ཨ་འབྲུག་དཀོན་མཆོག
དུས་རྒྱུན་ང་ཚོས་རྒྱ་རིགས་རྩོམ་པོ་ཝང་ལི་ཞུང་ནི། བོད་ཀྱི་གནད་དོན་ཐོག་རྒྱུས་མངའ་ཡོད་པ་དང༌། དྲང་ཕྱོགས་ཀྱི་བསམ་ཚུལ་འཛིན་མཁན། གནས་ཚུལ་རེ་གཉིས་ཐོག་གདུང་སེམས་མཉམ་བསྐྱེད་དང་རྒྱབ་སྐྱོར་གྱི་ལས་དོན་ཀྱང་བྱེད་མཁན་ཞིག་ཡིན་པའི་ངོས་འཛིན་དང་ཚོར་སྣང་ཡོང་གི་ཡོད་མོད། དོན་དངོས་ཐོག་ཝང་ལི་ཞུང་གིས་བོད་ཀྱི་གནད་དོན་ཐོག་ཤེས་རྟོགས་ཀྱིས་འདང་གི་མེད་ལ། དྲང་ཕྱོགས་ཀྱི་ལྟ་ཚུལ་ཡང་དག་པ་ཞིག་ཀྱང་འཛིན་གྱི་མེད། ཕྱི་ཚུལ་དུ་ཁོ་པས་བོད་དང་བོད་ཀྱི་གནད་དོན་ཐོག་བརྟག་ཞིབ་དང༌། དོ་ཁུར་གྱི་རྣམ་འགྱུར་མངོན་པའི་བསམ་ཚུལ་དང་ལས་དོན་རེ་ཤས་བྱས་པ་ཡང་རྒྱ་མི་རིགས་དང་རྒྱ་ནག་རྒྱལ་ཁབ་ཀྱི་གཞི་རྩའི་ཁེ་ཕན་དང་ཉེན་ཟོན་གྱི་བསམ་བློའི་འོག་ནས་བྱུང་བ་ཞིག་ལས་བོད་མི་མང་གི་བསམ་པ་དང་དངོས་པོའི་འཚོ་བའི་གནས་སྟངས་ལ་གཏིང་ཟབ་ས་ནས་རྒྱུས་ལོན་དང༌། ཤེས་རྟོགས་ཀྱི་གནས་ཚད་ལས་བྱུང་བའི་བསམ་ཤེས་དང་གུས་བརྩི་སླེབས་པ་ཞིག་མ་རེད། ང་ཚོས་ཁོང་ཉིད་རྒྱ་ནག་པ་ཞིག་ཡིན་པའི་ཆ་ནས་རྒྱ་རིགས་ལ་དུང་ཞེན་དང༌། གུང་ཁྲན་ཏང་གི་ལྕགས་རིའི་ནང་གི་སྨྱུག་འཛིན་པ་ཞིག་ཡིན་པའི་ཆ་ནས་ཁོང་གི་སྨྲ་བརྗོད་རང་དབང་གི་འཁོར་རྒྱ་ལ་བཀག་སྡོམ་དང་ཚད་ཐིག་ཡོད་པ་ལ་བསམ་ཤེས་ཐུབ་ཀྱང༌། བོད་ཀྱི་གནད་དོན་ཐོག་རང་དབང་གི་ཞིབ་འཇུག་པ་ཞིག་ཏུ་ཁས་འཆེས་པའི་ཆ་ནས་དངོས་ཡོད་ཀྱི་གནས་ཚུལ་རྣམས་ཆ་ཚང་བའི་རྒྱུས་ལོན་བྱེད་དགོས་པ་དང༌། རྩོམ་པོ་ཞིག་ཡིན་པའི་ཆ་ནས་རྫུན་མི་སྨྲ་བའི་ཀུན་སྤྱོད་ཀྱི་ཚད་གཞི་ཙམ་ཡོད་འོས་ཀྱང༌། ད་ཐེངས་བོད་མིའི་གཞི་རྒྱ་ཆེ་བའི་ཞི་རྒོལ་གྱི་ངོ་བོ་དང་དེའི་རྒྱབ་ལྗོངས་ལ་དབྱེ་ཞིབ་དང་ཕྱོགས་བསྡོམས་བྱེད་ཚུལ་དེ་ཆེས་བདེན་དྲང་མིན་པ་དང་ཆ་མི་ཚང་བ་ཞིག་རེད།
སློབ་གྲོགས་ཤིག་གི་དྲིས་ལན་དུ་ཕུལ་བའི་བསམ་ཚུལ་ཐུང་ངུ༌།
ཨ་འབྲུག་དཀོན་མཆོག
འབྲི་རྩོམ་བྱེད་པ་ནི་ལད་མོ་གཏན་ནས་བྱེད་རྒྱུ་མེད་པའི་བྱ་གཞག་ཅིག་རེད་ལ། འབྲི་རྩོམ་ལ་ལད་མོ་བྱེད་པ་ནི་འགྲོ་བ་མིའི་ཤེས་རབ་དང་ཤེས་རིག་གི་ཉམས་རྒུད་ཆེན་པོ་ཞིག་རེད། བོད་ཀྱི་ཕུལ་བྱུང་རྩོམ་པོ་ཞིག་གིས་དེ་སྔ་འགྲུབ་མ་ཐག་པའི་བརྩམས་ཆོས་ཀྱི་ཤུལ་རྒྱུན་སྟེང་དུ་སླར་ཡང་མགོ་ཞིག་རྩོམ་དགོས་པ་ནི་རྩོམ་རིག་སྒྱུ་རྩལ་གྱི་གཏན་གནས་ཆོས་ཉིད་རེད་ཅེས་བཤད་མྱོང༌། ང་ཚོ་རྩོམ་གྱི་ལས་སུ་ཐོག་མར་ཞུགས་དུས་རྩོམ་འབྲི་བ་ནི་ཚིག་གི་སྡེབ་སྦྱོར་སྒྲིག་སྟངས་ཀྱི་སྦྱོང་བརྡར་ཞིག་ཏུ་ངོས་འཛིན་བྱེད་སྲིད་ལ། རྩོམ་འབྲི་བ་ནི་གནད་དོན་གཅིག་གསལ་འདོན་དང་གསེད་བཀྲོལ་བྱེད་པ་ཞིག་ཏུ་ངོས་འཛིན་ཀྱང་བྱེད་སྲིད། ལྷག་པར་དུ་རིགས་འགའ་ཞིག་གིས་རྩོམ་ཡིག་ནི་དེ་སྔ་ནས་གཏན་འཁེལ་བྱས་ཟིན་པའི་ནང་དོན་ཞིག་གི་སྒྲོམ་གཞི་ཞིག་དང༌། དེ་སྔ་ནས་གཏན་ཆགས་སུ་སོང་བའི་ཚིག་སྦྱོར་གྱི་ར་བ་ཞིག་ནས་འཁོར་བསྐྱོད་བྱེད་ཀྱི་ཡོད་ཅིང༌། ད་དུང་དེ་ལས་སྡུག་པ་ཞིག་ལ་བྱེད་སྤྱོད་དེ་རིགས་གཉེར་མཁན་རིགས་ལ་རྩོམ་པ་པོ་ཞེས་པའི་ཆོ་ལོ་ཡང་ཐོབ་ཀྱི་ཡོད་པ་རེད། ང་ཚོས་རྗེ་བཙུན་མི་ལ་རས་པ་དང༌། འཇམ་མགོན་ས་སྐྱ་པ། རྗེ་ཙོང་ཁ་པ། མཁས་དབང་དགེ་འདུན་ཆོས་འཕེལ་སོགས་ཀྱི་གསུང་རྩོམ་ཀློག་སྐབས་ཁོང་ཚོའི་ཤེས་རབ་དང༌། ལྟ་བ། དཀའ་ཐུབ་དང་སྙིང་སྟོབས། མི་གཤིས་དང་སེམས་ཁམས་ལ་སོགས་པ་མཐོང་གི་ཡོད་ལ། དེ་དག་རང་རང་གི་ཐུན་མོང་མ་ཡིན་པའི་ཁྱད་གཤིས་རེ་རེས་རང་རྐྱ་འཕེར་བའི་རང་གཟུགས་ཤིག་མངོན་གྱུར་བྱས་ཡོད་པ་དེ་མཐོང་ཐུབ་ཀྱི་ཡོད་པ་རེད།
