེ་ལས་ཀྱང་སྡུག་པ་ཆགས་ཀྱི་རེད་བསམ་ཤག ད་རེས་ཁོང་རྣམ་པ་ཚོ་སེམས་ཤུགས་ཞེ་དྲག་ཆགས་ཤག ད་ག་རེ་བྱ་དགོས་རེད། མུ་མཐུད་འགྲོ་དགོས་མ་རེད་པས། བདེན་པའི་ཨུ་ཚུགས་ཅུང་བརྒྱབ་དགོས་མ་རེད་པས། ངའི་སེམས་ཁྲལ་ནི་ད་རེས་ཁོང་ཚོ་སེམས་ཤུགས་ཆགས་སྟངས་དེར་བལྟས་ན་བདེན་མཐའ་གསལ་གསལ་བར་ཨུ་ཚུགས་རྒྱག་ཐུབ་ས་མ་རེད་གོ
ཐེངས་བདུན་པ་དེ་ཐེངས་མཐའ་མ་ཡིན་ནམ།
བོད་རྒྱ་ཞི་མོལ་ལམ་ཞུ་མོལ། འབྲེལ་མོལ་གང་ཡིན་ཡང་། ཐེངས་བདུན་པ་ཉེ་ཆར་གྲུབ་པའི་གསར་འགོད་གསལ་བསྒྲགས་ཤིག་དམིགས་བསལ་སྐུ་ཚབ་གཉིས་ཀྱི་མཚན་ཐོག་ནས་ སྤྱི་ཟླ་ ༧ པའི་ཚེས་ ༥ ཉིན་རྡ་རམ་ལ་ས་ནས་སྤེལ་འདུག ཐེངས་འདིར་ཡང་འཛོམས་ས་པེ་ཅིན་ཡིན་པ་ཙམ་ལས་སྐད་ཆ་གསར་པ་ཞིག་མི་འདུག་བསམས་སོང་། འོན་ཀྱང་ཐེངས་འདིར་བློ་སྤོབས་འཕར་བ་ཞིག་ནི་རྒྱ་རི་བློ་གྲོས་རྒྱལ་མཚན་གྱི་ངོས་ནས་རྒྱ་ནག་གི་དཔོན་རིགས་འཕྲད་པ་དེ་ཚོར། “ང་ཚོའི་གྲོས་མོལ་གྱི་སྐབས་སུ། ང་ཚོས་ཐད་ཀར་ང་ཚོའི་འབྲེལ་གཏུགས་བྱ་ཡུལ་རྣམས་ལ་ཁྱེད་རང་ཚོའི་ངོས་ནས་ཆོད་སེམས་དང་ལྷག་བསམ་རྣམ་དག་མེད་པ་ཡིན་ན་ད་ལྟའི་གྲོས་མོལ་འདི་མུ་མཐུད་ནས་བྱེད་པ་ལ་དགོས་དོན་མི་འདུག་ཅེས་ནན་བཤད་བྱས་ཡོད།” ཞེས་འཁོད་པ་འདི་རེད་བསམས། མི་དྲགས་ནད་པ་ཤི་ན་དགའ༎ མི་འགྲིགས་བཟའ་ཚང་འཐོར་ན་དགའ།…
བོད་པ་དང་དད་པ་གཉིས་གཅིག་རེད་དམ།
ཨ་འབྲུག་དཀོན་མཆོག
མི་བུ་ཆེན་པོར་རློམ་མཁན་ཞིག་གིས་གཏམ་བརྗོད་བྱེད་ཀྱི་འདུག། བོད་པ་བཤད་ཀྱིན་འདུག དད་པ་བཤད་ཀྱི་འདུག བོད་པ་དང་དད་པ་གཉིས་མཉམ་དུ་བཤད་ཀྱི་འདུག མཐའ་མཇུག་དད་པ་མེད་ན་བོད་པ་མིན་པ་དང་བོད་པ་ཡིན་ན་དད་པ་ཡོད་དགོས་ལྟ་བུ་བཤད་ཀྱི་འདུག ཁོ་བས་དད་པ་ནི་རིག་གནས་ཤིག་གི་སྲོག་སྙིང་དང་སྤྱི་ཚོགས་ཤིག་གི་རྟེན་གཞི་མི་རིགས་ཤིག་གི་ངོ་རྟགས་སུ་སྙམ་བཞིན་པ་འདྲ་ལ། དད་མ་མེད་སོང་ན་རིག་གནས་ཉམས་སོང་བ་དང་སྤྱི་ཚོགས་འཐོར་སོང་བ་མི་རིགས་བརླགས་སོང་བར་མཐོང་བཞིན་ཡོད་པ་འདྲ། འོན་ཀྱང་ངས་ནི་ཁོའི་གཏམ་བཤད་དེའི་རྒྱབ་ནས་གོ་དོན་གཞན་ཞིག་རྟོགས་ཡོང་གི་འདུག ཁོའི་དད་པ་གཙོ་བོར་བཤད་པ་དེ་མི་རིགས་ཀྱི་ཆེད་རེད་དམ་རིག་གནས་ཀྱི་ཕྱིར་རེད་དམ། ཡང་ན་ཁོའི་སྐད་ཆ་དེ་ནི་རང་ཉིད་དང་རང་ཉིད་གང་དུ་གཏོགས་པའི་གྲལ་རིམ་དེའི་ཆེད་རཻད།
བོད་སྤྱི་སྐད་གསར་བཟོའི་སྐོར་གྱི་བགྲོ་གླེང༌།
