ལན་མ་རྙེད་པའི་དྲི་བ།
རང་རང་གི་བདེ་སྡུག་གི་བྱེད་པོ་རང་རང་རེད། ཡིན་ན་ཡང་ངའི་ནམ་རྒྱུན་གྱི་དྲི་བ་ནི། ང་ཚོར་མགོ་དང་དེའི་ནང་དུ་བསམ་བློ་གཏོང་སྤྱད་ཀྱི་ཀླད་པ། རྐང་ལག་དང་དེའི་སྣེ་རུ་དངོས་པོ་འཇུ་བཟུང་བྱེད་སྤྱད་ཀྱི་མཛུབ་མོ་དང་སེན་མོ། ཁ་དང་དེའི་ནང་དུ་སྐད་ཆ་བཤད་སྤྱད་ཀྱི་ལྕེ་དང་ཟ་མ་བཟའ་སྤྱད་ཀྱི་སོ་ཕྲེང་། མིག་དང་དེའི་ནང་དུ་ཕྱི་རོལ་མཐོང་ཐུབ་པའི་མིག་གི་རྒྱལ་མོ། རྣ་བ་དང་དེའི་ནང་དུ་སྒྲ་སྐད་གོ་སྤྱད་ཀྱི་རྣ་དབང་། སྣ་དང་དེའི་ནང་དུ་དྲི་མ་མྱོང་བྱེད་ཀྱི་སྣ་དབང་། འདོམ་དང་དེའི་ངོས་སུ་མི་རྒྱུད་སྤེལ་བྱེད་དང་བདེ་བ་མྱོང་བྱེད་ཀྱི་ཕོ་མཚན་མོ་མཚན་སོགས་ཅིའི་ཕྱིར་ཡོད་པ་རེད། ཅིའི་ཕྱིར་བེད་སྤྱོད་མེད་པ་གཅིག་ཀྱང་མེད་པའི་དངོས་པོ་འདི་དག་ང་ཚོའི་ལུས་སྟེང་དུ་གྲུབ་པ་རེད། ཆེས་ཐོག་མའི་གྲུབ་སྟངས་དེ་ཅི་འདྲ་རེད། མཐའ་ཡས་པའི་འཇིག་རྟེན་གཞན་གྱི་སེམས་ཅན་དེ་དག་གི་དབྱིབས་གཟུགས་ཇི་འདྲ་ཞིག་ཡིན་མིན་སོགས་རེད། མཚན་མོ་རེ་རེ་བཞིན་ངས་མིག་གིས་ནམ་མཁར་བལྟས་ནས་སྐར་ཚོགས་དེ་ཚོ་གང་ཞིག་གི་སྟེང་དུ་སྲོག་ལྡན་གྱི་རིགས་ཡོད་དམ། གང་ཞིག་གི་སྟེང་དུ་ང་ཚོ་ལས་ལྷག་པའི་བདེ་སྐྱིད་ཀྱི་འཚོ་བར་རོལ་མཁན་ཡོད་དམ། གང་ཞིག་གི་སྟེང་དུ་ང་ཚོ་ལས་སྐྱོ་བའི་སྡུག་བསྔལ་མྱོང་མཁན་ཡོད་དམ།…