དེ་ལས་མང་བ་། “སློབ་གྲོགས་ཤིག་གི་དྲིས་ལན་དུ་ཕུལ་བའི་བསམ་ཚུལ་ཐུང་ངུ༌།” »
རྔ་མ་ཚར་གཅོད་ཀྱི་རིག་པའི་གཞུང་ལུགས། ༼དཔེ་དེབ་ཅིག་གི་བཀླག་འཆར།༽
ཨ་འབྲུག་དཀོན་མཆོག
ཆེས་མཛེས་སྡུག་ལྡན་པའི་མཁའ་དབྱིངས་གཅིག་པུ་ནི་རང་དབང་གི་འཇིག་རྟེན་ཡིན་རུང༌། དེ་རུ་འཕུར་བསྐྱོད་ཐུབ་མཁན་ནི་སྐྱེས་ཆེན་རེ་གཉིས་ལས་མ་བྱུང་བའི་མིའི་ལོ་རྒྱུས་ཀྱི་མགོ་ནས་རྔ་མའི་བར། སྐྱེས་ཆེན་གྲངས་ལས་འདས་པ་ཞིག་གི་བསམ་འདུན་མེ་ལ་བསྲེག་པའི་ནག་ཉེས་ཀྱི་ལེའུ་ཆེས་མང་བ་ལ་ཡ་དེ་ཙམ་མི་མཚན་རུང༌། རྔ་མ་ཡང་སྤྱི་ཚོགས་དང་མི་སྒེར་གྱི་རིན་ཐང་གི་ཚད་གཞི་བྱས་ཏེ་ཤེས་རབ་ཅན་ལ་མགོ་གནོན་བྱེད་པའི་ཚད་གཞི་སྤྱི་ཚོགས་ཅན་དུ་འགྱུར་བཞིན་པ་ནི་རིགས་ཀྱི་གྱོང་གུད་ཆེན་པོ་ཞིག་ཡིན་ཏེ། མཐའ་མེད་དུ་འཕེལ་བའི་མིའི་བསམ་བློའི་ནུས་པ་ནི་སྤྱི་ཚོགས་འཕེལ་རྒྱས་ཀྱི་རྟེན་གཞི་ཉག་གཅིག་ཡིན་པས་བསམ་བློ་སྐྱེ་འཕེལ་གྱི་བར་སྣང་དུ་རྔ་མའི་དྲ་རྒྱ་སྦྲེལ་ན་ང་ཚོ་སླར་ཡང་མུན་ནག་གི་ནང་དུ་ལྷུང་རྒྱུ་རེད། དེའི་ཕྱིར་འདི་ལྟར་འཆད་འོས་ཏེ། རྔ་མ་ནི་དུས་ནམ་ཡང་རྔ་མ་སྟེ། ཁོའི་ཁྱད་ཆོས་ནི་གཞན་རྗེས་སུ་སྙེག་རྒྱུ་ཁོ་ནའོ།། རྔ་མ་འཕོངས་ཚོས་ནས་སྐྱེས་པས་རྔ་མ་ནི་དུས་ནམ་ཡང་རྗེས་ལུས་ཀྱི་དངོས་པོ་ཡིན་ལ། སྤྲ་མི་རུ་གྱུར་རྗེས་མི་ལ་རྔ་མ་མ་སྐྱེས་པའི་རྒྱུ་མཚན་ཡང་སྔ་མ་ནི་མི་དང་སྲོག་ཆགས་གཞན་གྱི་དབྱེ་རྟགས་ཤིག་ཏུ་ངང་གིས་གྲུབ་པ་རེད། དེའི་ཕྱིར་རྔ་མ་མང་པའི་ཡུལ་གྲུ་དེ་རྗེས་ལུས་ཀྱི་ས་ཁུལ་དང༌། རྔ་མ་ལ་བསྟན་པ་དར་བའི་སྤྱི་ཚོགས་དེ་དུད་འགྲོ་ཡི་སྤྱི་ཚོགས་ཡིན།
དེ་ལས་མང་བ་། “རྔ་མ་ཚར་གཅོད་ཀྱི་རིག་པའི་གཞུང་ལུགས། ༼དཔེ་དེབ་ཅིག་གི་བཀླག་འཆར།༽” »
ཀརྨ་པ་དང་ཁྲུང་ཁྲུང་།
འཇམ་དབྱངས་ནོར་བུས་བརྩམས།
༡༩༩༩ ལོའི་ཟླ་བ་ ༡༢ པའི་ནང་གི་ངོ་མཚར་བའི་བྲོས་བྱོལ་གྱི་རྗེས་དེར། རྒྱལ་བ་ཀརྨ་པ་སྐུ་གཞོན་དེ་བཙན་བྱོལ་སྤྱི་ཚོགས་ནང་གི་གློ་བུར་གྱི་གྲགས་ཅན་མི་སྣ་ཞིག་ཏུ་གྱུར་པ་རེད། དེ་ནི་ཏན་ཏན་བོད་མིའི་གུས་སྲོལ་ལྟ་བུ་ཞིག་གི་ནང་དུ་བྱུང་བ་ཞིག་ཡིན་པ་རེད། བོད་ཁྱིམ་སློབ་གྲྭའི་སློབ་མ་སྐོར་གཅིག་གིས་ བོད་ཀྱི་ཁྲུང་ཁྲུང་སྲུང་སྐྱོབ་བྱེད་ཕྱོགས་ཀྱི་སྐོར་རང་གི་འཛིན་གྲྭའི་ཁོར་ཡུག་ལས་འཆར་དེ་ལོ་ཆུང་བླ་མ་འདི་ལ་འབུལ་རྒྱུའི་ཐག་གཅོད་བྱས་པ་རེད། རྐང་བཙུགས་ནས་ཡིན་མིན་གང་ལྟར་ཡང་མཚོན་རྟགས་ནི་འོས་མཚམས་ཅན་ཡིན་པ་སྟེ། ཉེན་ཁར་འཕྲད་པའི་ཚེ་སྲོག་དང་། བོད་ནས་ལྷོ་ཕྱོགས་སུ་འཕུར་བསྐྱོད་བྱེད་པ་སོགས་རེད།
དམངས་གཙོ་དོན་གཉེར་གྱི་གཟི་བརྗིད་ཉིན་མོ།
སྤྱི་འཐུས་ཆབ་བྲག་ལྷ་མོ་སྐྱབས།