ཨ་མདོ་བས། སྤྱི་སྐད་གཟིགས་བཟོ་ཝ་ནི་མ་རེ། འདི་ན་འུ་ཆོས་རང་གི་བོད་སྐད་ར་མ་ཤེས་བསྡད་ཡོད་གི་མོ། ལྷ་སའི་པོད་སྐད་ཡིན་ན་དི་ཟོ་ངི་ཟིས་གཅིག་ར་མི་གོ་གི། སི་ཁྲོན་ཁམས་སྐད་གི་ནང་ན་གོ་ནིས་ཙ་གི་ཙིག་གེ་ཡོད་ཁི། ཨ་ལ་ལ་ཡིན་ན་དེ་ར་མང་ཆེ་མི་གོ་གི། དི་ངི་བསམ་ཙུལ་རེ། ཨམ་ཕྲུག་གིས། ཨེ་མ། སྤྱི་སྐད་ཡ་སྤྱི་སྐད། ཁྱོད་ནི་ང་ཚོའི་བླ་སྲོག་རེད་ཡ། ཁྱོད་མེད་ན་ང་ཚོས་གསར་བཏོད་ཀྱི་ལམ་ཆེན་ཇི་ལྟར་བཏོད། ཁྱོད་མེད་ན་ང་ཚོས་རྙིང་ཞེན་གྱི་ལྕགས་སྒྲོགས་ཇི་ལྟར་གཏོར། ཨ་ཧ་ ཨ་ཧ་…
དེ་ལས་མང་བ་། “བོད་སྤྱི་སྐད་གསར་བཟོའི་སྐོར་གྱི་བགྲོ་གླེང༌།” »
རྒྱ་མིས་བོད་ལ་རྒྱབ་སྐྱོར།
སྤོབས་པ་མཐའ་ཡས། ད་ལོའི་བོད་ནང་དུ་ཞི་རྒོལ་བྱུང་བར་རྒྱ་ནག་གཞུང་གིས་དྲག་གནོན་བྱས་སྐབས་རྒྱ་མིའི་ཤེས་ཡོན་ཅན་དང་ཁྲིམས་རྩོད་པ་སུམ་ཅུ་ལྷག་ཅིག་གིས་བོད་མི་ལ་རྒྱབ་སྐྱོར་བྱེད་དགོས་ཚུལ་རྒྱ་ནག་གཞུང་ལ་སྙན་ཞུ་ཕུལ་སྐད་འདུག། དེ་གནད་ཆེན་པོ་རེད་སྙམ་བྱུང་ཡང་གནས་ཚུལ་གསལ་པོ་ཞིག་གོ་མ་བྱུང༌། ཁྱེད་རྣམ་པ་ཚོས་དེའི་སྐོར་གསལ་པོ་རེ་གོ་བྱུང་ངམ། རྒྱ་མི་སུ་དང་སུ་ཡོད། དེ་ཚོ་མི་སྣ་གནད་ཆེ་ཆུང་ག་འདྲ་ཡིན་ནམ། སྙན་ཞུ་ཇི་འདྲ་ཞིག་ཕུལ་བ་ཡིན་ནམ། རྒྱ་ནག་གཞུང་གིས་དེ་ལ་ཡ་ལན་འདྲ་བྱས་ཨེ་ཡོད། རྒྱ་ནག་རང་གིས་མི་དམངས་ཚོས་དེའི་སྐོར་ལ་ལྟ་སྟངས་ག་འདྲ་ཡོད་དམ། མདོར་ན་སྙན་ཞུ་དེས་ཤུགས་རྐྱེན་གང་འདྲ་ཞིག་ཐོན་ཐོན་དམ། དྲྭ་གྲོགས་རྣམས་པ་ཚོས་འདིའི་སྐོར་རེ་གསུངས་རྒྱུ་ཡོད་ན་གསུངས་རོགས། ངས་སྐོམ་པ་ཆུ་འདོད་བཞིན་ཤེས་འདོད་ཆེ།
དོགས་སློང་། ༣
གོང་མ་མཆོད་ཡོན་ལས་འཕྲོས་ཏེ་ངས་ཀྱང་དོགས་སློང་གི་ཡི་གེ་གསུམ་ཙམ་ཁྱེད་ལ་འབྲི་དགོས་བྱུང་། ད་འདིར་གནས་ཚུལ་མི་མཐུན་པ་གསར་པ་དེ་འདྲ་མང་པོ་མེད། མི་མཐུན་པ་ཁ་ཤས་ཅིག་ཡོད་པ་འདིར་ཡང་སྐྱར་བྲིས་ཡོད། སྤྱིར་བཏང་འབྲེལ་བ་དེའི་རིགས་ལ་ཕན་གནོད་གཉིས་ཀ་ཡོད་རྒྱུ་རེད། ད་མང་པོ་འབྲི་འདོད་མེད། ཐང་ཡང་ཅུང་ཆད་སོང་། ཁྱེད་རང་གིས་ག་རེ་བྲིས་མ་བྲིས་རང་གི་འདོད་པ་རེད། མ་གཞི་གང་ཞིག་འབྲི་ནའང་ཕྱོགས་ཡོང་ནས་བསམ་བློ་གཏོང་རྒྱུ་དེ་གལ་ཆེན་པོ་རེད། ངས་ཁྱེད་ལ་ལྡོག་ཕྱོགས་ཁོ་ན་ནས་དཔེ་མཚོན་ཁ་ཤས་དྲངས་པ་ཙམ་ཡིན། ༡ སོག་པོས་ཨི་རན་ནང་དགོན་པ་བཞེངས་པའི་སྐོར། ཇོན་མན་གྱིས་བརྩམས་པའི་ཀུབ་ལི་ཁན་ཞེས་པ་དེར་ལྟ་རོགས་གནང་། ༢ རྒྱལ་པོ་ཡིན་ན་མི་སེར་ citizen…
གོང་མ་མཆོད་ཡོན་གྱི་སྐོར་ལ་ལན་གནང་བར་ཐུགས་རྗེ་ཆེ།
སྤོབས་པ་མཐའ་ཡས
