ཀླུ་སྨྱོན།
ལོ་གཅིག ཡང་བཞུད་རན་འདུག
ལོ་གཅིག་འདིའི་ཀློང་ནས།
ངས་ཉི་མ་དྲོ་དུས་དང་སྤྲིན་པ་འཐིབས་དུས་གཉིས་ཀར།
རྒུན་ཆང་རེ་འཐུང་ཞོར་སྙན་ངག་རེ་བྲིས་ཤིང་།
ལན་རེར།
ཆུ་འགྲམ་དང་ནགས་ཀློང་དུ་སོང་ནས།
དམར་ཧྲེང་མར་གན་རྐྱལ་དུ་ཉལ་ཏེ།
མིག་གཉིས་ཀྱིས་གཡོ་བ་མེད་པར་སྔོ་བསང་གི་ནམ་མཁའི་དབུས་སུ་ཅེར་ནས་བསྡད་པ་ཡིན།
ལོ་གཅིག་འདིའི་ཀློང་ནས།
ངས་སྤུས་ཀ་དེ་ཙམ་ལེགས་རྒྱུ་མེད་པའི་རྩོམ་ཡིག་རེ་བྲིས་ཤིང་།
བྲིས་པ་དེ་དག་ཀྱང་ངོ་ཚ་མེད་པར་ཀློག་མཁན་ཚོའི་སྤྱན་སྔར་བཤམས་རྗེས།
འགྱོད་པ་ཅི་ཡང་མེད་པར་བབ་ཆགས་ཀྱི་ཏིང་འཛིན་རེ་སྒོམ་བཞིན་བསྡད།