མཛའ་ཞིང་བརྩེ་བའི་སྤུན་ཟླ་མི་རིགས་རྣམ་པ། དེ་རིང་གི་ཉིན་མོ་འདི་ནི་དམངས་གཙོ་དོན་གཉེར་གྱི་ཀྲུང་གོའི་གཞོན་སྐྱེས་ཧ་ཅང་མངས་པོ་ཞིག་ལ་ཏང་ཀྲུང་དབྱང་གིས་དྲག་པོའི་དམག་དཔུང་གིས་བཙན་གནོན་བྱས་ཏེ། དམངས་གཙོའི་མི་སྣ་མངས་པོ་ཞིག་གི་ཚེ་སྲོག་ཤོར་བའི་ཉིན་མོ་ཞིག་ཡིན་པས། ང་ཚོས་ཚེ་འདས་གཞོན་སྐྱེས་དེ་དག་གི་ཚེ་སྲོག་བློས་བཏང་གི་དམངས་གཙོའི་དགོས་འདུན་ལ་རྒྱབ་སྐྱོར་དང་གདུང་སེམས་མཉམ་སྐྱེད་ཞུ་བའི་ཐོག་དྲངས་ཏེ། ཀྲུང་གོའི་དམངས་གཙོ་ཞེས་པའི་གོ་དོན་ལ་བསྐྱར་ཞིག་ཅིག་བྱེད་འདོད་བྱུང་།
རྨོངས་བའི་ང་རྒྱལ་དགུང་ལས་མཐོ།
རྨོངས་བའི་ང་རྒྱལ་དགུང་ལས་མཐོ།
སྤྲིན་བྲལ། མདོ་སྨད་ཟི་ལིང།
བོད་འབྱོར།
ནམ་རྒྱུན་གྱི་འཚོ་བའི་ཁྲོད་དུ་མི་སྤོབས་པ་ཅན་ལ་དཔའ་བོ་ཞེས་འབོད་ཀྱི་ཡོད། དཔའ་བོའི་སྤྱི་ཚོགས་དེ་ལོ་རྒྱུས་སུ་གྱུར་ནས་ཡུན་རིང་འགོར། བསམ་བློ་བ་ཞིག་ཡིན་ཕྱིན་ད་ལྟའི་དུས་སུ་དཔའ་ཡང་དག་གི་རྩ་བ་དེ་གང་ལ་ཐུག་འདུག་པ་ཚོར་ནི་རེད། གནའ་མི་བོད་ཀྱི་གཏམ་དཔེ་ལ། རྨོངས་པའི་ང་རྒྱལ་དགུངལས་མཐོ་ཟེར་བ་ཅི་མ་བདེན། དེང་སྐབས་གཞན་ལ་སྡིགས་མོ་བྱེད་པའི་རྩོམ་ཡིག་འགའ་རེ་བྲིས་རྗེས། རང་ཉིད་བོད་ཀྱི་ཡོན་ཏན་པའི་སྡེ་རུ་རློམ་པ་དག་ལ། ངོམས་རན་ཡོད་པ་ནི་ང་རྒྱལ་ཡིན་ལ་སྟོན་རན་མེད་པ་ནི་བོད་ཀྱི་ནང་དོན་རིག་པའི་གཞུང་རེད། ཁྱད་པར་དུ་དེ་དག་གི་གྲས་ན་བོད་ཀྱི་རིག་གནས་ཆེ་བ་ལྔ་དང་བོད་ཀྱི་ཡུལ་སྲོལ་གོམས་འདྲིས་ལ་རྒྱུས་ལོན་གཏིང་ཟབ་བྱས་མྱོང་མཁན་ཕལ་ཆེར་མེད། ཐ་ན་རིག་གནས་ཆུང་བ་ལྔ་ལ་བག་ཆགས་ཙམ་བཞག་ཡོད་པའང་ཤིན་ཏུ་ཉུང༌། ཁ་ན་བོད་སྐད་དང་ལག་ན་བོད་ཡིག་འབྲི་བཞིན་ཡོད་ནའང༌། ཁོང་ཚོའི་འདུ་ཤེས་ནི་སྔ་མོ་ནས་སྐྲསེར་མིག་ལྗང་ཅན་ཏུ་འགྱུར་ཚར་འདུག
རྒྱ་མི་ཞིག་ཡིན་པར་ངོ་ཚ་བྱུང་བར་ངས་ཚོར་སྣང་ཐོག་མ་དང་། དམར་བའི་ཚོགས་མི་ཞིག་མིན་པར་སྟབས་ལེགས་པ།
བོད་སྒྱུར་ ཚེ་རིང་དོན་གྲུབ
China Digital Times [April 07, 2008]
གཤམ་གྱི་རྩོམ་ཡིག་འདི་ཀྲུང་དབྱང་མི་རིགས་སློབ་གྲྭ་ཆེན་མོའི་སློབ་མ་ཞིག་ནས་བྲིས་ཞེས་མཚན་རྟགས་བཀོད་འདུག CDT ནས་བསྒྱུར་།
བོད་ཀྱི་ས་ཁུལ་དུ་ཡར་རྒྱས་ཆེན་པོ་འགྲོ་བའི་སྐབས་འདིར་ངས་རྩོམ་ཡིག་ཅིག་འབྲི་འདོད་བྱུང་། ཡིན་ནའང་། རྒྱལ་ཁབ་ཕྱི་ནང་གཉིས་སུ་གསར་འགྱུར་བརྒྱུད་ལམ་དུ་གནས་ཚུལ་གཏོང་སྤེལ་གནང་བ་དེ་མཐོང་རྗེས། ངས་གང་ཞིག་ལ་ཡིད་ཆེས་བྱེད་དཀའ་བ་བྱུང་། ངས་རྣམ་དཔྱོད་ཀྱང་བོར་སོང་། རྩོམ་ཡིག་འབྲི་བའི་འགོ་འཛུགས་ཐབས་ཤེས་བྱས་ཡང་། ངས་མུ་མཐུད་ནས་འབྲི་མ་ཐུབ། རྒྱུ་མཚན་ནི་ངའི་ཚོར་ཤེས་དེ་ཧ་ཅང་རྙོག་དྲ་ཞིག་གི་ནང་དུ་འཚུད་། དེ་རིང་ཕྱི་དྲོ་། ངས་ལས་གྲོགས་ཞིག་ལ་གནད་དོན་དེའི་སྐོར་ཡང་བསྐྱར་གླེང་མོལ་བྱས་བ་དང་ཁ་བརྡ་དེ་འཁྲུག་རྩོད་ནང་ཛ་དྲག་ཏུ་གྱུར་། མཐར་མར་ལས་གྲོགས་ཀྱིས་ “རྒྱ་ནག་དམར་ཕྱོགས་པའི་”་རྣམ་པ་སྤྱད་ནས་སྨྱོ་བ་ལྟ་བའི་གདོང་བསྟན་ཏེ་་“ཁོང་ཁྲོས་ཚིག་ངན་དུ་ནག་འཕྱུར་འཕྱུར”ངང་ནས་ང་ལ་མཚམས་བཞག དེ་ནི་དོན་མེད་ཅིག་ཏུ་བསམ་ནས་ངས་རང་ཉིད་ཀྱི་ཁ་བཙུམ་པ་ཡིན། ངས་མི་སྣ་མང་པོ་མཉམ་དུ་ལས་ཀ་བྱས་ཡོད་། ཡིན་ནའང་། མི་མང་པོ་ཞིག་འདི་ལྟར་ཀླད་པ་སྒྱུར་བཀོད་བྱས་ཡོད་པ་ངས་ཡིད་ལ་འཆར་མ་སོང་།