ལེ་ཚན་དང་པོའི་སྐོར། སོག་པོས་ཨི་རན་ནང་ལ་བོད་བརྒྱུད་ནང་པའི་དགོན་པ་བཞེངས་ཚུལ་དེ་ཞིབ་གསལ་ཞིག་འབྲི་རོགས། ས་པཎ་སོག་པོར་མ་ཕེབས་གོང་སོག་པོས་བོད་ཡོངས་རྫོགས་དབང་བསྒྱུར་བྱེད་ཐུབ་མེད་པ་ནི་ས་པཎ་གྱི་སྤྲིངས་ཡིག་ཏུ་བོད་དབུས་གཙང་གི་མི་ཚོས་ད་དུང་ཡང་སོག་པོ་འཐབ་རྒྱུ་དང༌། ས་ཐག་རིང་བས་མི་ཡོང་རྒྱུ་སོགས་ཀྱི་རེ་བ་བྱེད་བཞིན་ཡོད་ཚུལ་བྲིས་པ་ལས་གསལ་པོར་ཤེས་ནུས། དོན་དུ་སོག་པོ་ལ་བོད་པས་འཐབ་མི་ནུས་པའི་རྒྱུ་མཚན་ཡང་བགྲང་རྒྱུ་མེད། ས་ཐག་རིང་བ་དང་མི་སྡེ་ཁ་འཐོར་ཡིན་པ། སོག་པོ་ལ་འགྲན་ཡ་བྱེད་པའི་དོག་པ་མེད་པ། སྟབས་གཅིག་ཏུ་རྒྱུ་ནོར་གྱི་ཡོང་འབབ་ཆེན་པོ་མེད་པ་སོགས་ལ་བརྟེན་ནས་སོག་དམག་མི་ཡོང་ཤས་ཀྱང་ཆེ། བྱུང་བ་དེ་ཚོར་བསམ་སྐབས་སོག་པོ་ལ་ཆོས་སྤེལ་མཁན་དང་སོག་པོས་ནང་ཆོས་ནང་འདྲེན་བྱས་པ་དེ་གཉིས་ཆར་ཡང་ཕུགས་ཀྱི་ཀུན་སློང་དེ་རང་རང་སྒེར་གྱི་ཁེ་ཕན་འཚོལ་བྱེད་ཅིག་སྟེ་མདོར་བསྡུས་ན་མང་ཚོགས་ཀྱི་རྨོངས་དད་བེད་སྤྱད་དེ་དབང་བསྒྱུར་བྱེད་པའི་བསམ་བློ་མ་རུང་བས་གོས་འདུག་སྙམ། དཻའི་དཔེ་མཚོན་གསལ་ཤོས་ནི་ང་ཚོའི་བླ་ཆེན་ཚོས་མཚམས་རེར་སོག་པོའི་རྨོངས་དད་བེད་སྤྱད་དེ་བོད་ནང་ཁུལ་ལ་སོག་དམག་དྲངས་ཏེ་འཕྲོག་བཅོམ་གྱི་བྱ་བ་སྤེལ་མྱོང་བ་དཔེར་ན། ས་སྐྱ་བས་འབྲི་ཁུངས་པ་བཅོམ་པ་དང༌། ཀར་མ་བཀའ་རྒྱུད་པའི་ཕྱོགས་ཀྱི་ཆོག་ཐུའི་བུ་ཨར་ས་ལང་གི་དམག་བོད་དུ་བོས་པ། དགའ་ལྡན་ཕོ་བྲང་པས་གུ་ཤྲི་ཁང་བེད་སྤྱད་ནས་ཀརྨ་བཀའ་རྒྱུད་དང་ཇོ་ནང་པ་སོགས་མང་པོ་ཞིག་རྨག་མེད་དུ་བཏང་བ། འཇམ་བཞད་ཀྱིས་སོག་པོའི་ངོ་སྲུང་ཆེད་སྡེ་སྲིད་སངས་རྒྱམ་པའི་སྲིད་དབང་གཏོར་བ་སོགས་ལ་བསམ་སྐབས་བོད་པས་སོག་པོ་ལེགས་ཕྱོགས་སུ་ཁྲིད་ནུས་མེད་ཐོག་སོག་པོ་དང་འབྲེལ་བ་བཙུགས་པ་དེས་བོད་ལ་བརྡབ་བསིགས་དང་གནོད་སྐྱོན་ཧ་ཅང་མང་པོ་བྱུང་འདུག
དེ་ལས་མང་བ་། “གོང་མ་མཆོད་ཡོན་གྱི་སྐོར་ལ་ལན་གནང་བར་ཐུགས་རྗེ་ཆེ།” »
བོད་ ཡིག་ ཚེགས་ འཇོག་ སྟངས་ གཞན་པ།
གྲོགསཔོ་ ཚོ། ང་ཚོས་ བོད་ཡིག་ འདི་ལྟར་ བྲིས་ ཚེ་ ཀློག་བདེ་བ་ དང་། མིག་ ལ་ གནོད་པ་ ཆུང་བ་ མི་འདུག་གམ། ནུབ་ཕྱོགས་ ཀྱི་ ཡི་གེ་ འབྲི་སྟངས་ དེ་ མིག་ལ་ གནོད་པ་ ཆུང་བ་ འདུག་ ཅེས་ ཚན་རིག་པ་ ཚོས་ གསུངས་ཀྱི་འདུག ང་ཚོས་ ཀྱང་ ལེགས་པའི་ ཆ་རྣམས་ ལེན་ནས་ ང་ཚོའི་ སྐད་ཡིག་ འདི་ ཕུན་སུམ་ ཚོགས་སུ་ བཏང་ ཐུབ་ ན་ ཅིས་ ཀྱང་ མི་ ལེགས་ སམ། ཡང་ ན་ འབྲི་ སྟངས་ གཞན་ ཞིག་ ནི། ཟླ་ བ་ འདི་ ནི་ ཕར་ འགྲོ། གཏིང་ མའི་ ཟླ་ བ་ ཚུར་ འགྲོ། བཀྲ་ ཤིས་ ཟླ་ བ་ དཀར་ པོ། ཟླ་ སྟོད་ ཕྱོགས་ ནས་ མཇལ་ ཡོང་། བར་ ཚེགས་ ལ་ འདི་ ལྟར་ སྟོང་ ཆ་ འཇོག་ ཐུབ་ ན་ ཡིག་ འབྲུ་ ཆུང་ ཀྱང་ གསལ་ པོར་ མཐོང་ ཐུབ་ གསུངས།