དུས་རབས་ཀྱི་ངོས་ནས་ནག་ཉེས་ལ་ལྟ་བ།
དུས་རབས་ཀྱི་ངོས་ནས་ནག་ཉེས་ལ་ལྟ་བ།
གཡུ་དྲུག་དཀར། རྡ་ས།
དུས་རབས་ཀྱི་སེམས་ལ་བཞག་པའི་རང་གཟུགས།
དུས་རབས་རེ་རེ་ནི་འཛམ་གླིང་སྤྱི་ཡོངས་ཀྱི་ལོ་རྒྱུས་རང་བཞིན་གྱི་འགྱུར་འགྲོས་ཀྱི་མཚམས་ཚིགས་ཡིན་པས། དུས་རབས་རེ་ལ་ཡུལ་དུས་གནས་བབ་གསར་དུ་བཙས་པ་ལྟ་བུའི་ཁྱད་རྟགས་བྱུང་བ་རེད། དེ་བཞིན་བོད་མི་རིགས་ལ་མཚོན་ན་ནའང་དུས་རབས་སྔོན་མ་དག་ལ་པྱིར་འདང་རྒྱག་དུས་གཅིག་ལས་གཅིག་བརྗིད་ཅིང་བརླིང་པའི་བཙན་དྲག་རྡོ་རིང་རེ་རེ་དྲན་འོང་ཞིང༌། དྲན་རྟོགས་འདིའི་ཀློང་ནས་ད་ལྟའི་ཡ་ང་ཞིང་སྐྱོ་ཤས་ཆེ་བའི་གནས་སྟངས་འདི་དང༌། ལྷག་པར་དུ་༣་༡༠ ཉིན་ནས་འགོ་ཚུགས་པའི་ཛ་དྲག་གི་གནས་བབ་འདི་ལ་བསམ་ན་སྙིང་རླུང་སྟོད་ལ་འཚང་ནས་ཐང་བོད་དབར་གྱི་ལོ་རྒྱུས་བསྐྱར་ལོག་བྱེད་པར་ཐེ་ཚོམ་མི་མངའ་ཡང༌། དུས་རབས་ཉེར་གཅིག་པའི་བོད་མི་རིགས་ནི་དེ་འདྲ་ཞིག་གཏན་ནས་མིན། ང་ཚོ་འགྱུར་ཡོད། ང་ཚོ་དྲག་པོ་ནས་ཞི་བར་འགྱུར་ཡོད། ང་ཚོ་བཙན་པོ་ནས་གཉོམ་ཆུང་དུ་འགྱུར་ཡོད། ང་ཚོ་འཚེ་བ་ཅན་ནས་འཚེ་མེད་དུ་འགྱུར་ཡོད།
ངའི་ཁྱིམ་ཚང༌།
ངའི་ཁྱིམ་ཚང༌།
(ན་མཉམ་གྲོགས་པོ་ཚོར་ཕུལ་བ།)
སྐར་ཆེན།
ངའི་ཁྱིམ་ཚང་གི་མིང་ལ་བོད་ཁྱིམ་ཟེར། ངའི་ལོ་ངོ་བདུན་ལྷག་གི་ལྟོ་གོས་གཏམས་གསུམ་ཁྱིམ་ཚང་འདི་ལ་བརྟེན་པ་ཡིན། ངའི་ཕུགས་བསམ་དང་བསམ་བློ། མི་ཚེའི་རིན་ཐང་བཅས་རྙེད་ས་ཡང་ཁྱིམ་ཚང་འདི་ཡིན། ང་བརྩིས་བའི་ཁྱིམ་ཚང་འདིའི་ནང་གི་བུ་ཕྲུག་ཕལ་ཆེ་བ་ནི་ཉམ་ཐག་དང་དྭ་ཕྲུག ཕྱེད་དྭ་ཕྲུག་བཅས་ཡིན་ལ་ཁྱིམ་ཚང་འདི་ཐོག་མར་འཛུགས་སྐབས་བུ་ཕྲུག་ཁ་ཤས་ལས་མེད་མོད། ད་ལྟ་བུ་ཕྲུག་ཚོའི་གྲངས་འབོར་སྔོན་ལས་ལྡབ་འཕར་བྱུང་ཡོད་པ་མ་ཟད་བུ་ཕྲུག་མང་པོ་ཞིག་འཛམ་གླིང་ཤར་ནུབ་སར་འཐོར་ནས་ཡོད། ཁྱིམ་ཚང་འདི་ལ་གྲ་སྒྲིག་འཛིན་གྲྭ་བརྩིས་བའི་འཛིན་རིམ་དང་པོ་ནས་བཅུ་གཉིས་བར་དུ་ཡོད་པ་མ་ཟད་མི་རིང་བར་མཐོ་སློབ་ཞིག་ཀྱང་ཚགས་གྲབས་ཡོད།
དགུ་རེ་སུ་ཝང་།
དགུ་རེ་སུ་ཝང་།
༼བདེན་དོན་ལ་ཕྱོགས་ཤིང་དྲང་ཚུགས་ཆེ་བའི་བུད་མེད་དགུ་རེ་སུ་ཝང་ལས་འཕྲོས་པའི་ཁ་བརྡ།༽
འགར་ཚེ་རྒྱལ།
ཉེ་དུས་བོད་མི་རིགས་ཀྱིས་ཞི་བའི་གྱེན་ལངས་ངོ་རྒོལ་སྐབས་ཨ་རིར་སློབ་གཉེར་བྱེད་པའི་རྒྱ་ནག་གི་བུད་མེད་དགུ་རེ་སུ་ཝང་ཞུ་བ་ཞིག་གིས་བོད་མིའི་བདེན་དོན་ལ་དྲང་ཚུགས་ཀྱིས་རྒྱབ་སྐྱོར་བྱས་པར། ཨ་རིར་གནས་སྡོད་རྒྱ་རིགས་རྣམས་ཀྱིས་ཁོ་མོར་དམའ་འབེབས་འཇིགས་སྐུལ་དང། རྒྱ་ནག་གཞུང་གིས་རྒྱལ་བཙོང་པའི་ཉེས་མིང་གཡོགས་ཏེ་ཁོ་མོ་རྒྱལ་ཁོངས་ནས་སྤྱུགས་པའི་གནས་ཚུལ་དེའི་ཐད། ཕྲན་གྱི་བསམ་ངོར་བུད་མེད་སྒེར་བ་དེའི་བསམ་བློའི་ལངས་ཕྱོགས་དང་རྒྱ་ནག་གཞུང་གི་དམངས་འཛིན་སྲིད་ཇུས་ཀྱི་ཁ་ཕྱོགས་ལ་བདེན་རྫུན་གྱི་ཧེ་བག་ཆེན་པོ་ཡོད་པའི་ཐོག་ནས་བུད་མེད་དེའི་བསམ་བློའི་རྩ་དོན་ལ་རྒྱབ་སྐྱོར་གྱི་ཚུལ་དུ་སྐད་ཆ་འགའ་བཤད་འདོད། ཡིན་ནའང་འདི་ལ་ལྟ་ཚུལ་གཞན་ཞིག་གིས་རྒྱ་ནག་