བོད་ནང་གི་བོད་ཡིག་དྲ་རྒྱ་ཁག་གཅིག
གྲོགས་པོ་ཚོ། ཕྲན་གྱིས་གཤམ་གསལ་གྱི་བོད་ཡིག་དྲ་རྒྱ་ཁག་མཐོང་བྱུང་། གཞན་དྲ་རྒྱ་གང་དང་གང་ཡོད་སྐོར་ང་ཚོས་ཕན་ཚུན་ལ་ངོ་སྤྲོ་ཅིག་བྱེད་ཡ། དེ་བས་སྤྱན་གྱིས་གང་གཟིགས་རྣམས་ཀྱི་མཚན་དང་ཁ་བྱང་འདིར་འགོད་རོགས་གནང་། མཆོད་མེ། http://www.tibetcm.com/index.html བོད་ཀྱི་སྐད་ཡིག http://www.tibettl.com/ བོད་ལྗོངས་རིག་གནས་དྲ་བ། http://zw.tibetculture.net/
འདུས་བྱས་ཐམས་ཅད་མི་རྟག་པ་ཡིན་མི་སྲིད།
དེ་རིང་ངས་གནའ་བོའི་གྷི་རིག་ཁོངས་ཨ་ཐིན་གྱི་མཚན་ཉིད་རིག་པ་བ་རྣམས་ཀྱི་སྐོར་ཅུང་ཟད་ཅིག་ཀློག་པ་ཡིན།། ཕི་ལ་ཐུ་ཡིས་དངོས་པོ་ཚང་མ་འགྱུར་བའི་རང་བཞིན་ནམ་འགུལ་སྐྱོད་ཅན་གྱི་རང་བཞིན་ཡིན་པ་བརྗོད་འདུག ཕལ་ཆེར་ཕི་ལ་ཐུ་ཡི་སྔ་ཙམ་མིན་ནམ་བདག་ཅག་གི་སྟོན་པ་ཤྰཀྱ་ཐུབ་པས་འདུས་བྱས་ཐམས་ཅད་མི་རྟག་པ་ཞེས་གསུངས། དེ་ཚན་རིག་པ་མང་པོ་ཞིག་གིས་གླེང་བཞིན་པའི་ impermanant དང་གཅིག་མཚུངས་སུ་འགྱུར། ཡིན་ན་ཡང་འགྲེལ་ཚུལ་ལ་ཅུང་མི་འདྲ་བ་ཡོད་སྲིད། དེ་མི་ཤེས། འདིར་ང་ལ་དྲི་བ་འདྲ་མིན་ཞིག་འཁོར་བྱུང་བས་ཁྱེད་ཚོ་དང་མཉམ་དུ་གླེང་མོའམ་བློ་འདྲི་བར་སྤྲོ། ལྷག་པར་དུ་མཚན་ཉིད་རིག་པ་བ་དང་གྲ་བ་དང་གྲ་ལོག་དེ་འདྲ་ཡོད་ན། ཐམས་ཅད་མི་རྟག་པའི་ཀློང་ན་འཁོར་བཞིན་པའི་མི་རྟག་པའི་ཁམས་འདིར་ངེས་པར་དུ་རྟག་པའི་དངོས་པོ་གཅིག་ཡོད་དགོས་པར་འདུག དེ་ཡང་དང་པོར་ང་ཚོའི་འཇིག་རྟེན་འདི་ཇི་ལྟར་གྲུབ་པ་ལ་བསམ་བློ་ཞིག་ཐོང་། རྒྱུ་གང་གིས་བསྐྱེད་པ་རེད། རྒྱུ་དེ་འདུས་བྱས་ཡིན་ནམ་མིན། དེ་དྲི་བ་ཞིག་རེད།…
བོད་ཀྱི་དེང་དུས་ཀྱི་སྙན་ངག་མཁན་མང་པོ་ཞིག་ནི་ཤེས་བྱའི་ན་གསོ་མ་ལོན་པའི་བྱིས་པ་ལྟ་བུར་སྣང་།