གི་བུད་མེད་དཀྱུས་མ་ཞིག་ལ་འདི་ལྟར་སྔགས་བརྗོད་དང་རྒྱབ་སྐྱོར་བྱེད་རན་མི་འདུག་ཟེར་མཁན་དང། རྒྱ་ནག་གི་བུད་མེད་ཞིག་འདི་ལྟར་གླེང་ནས་ཁྱོད་ཅི་ཉེས་ཟེར་མཁན་འགའ་རེ་ཡོད་སྲིད་པས། དེར་འུ་ཅག་བོད་མིའི་འཐབ་རྩོད་འདི་བདེན་པའི་འཐབ་རྩོད་ཅིག་ཡིན་སྟབས་འདི་ལ་བདེན་པའི་རྒྱབ་སྐྱོར་བྱེད་མཁན་ཚོར་དགྲ་གཉེན་ཕྱོགས་འཛིན་མེད་པར་གདེང་འཇོག་བྱེད་རྒྱུ་འུ་ཅག་གི་འོས་འགན་ཡིན་པའི་ཆ་ནས་དང་། ལྷག་པར་དགུ་རེ་སུ་ཝང་ཞུ་བ་རྒྱ་མི་ཞིག་ཡིན་པའི་ངོས་ནས་སྤྱིར་མིའི་རིགས་ལ་དགོས་པའི་ཁེ་དབང་དང་ཁྱད་པར་བོད་མིའི་རང་དབང་ཐད་ནས་པདེན་པའི་རྒྱབ་སྐྱོར་བྱས་ཏེ། ཁོ་མོ་སྒེར་ངོས་ནས་སྤྲོ་སྣང་འཁྱིལ་བའི་བདེ་སྐྱིད་མང་པོ་ཞིག་སད་ཀྱིས་བཅོམ་པ་ལྟར་ཡལ་བའི་གྱོང་གུད་དེ་སྤྱི་དོན་ཞིག་གི་ཆེད་ཡིན་སྟབས།
འཛམ་གླིང་ཧྲིལ་པོ་བདེན་དོན་དང་ཞི་བདེ་ལ་ཕྱོགས་པའི་དུས་མཚམས་འདིར་ཁོ་མོ་ལྟ་བུའི་བསམ་བློ་འཛིན་མཁན་ཚོ་དགོས་གལ་དུ་མཐོང་ནས་གླེང་བ་ལས་གཞན་ཁེ་ཕན་དང་དམིགས་ཡུལ་ངན་པ་གང་གི་ཆེད་དུའང་མིན་ཟེར་བ་དེ་ཡིན།
ངེད་ཀྱི་ཉིན་ཐོ༌།
སྐར་ཆེན།
ཉིན་འདི་དག་གི་རིང་ལ་ངས་བོད་ནང་གི་བོད་མིའི་གྱེན་ལངས་ཆེན་མོའི་སྔ་ཕྱིའི་བྱུང་རིམ་དང་གཞིས་ལུས་བོད་མི་ཚོའི་སེམས་འདུན༌། བོད་ནང་གི་བོད་མི་ཚོའི་ལྷག་བསམ་དང་ཞུམ་མེད་ཀྱི་སྙིང་སྟོབས་ལ་གདུང་སེམས་མཉམ་བསྐྱེད་ཀྱི་སླད་དུ་བཙན་བྱོལ་བོད་མི་ཚོའི་ངོས་ནས་་ལས་འགུལ་སྤེལ་སྟངས། བཙན་བྱོལ་བོད་གཞུང་གི་སྲིད་ཇུས་ཀྱི་ཁ་ཕྱོགས། ༧གོང་ས་མཆོག་གི་ཐུགས་རེ་དང་ཁོང་གིས་རྒྱལ་སྤྱིའི་སྤྱི་ཚོགས་ལ་གསལ་འདེབས་གནང་སྟངས། རྒྱ་ནག་གཞུང་གིས་མུ་མཐུད་དུ་བོད་མིར་དྲག་གནོན་བྱེད་སྟངས་དང་བོད་དོན་ཐད་སྲིད་ཇུས་འཛིན་སྟངས། རྒྱའི་ཤེས་ལྡན་མི་སྣ་ཁག་གི་བོད་དོན་ཐད་ཀྱི་བསམ་ཚུལ་དང་དེའི་རྒྱབ་ལྗོངས། རྒྱ་ནག་སྐམ་ས་ཆེན་མོའི་མི་མང་དང་ཕྱི་སྡོད་རྒྱ་མི་དག་གིས་བོད་དོན་ལ་རྣམ་འགྱུར་སྟོན་སྟངས། བོད་ཕྱི་ནང་གི་བརྒྱུད་ལམ་ཁག་གི་བསམ་ཚུལ་དང་ཁ་ཕྱོགས༌། རྒྱལ་སྤྱིའི་ཐོག་གི་ཤེས་ལྡན་མི་སྣ་ཁག་དང་སྲིད་གཞུང་ཁག་གིས་བོད་དོན་ལ་རྣམ་འགྱུར་སྟོན་སྟངས། རྒྱལ་སྤྱིའི་སྤྱི་ཚོགས་ཀྱིས་བོད་དོན་ལ་ངོས་འཛིན་གནང་སྟངས་དང་བོད་དོན་བརྒྱུད་རང་གི་ཕུགས་རེ་དང་གོ་སྐབས་འཚོལ་སྟངས་སོགས་ཕྱོགས་ཚང་མར་ཉན་ཤེས་དང་བསྡུ་ལེན་བྱེད་བཞིན་ཡོད།
༄།ང་བོད་ལ་ཡིད་ཆེས་དང་རེ་བ་ཡོད།
ཆབ་བྲག་ལྷ ་མོ་སྐྱབས།
གལ་ཏེ། རང་གི་མི་རིགས་ལ་ཡིད་ཆེས་དང་རེ་བ་མེད་ན། ཁྱོད་ཀྱིས་མི་རིགས་ཀྱི་ཁེ་ཕན་ཚང་མ་འདོར་སྲིད་ལ། གལ་ཏེ་ངོ་མ་མི་རིགས་དེར་རེ་བ་གང་ཡང་མེད་ཚེ། ཁྱོད་ཀྱིས་མི་རིགས་དེར་བརྩེ་སེམས་དང་བྱ་བ་སྒྲུབ་པར་ཡང་སྙིང་བོ་མེད། ཡིད་ཆེས་དང་རེ་བའི་གཞི་རྟེན་ནི་འཚོ་གནས་ཀྱི་བརྩོན་སེམས་ཁོ་ན་ཡིན། བརྩོན་འགྲུས་ཀྱི་ཕ་རོལ་དུ་ཕྱིན་ནས་འཚང་རྒྱ་དགོས་ལ། དཔའ་ངར་གྱི་ཡང་རྩེར་གནས་ནས་འཚོ་གནས་ཀྱང་བྱ་དགོས། བརྩོན་སེམས་དང་དཔའ་ངར་ནི་སྙིང་སྟོབས་ཀྱི་མཚོན་ཚུལ་གཙོ་བོ་གཉིས་ཡིན། ཁྱོད་ཀྱིས་སོམས་དང་བོད་མི་རིགས་ལ་དེ་འདྲའི་ཡིད་ཆེས་དང་རེ་བ་བྱེད་རིན་ཡོད་པའི་སྙིང་སྟོབས་ཀྱི་གསོན་ཤུགས་དེ་ཡོད་དམ།