བོད་ཀྱི་དེང་དུས་ཀྱི་སྙན་ངག་མཁན་མང་པོ་ཞིག་ནི་ཤེས་བྱའི་ན་གསོ་མ་ལོན་པའི་བྱིས་པ་ལྟ་བུར་སྣང་། སྤྱིར་འཛམ་བུ་གླིང་འདིར་ཁྱོད་མཛེས་པོ་འདུག་ཟེར་བ་དང་། ང་མོ་དྲན་གྱི་འདུག་ཟེར་བའི་སྙན་ངག་གི་དུས་ཚོད་ཡོལ་འཚར་བ་རེད། ཡིན་ནའི་དེང་གི་བོད་པ་སྙན་ངག་འབྲི་མཁན་མང་པོ་ཞིག་ལ་སྒྱུ་རྩལ་དང་། ཚན་རིག སྤྱི་ཚོགས་རིག་པ། དཔལ་འབྱོར། དེ་བཞིན་དམག་སྲིད་སོགས་ཀྱི་སློབ་གསོ་ཐོབ་མེད་ཙང་ཁོང་རྣམས་ལ་འབྲི་བྱའི་ནང་དོན་གཞན་མེད་པ་ལྟ་བུར་སོང་ནས། “ང་ཁྱོད་དྲན་ནས་སྨྱོ་བ་འདུག ཁྱེད་ཀྱི་མཚན་མ་འདི་ད་ལྟ་རང་དགོས་ཡོད།” ཟེར་བ་སོགས་ཀྱི་རང་གི་འཚོར་བ་འདི་ཇི་ཙམ་དམར་རྗེན་དང་སྒྲོ་བཏགས་ཀྱིས་སྟོན་ཐུབ་པ་དེ་ཙམ་གྱིས་སྙན་ངག་མཁན་དེ་བློ་གྲོས་ཅན་ལ་བརྩི་སྲོལ་འདུག དེ་ཅུང་ཐབས་སྐྱོ་པོ་རེད་སྙམ། སྔོན་བྱོན་བོད་ཀྱི་མཁས་པ་རྣམས་ཀྱིས་སྙན་ངག་གི་ཆེད་དུ་སྙན་ངག་དོན་གཉེར་བྱེད་ཀྱི་མེད་ཚོད། ཁོང་ཚོས་སྙན་ངག་འདི་རང་ལ་ནང་དོན་རིག་པ་དང་རིག་གནས་ཆེ་བ་གཞན་ཚོའི་ཤེས་བྱ་ལེན་ཆེད་དང་། ཤེས་བྱ་དེ་ཚོ་གཞན་ལ་སྤྲོད་ཆེད་ཀྱི་ལག་ཆ་ལྟ་བུར་ངོས་འཛིན་གནང་གི་ཡོད་ཚོད། ཁོང་རྣམས་ཀྱིས་གོང་གི་ཤེས་བྱ་དེ་དག་ལ་ལེགས་པར་སློབ་རྗེས། སྙན་ངག་སོགས་ཀྱི་སྲོལ་དེ་དག་བེད་སྤྱད་ནས་གཞན་ལ་ཤེས་བྱ་དེ་དག་འཆད་སྤེལ་གནང་སྲོལ་འདུག དཔེར་ན་རྗེ་རིན་པོ་ཆེའི་ལམ་རིམ་ཉམས་མགུར་དང་། རྫ་དཔལ་སྤྲུལ་གྱི་མི་རྟག་དྲན་སྐུལ་ལྟ་བུ་ཡིན། ཁོང་ཚོའི་སྙན་རྩོམ་དེ་དག་གི་རིན་ཐང་ནི་སྙན་ངག་གཅིག་པུའི་སྤུས་ཚད་མིན་པར། གཏིང་ཟབ་པའི་ཆོས་ཀྱི་རྟོགས་པ་དེ་དག་གཞན་ལ་གོ་སླའི་ངང་ནས་གདམས་ཐུབ་པ་དང་། ངོ་སྤྲད་ཐུབ་པ་སོགས་ཡིན། དེང་སང་གི་སྙན་ངག་པ་ཚོར་སྙན་ངག་འགྲོ་ལུགས་འབའ་ཞིག་ལས་གཞན་གྱི་ཤེས་བྱ་མཁྱེན་གྱི་མེད་པ་ལྟ་བུར་སྣང་། གཅིག ཁོང་རྣམས་ཀྱི་འབྲི་བྱའི་ནང་དོན་དེ་ཆོ་མེད་ལྟ་བུའམ་ཡང་ན་ཀུན་གྱི་ཆོས་ཉིད་དུ་སོང་བ་་ལས། དམིགས་བསལ་གྱི་ནང་དོན་དང་ཉམས་མྱོང་གསར་པ་གང་མེད་པ་དཔེར་ན་བུད་མེད་ཀྱི་ལུས་ཀྱི་གནས་ག་གེ་མོ་ཞིག་ལ་སྒྲོ་ཆེན་པོ་ཞིག་བཏགས་པ་གཅིག་པུ་ཙམ། གཉིས། བྲི་བྱེད་སྙན་ངག་གི་རྩལ་ཡང་གཞན་གྱི་ལད་མོ་ཤ་སྟག་ལས་དེར་ལུགས་དང་སྲོལ་གསར་གཏོད་དམ་འབྲི་སྟངས་ཁྱད་ཆོས་གསར་པ་གང་ཡང་མེད་པ་དཔེར་ན་དོན་རྒྱན་སོ་ལྔ་དང་དཔེ་རྒྱན་སོ་གཉིས་ལས་མ་འདས་པ་ཤ་སྟག གསུམ། འབྲི་མཁན་གྱི་ཀུན་སློང་ཡང་ “རང་མཐོ་རང་མཛེས་”གཅིག་པུ་མངོན་པའི་བག་ཆགས་འཇོག་པ་ལས། སྙན་རྩོམ་དེ་ཚོར་དུས་ཚོད་དང་རིག་གཞུང་། མི་རིགས་དང་ལྟ་བ་སོགས་ནས་སྒྲོལ་ནས་ཁྱབ་ཆེ་བའི་མིའི་རིགས་ལ་ཕན་ཐོག་པའི་བག་ཆགས་རྟིལ་འབྲུ་ཙམ་ཡང་མེད་པ་ལྟ་བུར་མངོན། དེར་བརྟེན་སྙན་ངག་དེ་དག་ཁོང་ཚོའི་གནས་འབབ་ཀྱི་བསམ་བློ་དང་བོད་ཡིག་ཆུ་ཚད་ལས་བརྒལ་ནས་སྐད་ཡིག་གཞན་ཞིག་གི་ནང་སྒྱུར་ན་ངུ་མི་ཤེས་པ་དང་བགོད་མི་ཤེས་པའི་སྲོག་མེད་ཡི་གེ་ཁོ་ནར་སོང་སྟབས་རིན་ཐང་འགའ་ཡང་མེད་པ་ལྟ་བུ་གནང་། གོང་གི་དཀའ་ངལ་དེ་དག་ཐུག་ས་ནི་གཅིག་ཁོ་ན་སྟེ། ངེད་ཚོའི་སྙན་ངག་མཁན་པོ་དག་གི་སློབ་གསོའི་ཆུ་ཚད་ཤིན་དུ་དམའ་བའི་དབང་གི་ཡིན་སྟབས། གནད་དོན་དེར་ངེས་པར་བསམ་བློ་ཞིག་མ་བཏང་ན་དེང་གི་བོད་ཀྱི་སྙན་རྩོམ་མང་པོ་ཞིག་མི་རབས་རྗེས་མའི་བོད་ཀྱི་རྒྱུད་པ་ཚོའི་སྨ་འབེབ་གཏོང་ཡུལ་གྱི་ངན་རྩོམ་ཤ་སྟག་ལ་འགྲོ་བའི་ཉེན་ཁ་མི་ཆེའམ།
ཕ་ཡུལ་གྱི་དངངས་སྐྲག
གཡང་སྐྱབས་རྒྱལ་གྱིས།
ཉིན་ཁ་ཤས་གོང་གི་ཞོགས་ཀ་སྔ་མོ་ཞིག་ལ་ཕྲན་ལ་ཁ་པར་ཞིག་འབྱོར་ནས། རེབ་གོང་རོང་བོ་དགོན་གྱི་གྲྭ་འཇིགས་མེད་ཟླ་བ་འཛིན་བཟུང་བྱས་པ་རེད་ཟེར། ཁོང་དང་ལྷན་དུ་གྲྭ་བ་གཞན་འགའ་ཡང་འཇུས་པ་རེད་ཟེར། ད་ནངས་ཀྱང་ང་ལ་ཁ་པར་ཞིག་འབྱོར་ནས། ཁ་སང་དེ་རིང་རེབ་གོང་རོང་བོ་དགོན་པའི་དགེ་འདུན་པ་སུམ་བཅུ་ཐམ་པ་གར་ཡོད་ཆ་མེད་(Missing)ཡིན་པ་དང་། གྲྭ་པ་གཅིག་དམར་གསོད་བཏང་བ་(Mudered)རེད་ཟེར།
བོད་རྒྱ་ཞི་མོལ།
ངས་བལྟས་ན་དེ་བོད་རྒྱ་ཞི་མོལ་མ་རེད་ཞུ་མོལ་རེད། སྐུ་སྐྱིད། སྐུ་སྐྱིད་ཅེས་ཞུ་བ་འཐེན། སྐེ་བསྟན། ལྕེ་ལེ་གནར། ཕྱག་འཚལ་དེ་འདྲ་བྱས་ན་དེ་ཞི་བའི་འཐབ་རྩོད་ཀྱི་ཆ་ཤས་ཤིག་ཏུ་འགྲོ་གི་ཡོད་རྒྱུ་རེད། གྲུབ་འབྲས་ཅུང་ཟད་རེ་ཐོབ་མ་སྲིད་པ་མ་རེད། རྒྱ་ནག་གིས་སྲིད་དོན་འཁྲབ་ཀྱི་ཡོད་རེད། མགོ་སྐོར་གཏོང་གི་ཡོད་རེད་ཅེས་བསྡད་བསྡད་ན་དོན་ག་ལ་འགྲུབ། མགོ་སྐོར་ག་ཚོད་གཏོང་ན་གཏོང་ཆུག དེ་ང་ཚོའི་རྒྱལ་ཁ་ལས་ཕམ་ཁ་ཅི་ལ་ཡིན། ཁྱེད་ཚོ་སྐྲག་དགོས་གི་མ་རེད། འཛམ་གླིང་མི་མང་གིས་བལྟས་བསྡད་ཡོད་རེད། མགོ་སྐོར་ག་ཚོད་ཀྱིས་མང་ང་བཏང་ན་ང་ཚོའི་བདེན་པའི་རྒྱབ་རྩར་ལངས་མཁན་མང་དུ་འགྲོ་གི་རེད། མང་པོ་བཤད་རྒྱུ་མེད།…
བསྟོད་ར་བཏང་ནས་ཁྲིམས་ལ་ཐོགས་པ།
རྒྱ་ནག་གིས་བོད་བཙན་བཟུང་བྱས་པའི་རྗེས་ཀྱི་སྒྲུང་ཞིག་ཡིན། ཨ་མདོ་འབྲོག་ཕྱོགས་ཤིག་ཏུ་བྱུང་བའི་སྒྲུང་ཞིག་ཡིན། ཕལ་ཆེར་མི་མང་ཀུང་ཧྲེ་ཟེར་བ་དེའི་སྐབས་ཡིན་པ་འདྲ། འབྲོག་པའི་རྩ་ཐང་དུ་གུར་ཕིབས་ཤིང་དེའི་ནང་རྒྱ་ཐབ་བོད་ཐབ་གཉིས་ག་ལས། རྒྱ་བོད་གཉིས་ཀྱི་མི་མང་པོ་འཛོམས་པར་ནམ་རྒྱུན་འབྲོག་མི་ཁ་རྒོད་ཅིག་ཡོད་པ་དེའང་དེར་སླེབས་འདུག མི་གཅིག་གིས་ཁོང་ལ། ཁྱེད་ཀྱིས་འདིར་བསྟོད་ར་ཞིག་ཐོང་ར་ཞེས་བཤད་པར། དེ་ནས་ཁོས་ཡར་ལྟ་མར་ལྟ་ཞིག་བྱས་རྗེས། བསྟོད་པ་འདི་ལྟར་བཏང་། རྒྱ་བོད་གཉིས་ཀ་འཛོམས་ས་རེད།། རྒྱ་ཐབ་བོད་ཐབ་ཁ་དཔད་རེད།། དུད་ཁུང་རྟ་མཇེ་རང་བྱོན་རེད།། མང་ཚོགས་མུ་གེ་འཆི་ས་རེད། ཅེས་བརྗོད། དེ་ནས་མཇུག་འབྲས་ཅི་ཡོང་ཚང་མས་ཤེས་གསལ་ཡིན་པས་ངས་འདིར་བརྗོད་དགོས་མི་འདུག…