རྩལས་ལ་བརྩོན་ཞིང་དཔའ་ངར་ལྡན་པརྫཞེས་པ་ནི་སྔོན་བྱོན་ལོ་རྒྱུས་མཁས་པས་བཀོད་པའི་བོད་མི་རིགས་འདིའི་སྡོམ་ཚིག་ཅིག་རེད། དེ་བས་ན་སྡོམ་ཚིག་འདིར་ལོ་རྒྱུས་ཀྱི་རང་བཞིན་ལས་གཞན་གཏན་ཚིགས་ཀྱི་རང་བཞིན་ཡང་ལྡན་ངེས། བདག་གིས་བསམས་ན་ད་ལྟའང་དེ་བཞིན་རེད། འོན་ཀྱང་མང་པོ་ཞིག་གིས་སྔོན་ཆད་དེ་འདྲ་ཞིག་ཡིན་ཡང་དེང་སང་མིན་ཟེར་ལ། ཉུང་ངུ་ཞིག་གིས། བོད་མི་རྣམས་གནའ་སྔ་མོ་ཞིག་ནས་སྒྱིད་ལུག་དང་བག་འཁུམས་ཡིན་ཚུལ་སྨྲ། ཁྱོད་ཀྱི་བསམ་ཚུལ་གང་ལ་གཏོགས།
བུད་མེད།
ང་ནི་ཐོག་མ་ཡིན་ལ་མཐའ་མའང་ཡིན། ང་ནི་མཆོད་ཡུལ་དང་ནི་དམོད་ཡུལ་ཡིན། ང་ནི་སྨད་འཚོང་མ་དང་གྲུབ་ཆེན་མ། ང་ནི་སྐྱེད་མ་ཡིན་ལ་ཞབས་གསར་མ། ང་ནི་ཨ་མ་དང་ནི་བུ་མོ་སྟེ། ང་ནི་རང་གི་མ་ཡི་དཔུང་བ་ཡིན། ང་ནི་མོ་སྐམས་བུ་མང་ཨ་མ་དང་། ང་ནི་ཤུག་མོ་གཏན་དུ་མོ་ཧྲེང་ཡིན། ང་ནི་བཙས་མ་བུ་ཕྲུག་མ་སྐྱེས་མཁན། ང་ནི་བུ་སྐྱེས་ཟུག་རྔུར་བདེ་སྟེར་མ། ང་ནི་སྐྱེས་དམན་དང་ནི་ཁྱོ་ག་སྟེ། ང་རང་བཟོ་མཁན་རང་གི་ཕོ་སྐྱེས་ཡིན། ང་ནི་སོ་སོའི་ཕ་ཡི་ཨ་མ་དང་། ང་ནི་རང་གི་ཁྱོ་གའི་གཅུང་མོ་ཡིན། ང་ཡིས་གཡུག་པའི་བུ་ཕྲུག་ཁྱོ་གར་གྱུར་།…
གྲོགས་ལ་སྤྲིངས་པའི་འཕྲིན།
རྡོར་དབང༌།
ཤེས་རབ་མེ་ཡིས་མུན་པའི་ནགས།།
སྲེག་པར་སྤྲོ་ན་མཐོང་ཐོས་ཀྱི།།
ནོམ་པ་གསོག་པར་བྲེལ་སྟབས་ཀྱིས།།
འཇུག་ལ་ཕྱི་བཤོལ་དུས་ཀྱིས་གཏུགས།།
དུས་དང་བསྐལ་བའི་བར་དག་ཅི།།
ཉིན་དང་ཟླ་བས་ཟུངས་འཛད་དེ།།
འཆི་ལམ་སྙེགས་པའི་གད་སྙིགས་ཚོགས།།
གཅེས་པར་མ་འཛིན་རིགས་ཀྱི་བུ།།
རྗེས་དྲན་གྱི་ཉིན་མོ་ཞིག་དགོས།
༄༅༎ ཉིན་ཤས་སྔོན་ཨ་མི་རི་ཀར་ “རྗེས་དྲན་ཉིན་མོ་”ཞེས་པའི་དུས་དྲན་དེ་སྲུང་བརྩི་བྱས་པ་རེད། རྗེས་དྲན་གྱི་ཉིན་མོ་འདི་ནི་ལོ་རེའི་ཟླ་བ་ལྔ་བའི་རེས་གཟའ་ཟླ་བ་མཐའ་མ་དེ་ནམ་ཡིན་ལ་བྱེད་ཀྱིན་ཡོད་ཟེར། དེ་ནི་རྒྱལ་ཁབ་ཀྱི་དོན་དུ་ཚེ་སྲོག་ཤོར་བའི་དམག་མི་རྣམས་ལ་རྗེས་དྲན་བྱེད་ཆེད་རེད་ཅེས་ཟེར། ཐོག་མར་འདི་ནི་ཨ་རིའི་ཡུལ་དམག་གི་སྐབས་སུ་བྱུང་ཡོད་ལ། ཕྱིས་སུ་དམག་ཆེན་དང་པོའི་སྐབས་ནས་རྒྱ་བསྐྱེད་བྱས་པ་རེད་ཟེར།
རང་གི་རྒྱལ་ཁབ་ཀྱི་དོན་དུ་ཚེ་སྲོག་བཏང་བའི་དཔའ་བོ་དང་དཔའ་མོ་རྣམས་ལ་རྗེས་དྲན་བྱེད་པ་ནི་ཡ་རབས་དང་། གུས་ཞབས། འོས་པོ་ཞིག་ཡིན་པ་ནི་སྨོས་མ་དགོས།
ཚེ་ཏན་ཞབས་དྲུང་ཚང་གི་ཡི་གེ་ཞིག
༄༅༎ ཀུན་གཟིགས་ཐམས་ཅད་མཁྱེན་པའི་སྙན་དྲུང་དུ། གུས་ཞུ། ཐམས་ཅད་མཁྱེན་པ་ཉིད་ནས་རང་རེ་བོད་གངས་ཅན་གྱི་མི་རིགས་སྤྱི་དང་། ཁྱད་པར་དུ་མཚོ་སྔོན་དང་། ཀན་སུའུ། ཟི་ཁྲོན་གསུམ་གྱི་ཞིང་ཆེན་ན་འཁོད་པའི་ཨ་མདོ་བོད་རིགས་རྣམས་སྔོན་ཐོན་མི་རིགས་རྣམས་དང་འདྲ་བར་རིག་གནས་ཡོན་ཚད་མཐོ་རུ་བཏེགས་ནས་ཚན་རིག་ལག་བསྟར་བྱེད་ཐུབ་པ་བྱ་དགོས་ན། བོད་རང་རྐྱང་གི་སློབ་གྲྭ་ཆེན་མོ་ཞིག་ངེས་པར་འཛུགས་དགོས། དེ་མིན་ནུབ་བྱང་མི་རིགས་སློབ་གྲྭ་དང་། མཚོ་སྔོན་མི་རིགས་སློབ་གྲྭ་ལྟ་བུ་ཡིན་ན། རྒྱ་རིགས་རྣམས་ཀྱིས་དབང་བཟུང་བའི་འོག་ཏུ་བོད་ཡིག་སློབ་ཚུལ་རྣམས་ནི་གཟུགས་བརྙན་ཁོ་ན་ལས་བོད་རང་གི་སྐད་ཡིག་གོང་འཕེལ་དུ་འགྲོ་ཐབས་མེད། དཔེར་ན་དགེ་རྒན་རྒྱ་མི་བོད་ཡིག་ཅུང་ཟད་ཤེས་ལ་བོད་སྐད་གདངས་མི་ཐོན་པ་དག་གིས་འབྲོག་ཕྲུག་ཚོར་ཀ་ཁ་དང་སུམ་རྟགས་སློབ་པ་ལྟ་བུ་སྟེ། དེ་ནི་ཚུལ་དང་མཐུན་པ་ཞིག་ག་ལ་ཡིན། འདི་འདྲའི་སྣང་ཚུལ་ཞིབ་པར་ཞུས་ན་ཚིག་ཉུང་ངུ་ཞིག་གིས་ཞུས་པས་མི་ཚར། དེ་དོན་ཐུག་ལ་ངེས་པར་བསྣམ་རྒྱུ།…
དགེ་བཤེས་བློ་བཟང་དགེ་འདུན་དགོངས་པ་རྫོགས་པ།
༼ང་ཚོའི་གྲོགས་པོ་མང་པོ་ཞིག་གིས་དགེ་བཤེས་བློ་བཟང་དགེ་འདུན་མཇལ་མྱོང་ཐོས་མྱོང་ཡོད་པ་བཞིན་དེ་རིང་གནས་ཚུལ་འདི་ དྲ་ཤོག་ http://zw.tibetculture.net འདི་ནས་མཐོང་བྱུང་བ་བསྐྱར་སྤེལ་བྱས་པ་ཡིན་ལ། དགེ་བཤེས་ལགས་ཀྱི་བཞེད་དགོངས་ཡིད་བཞིན་འགྲུབ་པའི་སྨོན་ལམ་ཞུའོ༎༽ ལྷ་རམས་པ་བློ་བཟང་དགེ་འདུན་ནི་ཨ་མདོ་གཅན་ཚ་ནས་༡༩༦༥ལོར་འཁྲུངས་ཤིང་།དགུང་ལོ་བཅུ་དྲུག་སྟེང་རབ་ཏུ་བྱུང་བ་དང་བླ་བྲང་བཀྲ་ཤིས་འཁྱིལ་ནས་མདོ་སྔགས་གཉིས་ཀྱི་གཞུང་ལ་འཇུག་པའི་མགོ་བརྩམས། དགུང་ལོ་ཉི་ཤུར་ཉེ་བའི་སྐབས་སུ་ཆོས་ཀྱི་ཡིད་ཡེ་ནས་མ་ཚིམ་པར་རྒྱ་གར་ལ་འགྲོ་བའི་རེ་འདུན་དང་བཅས་འཕགས་ཡུལ་གྱི་འབྲས་སྤུངས་སྒོ་མང་གྲྭ་ཚང་ནས་སྔ་གཞུག་ཏུ་ཚོགས་རམས་པ་དང་ལྷ་རམས་པའི་དམ་བཅའ་མཛད་ནས་གཞུང་བཀའ་པོད་ལྔ་ལ་གཞན་ལས་ལྷག་པར་སྦྱངས། ༢༠༠༥ལོར་ལཱ་མོ་ཡོངས་འཛིན་ལུང་རྟོག་རྒྱ་མཚོ་མཆོག་གི་བཀའ་ལུང་ལྟར་མདོ་སྨད་ཁྲི་ཤོར་རྒྱལ་མོའི་ཉེ་འདབས་ཐར་ཤུལ་དགོན་རྣམ་དག་ཁྲིམས་ལྡན་གླིང་དུ་ཕེབས་ནས་གདུལ་བྱ་མང་དུ་སྐྱོང་བ་དང་དགོན་པ་དོ་དམ་བྱེད་པའི་འགན་གཉིས་གཅིག་ལྕོགས་སུ་བཞེས།ལོ་ངོ་གཉིས་རིང་ལ་ལཱ་མོ་བདེ་ཆེན་དགོན་དང་ཐར་ཤུལ་དགོན་གཉིས་སུ་རེས་མོས་ངང་སློབ་ཁྲིད་མཛད་དེ་གདུལ་བྱ་མང་པོའི་སྐོམ་པའི་གདུང་བ་ཡོངས་སུ་སེལ་བར་བྱས།ཡིན་ནའང་སྙིང་རྗེ་དང་བྲལ་བའི་འཆི་བདག་གིས་ལོ་ངོ་གཉིས་རིང་ཁོང་ཉིད་ལ་གཙེས་ནས་མ་བཏང་བས་མཐར་སྨན་བཅོས་སོགས་བྱེད་ཐབས་སྣ་ཚོགས་སྤྱད་ཀྱང་མ་ཕན་པས།ཡིད་སེམས་ཕངས་པ་ཞིག་ལ་སྤྱི་ལོ༢༠༠༨་ལོའི་ཟླ་༥་པའི་ཚེས༢༡་ཉིན(ལུགས་རྙིང་ཟླ༤པའི་ཚེས༡༧)རྒྱལ་ནང་གི་ཏ་ལེན་གྲོང་ཁྱེར་དུ་ང་ཚོ་དང་གཏན་དུ་བྲལ་སོང་ངོ་།
ལྷ་མེད། དད་མེད་ལ་རྣམ་རྟོག་ཅིག་ཡོད་དམ།
ཚེ་རིང་དོན་གྲུབ།
ཟླ་༥ཚེས་༡༢ཉིན་རྒྱ་ནག་གི་ཞིང་ཆེན་ཟི་ཁྲོན་ནང་ས་ཡོམ་གྱི་ཚད་རིམ་༧་༩ཅན་གྱི་ས་འགུལ་ཆེན་པོ་ཞིག་རྒྱབ་འདུག རྒྱ་ནག་གཞུང་འབྲེལ་ཞིན་ཧྰ་གསར་ཁང་གིས་གནས་ཚུལ་སྤེལ་པར། ས་ཡོམ་འདིའི་ནང་མི་ཁྲི་ལྔ་སྟོང་ལྔ་ལས་མང་བ་ཤི་བ་དང་མི་འབུམ་གཅིག་དང་ཁྲི་བདུན་ལ་རྨས་སྐྱོན་བྱུང་བ། མི་ས་ཡ་ལྔ་ཙམ་ལ་ཁྱིམ་མེད་དུ་གྱུར་ཡོད་ཚུལ་བཀོད་འདུག དོན་རྐྱེན་འདི་ནི་མའོ་ཙེ་ཏུང་དང་ཀྲུའུ་ཨེར་ལེན་འདས་གྲོངས་སོང་བའི་ལོ་དེ། ཕྱི་ལོ་༡༩༧༦ ལོ་རྒྱ་ནག་གི་བྱང་ཤར་ཐང་ཧྲིན་ནང་ས་ཡོམ་རྒྱབ་ཏེ་མི་འབུམ་གཉིས་ཁྲི་བཞི་ཙམ་ཤི་བའི་རྐྱེན་ངན་རྗེས་ཀྱི་གོད་ཆགས་ཆེ་ཤོས་དེ་རེད། ད་ཐེངས་ཀྱི་ས་ཡོམ་འདི་ལ་རྐྱེན་བྱས་ལྷ་མེད། ཆོས་མེད། དད་མེད། འདྲེ་མེད། དངོས་གཙོ་རིགས་ལུགས་པ་ཚོ་རྣམ་རྟོག་གི་ཚ་རླབས་ཤིག་འཕྱུར་བཞིན་འདུག