ང་ལ་མཐོང་ཆུང་བྱས་སོང་ཟེར།
སྨིན་དྲུག་གིས།
ཁ་སང༌། གྲོགས་པོ་ཞིག་དང་ཁ་རྩོད་ཤོར་སོང༌། ཁ་རྩོད་ཤོར་དོན་ནི་དོན་དག་ཆུང་ཆུང་ཞིག་ཡིན། དེ་ནི་འདི་འདྲ་སྟེ། གྲོགས་པོ་ཁོས་ཟེར་ན། ལོ་བཅུ་གྲངས་ཀྱི་ཡར་སྔོན་ཞིག་ལ། སྙན་ངག་པ་ཞིག་གིས་ང་ལ་འདི་ལྟར་ལབ་མྱོང༌། ཁྱེད་རང་སྙན་ངག་པ་ཞིག་རེད་ཟེར། དེ་སྐད་བསྟོད་བསྔགས་དང་བཅས་ཏེ་ལབ་སོང༌། ཡིན་ནའང༌། ད་ལྟ་བསམས་ན། དེ་དུས་ཀྱི་ང་ལ་མཐོང་ཆུང་བྱས་འདུག ང་ལ་མཚོན་ན། ཁྱེད་རང་སྙན་ངག་པ་ཞིག་རེད་ལབ་མཁན་དེས་ང་ལ་མཐོང་ཆུང་བྱས་པར་ངོས་འཛིན་བྱེད་ཀྱི་ཡོད། གང་ཡིན་ཟེར་ན། ང་ནམ་ཡང་སྙན་ངག་པ་ཞིག་བྱེད་མི་འདོད།
ཆང་ཕོར་ཁའི་འཆར་ཡན།
རྨེ་སྲིབ་ནོར་བུ
་་་་་་་་་་་་་༡་་་་་་་་་་་་་
ལོ་དང་བསྐལ་བར་བསྙལ་བའི་རྒུན་ཆང་འདི།།
ས་ཕོར་ནང་དུ་མེར་བར་རྔུབ་ཐེངས་རེར།།
འཇིག་རྟེན་འཇིག་པའི་ཟིན་ཐོ་ཤི་གཟུགས་མ།།
ཆང་ཕོར་ཁ་ནས་རོ་ལངས་བྱེད་ཡོང་གི།
ཁ་བའི་མེ་ཏོག་བཞད་པའི་ཐང་ཆེན་དུ།།
སྦྲ་དང་སྤྲེ་འུས་བདེ་སྐྱིད་འཚོ་སྟངས་ལས།།
མི་ཡི་ཞལ་རས་འཛུམ་བའི་ཟླ་བ་ཞིག།
སྨན་ལྗོངས་རི་བོའི་སུལ་ནས་ཤར་ཡོང་གི།
རང་བྱུང་མྱུ་གུ་འབུས་བའི་རི་ལུང་ལ།།
ཤིང་འབྲས་སིལ་ཏོག་འཚོལ་བའི་ཕོ་མོ་ཚོས།།
རྡོ་བཟོའི་ཡོ་བྱད་བཟུང་ནས་རྩེ་དགོད་ངང༌།།
བག་ཡངས་རྒྱུ་བའི་ལོ་ཟླ་ཇེ་གསལ་རེད།།
དོགས་སློང་༢
གླུ་སྙན་མོ་ལ་ཁའི་ལུག་རྫིས་ཀྱང་ལེན། གཏམ་སྙན་མོ་གོ་ཁའི་རྒད་མོས་ཀྱང་བཤད།
༡ ས་པཎ་སོག་པོར་མ་ཕེབས་ཀྱང་སོག་པོས་བོད་དབང་དུ་བསྒྱུར་ཡོད་པ་རེད། ཀྲུང་གོས་གཞི་འཛིན་ས་མེད་ནའང་གསར་པ་བཟོ་གི་རེད། ས་པཎ་སོག་པོར་ཕེབས་པ་དེས་ཕན་ག་རེ་ཐོགས་པ་རེད་ཟེར་ན། རྒྱལ་ཁབ་གཞན་པ་ཚོར་བསྡུར་ན་བོད་ནང་ཅུང་ཟད་དྲག་ག་བྱུང་ཡོད་པ་མ་ཟད་བོད་ཀྱི་ནང་ཆོས་དེ་སོག་པོ་ལ་དར་ཁྱབ་ཕྱིན། ཐ་ན་ད་ལྟའི་ཨི་རན་ནང་དུའང་དེ་སྐབས་བོད་བརྒྱུད་ནང་ཆོས་ཀྱི་དགོན་པ་བཞེངས་མྱོང་པ་རེད། དེར་མ་ཟད། རྒྱའི་མི་ཡུར་ཆེན་པོ་མཚམས་འཇོག་བཅུག་ཐུབ་སྟེ་སྐྱེ་བོ་གྲངས་ཀྱིས་མི་ལང་བ་ཚེ་སྲོག་གི་འཇིགས་པ་ལས་བསྐྱབས་ཐུབ་ཡོད་པ་དེ་ནི་བསམ་གྱིས་མི་ཁྱབ་པའི་མཛད་པ་མ་རེད་དམ། མ་གཞི་ག་རེ་བཤད་ན་མ་བཤད་ན་བོད་ལ་གཞན་ལ་མེད་པའི་མཚོན་ཆའམ་ལག་ཆ་ཡང་ན་སྟོབས་ཤུགས་ཤིག་ཡོད་པ་ནི་ནང་ཆོས་ཡིན་པ་རེད། དོན་དངོས་སུ་ང་ཚོའི་སྟོབས་ཤུགས་དེས་སོག་པོ་ཕར་དབང་དུ་བསྒྱུར་ཡོད། རྒྱ་ནག་གོང་མ་རིམ་བྱོན་ཡང་དབང་དུ་བསྒྱུར་ཡོད་ཅེས་བཤད་ན་མ་འགྲིགས་པ་ཆེར་མེད་སྙམ།
བོད་ཀྱི་དུས་བབ་དྲྭ་རྒྱ་ལ་གང་ཞིག་བྱུང་སོང་བ་ཡིན་ནམ།
སྤོབས་པ་མཐའ་ཡས། བོད་ནང་གི་སྒེར་གཉེར་དྲྭ་རྒྱ་དེ་ཚོ་ཉིན་རེ་དང་ཉིན་རེ་བཞིན་སྒོ་བརྒྱབ་འགྲོ་ཡི་འདུག དེ་ཚོ་ནི་ཆབ་སྲིད་ཀྱི་བཀག་རྒྱ་ཞེས་པའི་གཞན་དབང་དུ་གྱུར་པ་ཡིན་ངེས་ཀྱང༌། ཕྱིར་སྡོད་བོད་མིས་གཉེར་བའི་ཚགས་ཤོག་བོད་ཀྱི་དུས་བབ་ཀྱི་དྲྭ་རྒྱ་དེ་ཡང་སྤྱི་ཟླ་ལྔ་པ་ཙམ་ནས་བཟུང་ཚགས་ཤོག་གསར་པའི་དྲྭ་ངོས་འདོན་རྒྱུ་མཚམས་འཇོག་བྱས་སོང༌། རྒྱུ་རྐྱེན་གང་ཡིན་ཤེས་ཀྱི་ཡོད་དམ།
ལན།
སྤོབས་པ་མཐའ་ཡས།
ཁོ་བོས་གོང་མ་མཆོད་ཡོན་དང་ཀྲུང་གོའི་གཞུང་གིས་ན་ནིང་བོད་ཀྱི་སྤྲུལ་སྐུའི་ངོས་འཛིན་ལ་གཞུང་གི་ཆོག་མཆན་ངེས་པར་དུ་དགོས་པའི་ཁྲིམས་གཏན་འབེབས་བྱས་པའི་སྐོར་ལས་འཕྲོས་པའི་རྩོམ་ཡིག་ཅིག་སྤེལ་བ་ལ་མི་རིང་བར་མི་ཞིག་གིས་དྲི་བ་དང་ལན་ཡག་པོ་ཞིག་སྤེལ་འདུག་པར་ཐུགས་རྗེ་ཆེ།
རྒྱ་བོད་མཆོད་ཡོན་སྐོར་ལ་དོགས་སློང་།
༡ རྒྱ་དམར་གཞུང་གིས་བོད་ཀྱི་སྤྲུལ་སྐུ་ཚོའི་ཡང་སྲིད་འཚོལ་སྟངས་སྐོར་ལ་ཁྲིམས་གཞི་གསར་པ་ཞིག་བཟོས་པ་དེ་སྔོན་གྱི ་་བོད་ཀྱི་བླ་ཆེན་དུ་གྲགས་པའི་མི་དྲགས་འགས་རྒྱ་སོག་གི་སྡིག་རྒྱལ་ཚོ་སྐྱག་ལངས་ལ་བཏང་བའི་ནད་རྒྱུན་ཞིག་་་ ཇི་ལྟར་ཡིན། འགྲེལ་བཤད་ཅིག་གནང་རོགས།
༢ དྲི་བ་དང་པོའི་དཔེ་མཚོན་དུ། ་་དཔེར་ན། ཧོ་ཐོག་ཐུ་དང་ཐུའུ་བཀན་ལྟ་བུ་་་ ཞེས་བཀོད་པ་དེ་ཡང་སྲིད་བཙལ་འཚོལ་གྱི་དཔེར་ཇི་ལ་འགྲོ
༣ ཆོ་ལོ་དང་འཇའ་ས་སོགས་མིང་གི་གཟེངས་བསྟོད་སྣ་ཚོགས་ཤིག་ཡོད་པ་དག་ནི་རྒྱ་ནག་གོང་མ་ཆེན་པོས་བླ་མ་སུ་དང་སུ་མཁས་ལ་མར་གཟེངས་བསྟོད་དུ་གནང་བ་ཞིག་ཡིན་ནམ་ཡང་ན་བླ་མ་དེ་དག་གོང་མའི་རྩར་བཅར་ཏེ་ཚུར་ཞུས་པ་ཞིག་ཡིན།
༤ དེའི་སྐབས་གོང་མ་གནམ་གྱི་བདག་པོ་དང་འཇམ་པའི་དབྱངས་ཡིན་པས་ཁོང་ནས་གནང་བའི་གཟེངས་རྟགས་ཡང་ན་ཆེ་བསྟོད་དེ་དག་ངོམ་རིན་ཡོད་པ་ཞིག་དང་བོད་སྤྱི་ཚོགས་ནས་ཡོངས་སུ་ངོས་ལེན་བྱེད་ཀྱི་ཡོད་པས་ངོམ་ས་ཡོད་པ་ཞིག་ཀྱང་ཡིན་སྟབས་ངོམ་ཆོག་པ་ཞིག་ཡིན་ན་ངོ་ཅི་ལ་གནང་དགོས་པ་ཡིན།