༄༅། །ཕྱོགས་ལས་རྣམ་རྒྱལ་སེང་དར་མཁའ་ལ་སྐྱོད།
ཆབ་བྲག་ལྷ་མོ་སྐྱབས།
དགའ་ལྡན་ཕོ་བྲང་ངམ་དགེ་ལུགས་པས་དབང་བསྒྱུར་བའི་ཆབ་སྲིད་ལམ་ལུགས་འདི་དོན་དངོས་སུ་ཏཱ་ལའི་བླ་མ་སྐུ་ཕྲེང་རིམ་བྱུང་གི་ཆོས་སྲིད་དབང་ཐང་ལ་རག་ལས་ནས་གནས་པ་ཞིག་ཡིན་མོད་ཀྱང། དེ་ཡང། ཐོག་མར་དགེ་ལུགས་པར་དད་བཀུར་ཆེ་བའི་སོག་པོའི་སྦྱིན་བདག་གུཤྲི་བསྟན་འཛིན་ཆོས་རྒྱལ་དཔུང་ཤུགས་ཀྱིས་སྐབས་དེར་ཚུལ་མིན་ལུགས་མིན་བྱེད་པའི་གཙང་སྡེ་སྲིད་ཕམ་པར་བརྒྱབ་ནས་དབང་ཐང་ཡོད་ཚད་༧གོང་ས་ལྔ་བ་ཆེན་པོར་ཕུལ་བ་སྟེ། དགེ་ལུགས་པའམ་ཏཱ་ལའི་བླ་མ་རང་ངོས་ནས་སྲིད་དབང་འཐབ་རྩོད་བྱས་ནས་དབང་ཆ་འཕྲོག་པ་ཞིག་མིན་པས་དགའ་ལྡན་ཕོ་བྲང་དབུ་བརྙེས་པའི་ལོ་རྒྱུས་ཀྱི་རྒྱབ་ལྗོངས་རང་བཞིན་གཙང་བའི་ཐོག་ལ། རྩ་བའི་མཐུན་རྐྱེན་ཁྱད་པར་པ་ལྔ་ཚང་བ་སྟེ། གཅིག་ནས་ཏཱ་ལའི་བླ་མ་རང་ཉིད་ལ་ཐུན་མོང་མ་ཡིན་པའི་མཁྱེན་ཡོན་མཐུ་སྟོབས་ཤིག་ཡོད་པ་དང། གཉིས་ནས་༧གོང་ས་ལྔ་བ་ཆེན་པོས་ཆོས་བརྒྱུད་རིས་མེད་ཀྱི་ཐབས་མཁས་མཛད་པས་ཆོས་བརྒྱུད་གང་ལ་ཡང་ཕོག་ཐུག་གཏོང་མི་ཆོག་པར་ཕན་ཚུན་མཛའ་འབྲེལ་ངང་གནས་དགོས་པའི་ཁྲིམས་སྲོལ་རྒྱུུན་འཁྱོངས་གནང་བ་དང༌། གསུམ་ནས་བོད་མི་ཕལ་མོ་ཆེས་དགེ་ལུགས་པའི་ཆོས་བརྒྱུད་ལ་དད་བཀུར་བྱེད་པས་མི་དམངས་ཀྱི་རྒྱབ་རྩ་བརྟན་པ་དང༌། བཞི་ནས་ཏཱ་ལའི་བླ་མའི་ཡང་སྲིད་ཁྲིར་མ་ཕེབས་པའི་བར་ལ་རྒྱལ་ཚབ་དང་བཀའ་ཤག་ནས་འཛིན་སྐྱོང་བརྟན་སྲུང་གནང་བའི་འཛིན་སྐྱོང་ལམ་ལུགས་བརྟན་པ་དང༌། ལྔ་ནས་སོག་པོ་དང་རྒྱ་ནག་གོང་མ་རིམ་པའི་བར་ལ་མཆོད་ཡོན་གྱི་འབྲེལ་ལམ་ཟབ་པ་བཅས་ཀྱིས་དགའ་ལྡན་ཕོ་བྲང་བའི་ཆབ་སྲིད་ཡུན་རིང་ཕྱོགས་ལས་རྣམ་པར་རྒྱལ་པར་གྱུར།
གསང་ཆེན་ཉམས་རྟོགས་ཀྱི་སྲོལ་འབྱེད་ཆེན་མོ་བྷི་ལ་བ་སི་ཀི།
ཤེས་རབ་དར་རྒྱས།
ཉེ་བའི་ཆར་ཁོ་བོས་ལས་ཀའི་བར་སྟོང་འགར་ངལ་བསོའི་ཚུལ་དུ་གཏམ་རྒྱུད་གསེར་ཐང་ལས་དུམ་བུ་འགའ་བསྐྱར་དུ་བཀླགས། དགེ་ཆོས་ཀྱིས་ནམ་ཞིག་ན་བོད་ལ་ཆེས་གསར་བར་གྱུར་པའི་གནས་ཚུལ་ཞིག་ངོ་སྤྲོད་འདི་ལྟར་བྱས་འདུག། “འདི་དང་འདྲ་བའི་ཆོས་ལུགས་གསར་པ་གཞན་ཞིག་ཀྱང་བྱུང༌། དེའི་རྩ་བ་འཛུགས་མཁན་ནི་ཨུ་རུ་སུའི་བུད་མེད་བ་ལ་བ་སི་ཀི་བྱ་བ་ཡིན། འདི་ནི་རང་བྱུང་གི་རྣལ་འབྱོར་མ་ངོ་མཚར་ཅན་ཞིག་ཡིན་སྙམ་ཞིང༌། གང་ལྟར་ཡང་རྫུ་འཕྲུལ་ཐོབ་པ་ཞིག་ཡིན། བྱིས་པའི་དུས་ནས་བོད་ཀྱི་བླ་མ་མུ་ར་བྱ་བ་དང༌། སྐུ་ཐུ་མེད་བྱ་བ་གཉིས་ཀྱིས་རྨི་ལམ་དུ་རྗེས་སུ་བཟུང༌། དེ་ནས་ཇི་ཞིག་ན་ཞལ་གཟིགས་ཀྱི་རྣམ་པ་དང༌། མཐར་དངོས་སུ་མཇལ་ཏེ་མི་དང་མི་བཞིན་ལབ་ཅིང༌། དོན་ཕྲ་རགས་ཐམས་ཅད་ཀྱི་བསླབ་བྱ་བྱས། དེ་དག་གི་ལོ་རྒྱུས་རྒྱས་པ་རྣམས་ཞིབ་ཏུ་བཀླགས་ཚེ། རེ་ལས་ཀྱི་རྡོ་རྗེ་ལ་བྱུང་བའི་གསང་བདག་ཀྱང་དྲན་སྙམ་བྱེད། རེ་རྗེ་བཙུན་རྒ་ལོ་ལ་བྱུང་བའི་རྒྱལ་གདོན་དེ་དང་ཡང་འདྲ་སྙམ་པ་བྱེད། ཁ་ཚོན་གང་དུ་གཅོད་དགོས་པ་མ་ཤེས།
དེ་ལས་མང་བ་། “གསང་ཆེན་ཉམས་རྟོགས་ཀྱི་སྲོལ་འབྱེད་ཆེན་མོ་བྷི་ལ་བ་སི་ཀི།” »
